श्रम मन्त्री बिष्टले ‘गोपी’ निर्माण युनिटलाई मन्त्रालय बोलाए  

- साप्ताहिक संवाददाता

पुस २५, २०७५

श्रम, रोजगार तथा सामाजिक सुरक्षा मन्त्री गोकर्ण विष्टले चलचित्र ‘गोपी’ को निर्माण युनिटसँग भेटघाट गरेका छन् । सिंहदरबारस्थित मन्त्रालयको कार्यकक्षमा मंगलबार उनले चलचित्रका कलाकार निर्माता तथा निर्देशकलाई भेटेका हुन् । भेटमा मन्त्री विष्टले चलचित्रको ट्रेलरले आफूलाई उत्सुक बनाएकाले थप जानकारीका लागि चलचित्रको निर्माण टिमसँग साक्षात्कार गर्न चाहेको बताए । 

‘चाह्यो भने देशमै पनि धेरै कुरा गर्न सकिन्छ भन्ने चलचित्रको विषय रहेछ । अहिले सरकारले पनि स्वरोजगार र स्वावलम्बनको कुरालाई प्राथमितामा राखेको छ । सरकारको धारणालाई चलचित्रले समेटेको देख्दा एकदमै खुशी लाग्यो’ मन्त्री विष्टले भने, ‘चलचित्रप्रति श्रम मन्त्रालय र व्यक्तिगत रुपमा मेरो पनि नैतिक समर्थन र ऐक्यवद्धता छ ।’ 

मन्त्री विष्टले आफूले कहिलेकाँही नेपाली चलचित्र हेर्ने गरेको भए पनि मौलिक चलचित्र कमै बन्ने गरेको बताए । उनले नीतिगत रुपमै मौलिक चलचित्रलाई प्रवद्र्धन गर्ने कुरा सरकारसँग राख्ने उनले आश्वासन दिए । 

निर्देशक दीपेन्द्र लामाले श्रममन्त्रीले चलचित्रप्रति देखाएको चासोले आफू र आफ्नो टिमलाई हौसला मिलेको बताए । ‘विदेश नताकेर देशमै पसिना खन्याउने युवाहरुको ठूलो जमात छ, देशमा । त्यो समूहलाई चलचित्रका माध्यमबाटै भए पनि हौसला प्रदान गर्ने उद्देश्यले देशमै केही गर्न खोज्ने युवाको कथा भन्ने प्रयास गरेका थियौं’ लामाले भने, ‘हाम्रो काममा मन्त्रीको नजर परेकोमा हामीलाई हामी आफ्नो उद्देश्यमा धेरथोर भए पनि सफल भएको महसुस भएको छ ।’ 

लेखक सामीप्यराज तिमल्सेनाले चलचित्रले कृषिकर्म गर्ने लाखौं किसानको मुद्दालाई समेट्ने बताउँदै  देश छाड्न चाहाने युवालाई फरक तरिकाले सोच्न प्रेरित गर्ने बताए । मन्त्री विष्टसँगको भेटघाटमा चलचित्रका मुख्य कलाकार विपिन कार्की, सुरक्षा पन्तसँगै निर्देशक दीपेन्द्र लामा, निर्माता मणिकर्ण केसी, कार्यकारी निर्माता श्रीधर पौडेल र लेखक सामीप्यराज तिमल्सेना सहभागी थिए ।

 

प्रकाशित :पुस २५, २०७५

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्