देशभित्रै चेली बेचबिखन

- स्वस्तिक श्रेष्ठ

जेष्ठ २७, २०७६

 

पर्यटनलाई आर्थिक विकासको आधार मानिन्छ । ५ नम्बर प्रदेश पर्यटनबाट नै आर्थिक समृद्धि हासिल गर्ने लक्ष्यसहित अघि बढेको छ । पर्यटनको आधार सेवा व्यवसायलाई लिइन्छ । होटल तथा रेस्टुराँहरूबाट प्राप्त हुने सेवाको गुणस्तरले पर्यटकहरूलाई लोभ्याउँछ । पर्यटकहरूलाई आवश्यक सेवा उपलब्ध गराउने लक्ष्यसहित खोलिएका रुपन्देहीका कतिपय होटलमा भने देह व्यवसायसमेत भएको पाइन्छ । 

कुनै बेला मुम्बईमा नेपाली चेलीले नारकीय जीवन बिताएका समाचार बग्रेल्ती आउँथे । अहिले भने नेपालमै चेलीहरूलाई बन्धक बनाई यौनशोषण गरिने आरोप लाग्ने गरेको छ । यहाँका होटलमा यौनधन्दा मात्र होइन, युवतीको ‘किनबेच’ समेत हुने गरेको खुलासा भएको छ । रुपन्देहीका कतिपय सानाठूला होटलमा युवती सप्लाई हुने गरेको प्रहरीको दाबी छ । यसक्रममा इलाका प्रहरी कार्यालय बुटवलले एक हप्ताको अवधिमा बुटवलका दुईवटा होटल सञ्चालकलाई मानव तस्करीको आरोपमा पक्राउ गरेको छ ।

बुटवल कालिकानगरस्थित एक होटलमा बन्धकका रूपमा राखेर यौन व्यवसायमा लगाइएको आरोपका साथ एक १५ वर्षीया किशोरी प्रहरीको शरणमा पुगेपछि यो तथ्य सार्वजनिक भएको हो । बुटवल–११ कालिकानगरस्थित राप्ती मेनु होटलमा ६ महिनाअघि ती किशोरीलाई झाडु पोछाको काममा राखिएको थियो । गरिब परिवारकी ती १५ वर्षीया किशोरीलाई होटल सञ्चालकले ग्राहकसँग यौनसम्पर्कका लागि पठाउन थालेका थिए । आफूमाथि के भैरहेको छ भन्ने समेत हेक्का नपाउने ती किशोरी त्यहाँबाट भागेर घर आइन् । 

‘नयाँ–नयाँ मानिससँग ठूला–ठूला होटलमा पठाउँथे,’– उनले भनिन् । ‘कति दिनसम्म ज्वरो आएर बिरामी पर्दासमेत मलाई जबरजस्ती पठाइन्थ्यो,’– उनले रुँदै भनिन् । होटलको सबैभन्दा माथिल्लो तलामा बन्धक बनाएर राखिएका केही युवती एक पटक भागेका समेत थिए । उनीहरूलाई होटल सञ्चालकले बाटोबाटै फर्काएर धेरै यातना दिएको उनले बताइन् । 

होटलमा काम गरेको पैसा पनि होटल सञ्चालकले दिएका थिएनन् । उनले यौन कर्ममा लगाएबापतको पैसा आफैले बुझ्ने गरेका थिए । एकपटक साहूले ३ हजार ५ सय रुपैयाँ दिएको ती किशोरीले बताइन् । यसपटक भने धेरै बिरामी भएपछि होटल सञ्चालकले १ हजार ५ सय रुपैयाँ दिएर घर पठाएका थिए । उनी बिरामी परेपछि उपचारका क्रममा यौन शोषणमा परेको पाइएको थियो । त्यसपछि परिवारले आफन्त नेपालमा सम्पर्क गरेर कानुनी उपचार अघि बढाएका हुन् । आफन्त नेपालकी उषा गुरुङले सुनौली नाका हुँदै धेरै नेपाली चेली बेचिएको सुनिए पनि आफ्नै देशमा बेचिएको घटना भने नौलो भएको बताइन् । घरायसी एवं सामाजिक डर–त्रास देखाएर लगातार उनीहरूमाथि यौन शोषण गरिने गुरुङले दाबी गरिन् । 

प्रहरीले होटल सञ्चालक बाग्लुङ निसिखोला–७ घर भै हाल बुटवल–११ मा होटल सञ्चालन गर्दै आएका सञ्चालक दम्पती २९ वर्षीय अनिल भनिने टेकबहादुर तथा वर्ष ३३ की मीनाकुमारीलाई नियन्त्रणमा लिएको इलाका प्रहरी कार्यालय बुटवलका प्रमुख प्रहरी नायव उपरीक्षक डिलबहादुर मल्लले बताए । उनीहरूले होटलमा युवतीहरू जम्मा गर्ने र बुटवलमा विभिन्न होटलमा पठाउने काम गर्दै आएको पाइएको मल्लको दाबी छ । प्रहरीका अनुसार ती किशोरीले आफ्नो बयानमा गाडीमा राखेर एसी चल्ने अग्ला होटलहरूमा पठाउने गरेको बताएकी छिन् । कुँवर दम्पतीले युवतीहरूलाई एकपटक ग्राहक कहाँ पठाएबापत उनीहरूसँग १ हजार ५ सय तथा रातभरि बसेको भने ६ हजारसम्म लिने गरेको कुरा प्रहरी समक्ष स्वीकार गरेको बताइन्छ । 

यसैगरी बुटवल उपमहानगरपालिका वडा नम्बर– ५, नयाँ बसपार्कस्थित गुल्मेली होटलमा समेत २० देखि २२ वर्ष उमेरका ५ जना युवती राखेर व्यवसायिक रूपमा यौन व्यवसाय सञ्चालन गरेको आरोपमा सञ्चालक सोमबहादुर बस्नेत पक्राउ परेका छन् । होटलमा यौनधन्दा नै चलेको अवस्थामा सञ्चालकलाई पक्राउ गरिएको इलाका प्रहरी कार्यालय, बुटवलका प्रहरी नायव उपरीक्षक डीबी मल्लले बताए ।

रुपन्देही जिल्ला प्रहरी उपरीक्षक हृदय थापाले यो जटिल केस भएकाले सूक्ष्म अध्ययन–अनुसन्धान गरिरहेको जानकारी दिँदै यसमा जोडिएका सबै होटल व्यवसायीलाई कारबाही गरिने जानकारी दिए । पक्राउ परेकाहरूलाई मानव बेचबिखन तथा ओसारपसार अपराधअन्तर्गत कानुनी कारबाही गरिने प्रहरीले बताएको छ । आरोपी दम्पतीलाई १५ वर्षसम्मको कैद सजाय हुन सक्ने कानुनी व्यवस्था छ । 

प्रकाशित :जेष्ठ २७, २०७६

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्