निर्णायकको प्रसंसाले उत्साहित भएँ

- साप्ताहिक संवाददाता

असार ३, २०७६

जी टिभीबाट प्रसारित गायनमा आधारित रियालिटी शो ‘सारेगमप लिटिल चाम्स–ध२०१९’ मा नेपालका दुई बालप्रतिभा प्रितम आचार्य तथा आयुष केसीले तेस्रो तथा चौथो स्थान हासिल गर्न सफल भए । गत आइतबार सम्पन्न प्रतियोगिताको ग्रान्ड फिनालेमा अन्य चार प्रतिस्पर्धीसहित प्रितम र आयुषले उत्कृष्ट प्रस्तुति दिँदै सेकेन्ड तथा थर्ड रनर्सअपको उपाधि जितेका हुन् । कार्यक्रमबाट फर्किएपछि आयुषले साप्ताहिकमार्फत आफ्नो धारणा यसरी सार्वजनिक गरेका छन् ।

६ महिनापछि नेपाल आउँदा कस्तो लागिरहेको छ ? 

मलाई त वर्षौंपछि आफ्नो देश फर्किए जस्तो लागिरहेको छ । कस्तो रमाइलो भैरहेको छ, खुसी छु । 

मुम्बईको ६ महिने बसाइ कस्तो रह्यो ? 

एकदमै राम्रो रह्यो । मैले सँगीतमा धेरै भन्दा धेरै कुरा सिक्ने मौका पाएँ । मेहनत पनि उत्तिकै गर्नुपर्‍यो । बिहान ९ बजेदेखि राति ३ बजेसम्म पनि हामी सँगीत नै सिकिरहेका हुन्थ्यौं । रिहर्लसल गरिरहेका हुन्थ्यौं, त्यही मेहनतले आज सकारात्मक परिणाम दिएको छ । लाखौंले भाग लिएको प्रतियोगितामा चौथो स्थानमा आउन सफल भएको छु । त्यसैले देशको नाम राख्न सफल भएको छु जस्तो लागेको छ । 

सारेगमप लिटिल च्याम्सको समग्र अनुभव कस्तो रह्यो ? 

अत्यन्त सकारात्मक छ । संगीतमा हामीले सिक्नुपर्ने कुरा अझै धेरै रहेछ भन्ने पनि बुझ्न सकें । सारेगमप लिटिल च्याम्सको विशाल प्लेटफर्ममा उभिएर अन्तिम चरणसम्म पुग्छु भन्ने मैले कल्पना पनि गरेको थिइनँ । 

प्रतियोगिताको पहिलो चरणदेखि ग्रान्ड फिनालेसम्मको यात्रालाई छोटकरीमा भनिदिनु न ? 

नेपालबाट भिडियो क्लिप्सहरू पठाएपछि म र प्रितम आचार्यसहित १० जना दिल्ली अडिसनका लागि गएका थियौं । उक्त अडिसनबाट म र प्रितम मात्र मुम्बई अडिसनका लागि छनौट भयौं । पहिले त मुम्बईका लागि छनौट हुन सकिन्छ कि सकिंदैन भन्ने कुराले डर लागेको थियो । सेलेक्ट भएर मुम्बई पुगेपछि सिल्भर मेडल, गोल्ड मेडल जित्दै हामी टप १५ मा पुग्यौं । त्यहाँसम्म पुग्नुलाई नै हामीले आफ्नो सफलता मानेका थियौं । यद्यपि मुम्बई पुगेदेखि नै म बिरामी भएँ । मेरो गला खराब भएका कारण खुलेर गाउन सकिन । औषधि खाँदै, लो स्केलमा गीत गाउँदै अघि बढिरहें । फाइनलसम्म पुग्छु भन्ने त सोचेकै थिइनँ । 

गला बसेका बेला गाउने हौसला कसरी  पाउनुभयो ? 

घाँटीमा समस्या भएर गला बसेपछि गीत गाउन अप्ठ्यारो भयो । पहिलेको जस्तो रेञ्जमा गाउन नसक्ने भएँ । तै पनि मसँगै भएकी मेरी ममीले मलाई हौसला दिइरहनुभयो । तिमी गाउन सक्छौं भनेर हौसाइरहनुभयो । सेमिफाइनल चरणमा गला बसेकै अवस्थामा मैले ‘तुम मिले दिल खिले...’ गाएको थिएँ । मेरो उक्त प्रस्तुति सिजनकै उत्कृष्ट प्रस्तुति बन्न सफल भयो । उक्त गीत मैले आँखा चिम्लिएर गाएको थिएँ । आँखा खोल्दा मेरो वरिपरि जुरी उभिनुभएको रहेछ । मलाई जुरुक्कै बोक्नुभयो । मेरो गायनको प्रशंसा गर्नुभयो । म खुसीले रोएं । मेरी ममी त अझ बढी रुनुभयो । त्यही प्रस्तुतिले मलाई फाइनलसम्म पुर्‍यायो ।

 

फाइनलको प्रस्तुति कस्तो रह्यो ? 

फाइनलका लागि हामीले विशेष तयारी गरेका थियौं । फाइनलमा पनि मैले तुम मिले..नै गाउनुपर्‍यो । त्यसक्रममा उक्त गीतका वास्तविक गायक कुमार सानु पनि समारोहमै हुनुहुन्थ्यो । मैले गाउन थालेपछि उहाँ पनि स्टेजमा उक्लिनुभयो । हामी दुबैले उक्त गीत गाउँदाको क्षण मेरा लागि अविस्मरणीय रह्यो । त्यो नै मेरा लागि जीत हो भन्ने सोचें । गायिका कविता कृष्णमूर्तिले त उभिएरै सम्मान प्रकट गर्नु भयो । 

टप सिक्समा आफ्नो नाम घोषणा हुँदा कस्तो लाग्यो ? 

टप सिक्सका लागि मेरो नाम सबैभन्दा अन्तिममा घोषणा गरिएको थियो । पाँच जनाको नाम घोषणा भैसकेको थियो । म सहित बाँकी चारमध्ये एक जनाले मात्र टप सिक्समा स्थान पाउने प्रावधान थियो । म डरले काँपिरहेको थिएँ । जज अमाल मल्लिकले टप सिक्समा मेरो नाम घोषणा गर्दा म अति नै खुसी भएँ । एकदमै एक्साइटेड भएँ । मेरो नाम घोषणा भए लगत्तै बाँकी फाइनलिस्टले मलाई अँगालो मार्नुभयो, बधाई दिनुभयो । त्यसपछि मैले फाइनलको तयारी थालें । 

निर्णायकहरूको प्रतिक्रिया कस्तो पाउनुभयो ? 

कार्यक्रमका तीन मुख्य निर्णायकले मलाई सधैं ‘तिम्रो कोमलता (मासुमियत) तथा इनोसेन्ट (भोलापन) लाई सधैंभरी कायम राख्नु, कहिले घमन्डी नहुनु’ भनिरहनुभयो । उदितनारायण झाले ‘शिरमा नेपाली टोपी कहिले नछाड्न’ आग्रह गर्नुभयो । सलमान खानले मेरो र उहाँको आँखा ठ्याक्कै मिलेको बताउनु भयो । कुमार सानुले ‘तिमीले जुन फिलले गायौं, त्यो फिलिङमा गाउने खुबी कसैमा छैन’ भनेर प्रशंसा गर्नु भयो । कविता कृष्णमूर्तिले मेरो गायनलाई भगवानको उपहार भन्नुभयो । यी सबै प्रतिक्रियाले ममा उत्साह जगाएको छ । 

अबको यात्रा कसरी अघि बढ्छ ? 

अबको मेरो यात्रा सँगीत र अध्ययनको वरिपरी नै केन्द्रित हुनेछ । यो प्रतियोगिताले गर्दा पढाइ छुटेको छ । त्यसलाई रिकभर गर्नु पर्नेछ । कक्षा ८ को फर्स्ट टर्म आइसक्यो, अब परीक्षाको तयारी गर्नुपर्नेछ । अब मेरो स्वर परिवर्तन हुने उमेर भयो । त्यसैले अब  म रियाजभन्दा पनि बाद्यवादन बजाएर अभ्यास गर्नेछु । मलाई पियानो, डबली, तबला आदि बाद्ययन्त्र बजाउन सिक्नु छ । 

आफ्ना प्रशंसकहरूलाई के भन्न चाहनुहुन्छ ? 

सर्वप्रथम सुरशाला सँगीत एकेडेमी तथा मेरा गुरु अमृत क्षेत्रीलाई विशेष धन्यवाद दिन चाहन्छु । उहाँकै मेहनतले हामी त्यो प्लेटफर्म सम्म पुग्न सफल भएका हौं । सम्पूर्ण नेपाली दर्शक तथा श्रोताहरूलाई हृदयबाटै धन्यवाद । भविष्यमा पनि मलाई माया र सद्भाव दिनुहोला  । ममा भएका कमी–कमजोरीहरू औंल्याइदिन आग्रह गर्छु । 

छुट्याउने कुरा ठीक लागेन

रीता केसी, आमा 

छोरा (आयुष) को सफलताप्रति तपाईंको भनाइ के छ ? 

हामी अत्यन्त खुसी छौं । आयुषमात्र होइन प्रितमले समेत पाएको सफलताप्रति हामी आमा–बुवामात्र होइन, सम्पूर्ण नेपालले नै गौरव गरेको हुनुपर्छ । 

६ महिनाको मुम्बई बसाइमा आयुषको प्रस्तुतिलाई कसरी नियाल्नुभयो ? 

मुम्बई बसाइका क्रममा आयुषले धेरैभन्दा धेरै कुरा सिक्ने मौका पाएको छ । दिनरात संगीतको अभ्यासमा व्यस्त भएर आफुलाई निखार्ने मौका पाएको छ । सँगसँगै मुम्बई पुगेदेखि नै बिरामी भएर उसलाई केही गाह्रो समेत भएको थियो । 

तपाईंले कसरी हौसला दिनुहुन्थ्यो ? 

कति पटक घाँटि दुखेर गीत गाउन नसक्दा मसँग आएर रुन्थ्यो । मचाहिं तिमीले गाउन सक्छौं भनेर हौसला दिइरहन्थें । गला बसेका बेला पनि गीत गाउन अघि बढ्न मैले दिएको हौसलाले उसलाई निकै ठूलो साथ दिएको रहेछ । 

आयुष र प्रितम कत्तिको घुलमिल हुन्थे ? 

उनीहरू दुवै जनाले एक–अर्काको साथ कहिल्लै छाडेनन् । सधैं सँगै हुन्थे । प्रतियोगितामा पनि उनीहरू सँग–सँगै अघि बढे । नेपालमा आयुष काठमाडौंको अनि प्रितम ईटहरीको भनेर छुट्याउने काम पनि भएछ । त्यो कुराले चाहिं मलाई अति नै दुःख लागेको छ । म के चाहन्छु भने आयुष र प्रितम नेपालका अर्का मह जोडी जस्तै बनून् । पछि सम्म पनि उनीहरू जोडीकै रूपमा काम गरिरहुन् । 

आयुषले पाएको सफलताबाट सन्तुष्ट हुनुहुन्छ ? 

सन्तुष्ट छु । उनीहरूले जति मेहनत गरेका थिए, त्यसको परिणाम पाएका छन् । यद्यपि, नेपालका केही युट्युब च्यानलमा गलत आशयका सामग्रीहरू नराखिएको भए उनीहरू अझ माथि पुग्ने थिए भन्ने चाहिँ लागिरहेको छ ।  

प्रकाशित :असार ३, २०७६

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्