हलिउडका केही रोचक घटनाक्रम

- साप्ताहिक संवाददाता

पुस १८, २०७५

 

वर्ष २०१८ को अन्तिम महिनाको पहिलो साता लोकप्रिय गायिका शकिरामाथि ट्याक्स चोरीको आरोप लाग्यो । स्पेनका सरकारी अधिकारीहरूले शकिरामाथि १४ हजार ५ सय युरो ट्याक्स चोरी गरेको आरोप लगाए । शकिरा सन् २०१५ मा बहामासबाट स्पेनको बार्सिलोना आएर बसेकी थिइन् । सरकारी अधिकारीहरूका अनुसार शकीराले सन् २०१२ देखि २०१४ का बीच पनि स्पेनमा बसोबास गरेकी थिइन्, जसअनुसार शकिराले ती दुई वर्षबीच भएको आम्दानिको ट्याक्ससमेत स्पेनमै भर्नुपर्छ । शकिराले भने उक्त आरोपलाई गलत भनेकी छिन् । 

हलिउडका लोकप्रिय अभिनेता लियोनार्दो डिकेप्रियाले उपहारका रूपमा पाएको ओस्कार एवार्ड फिर्ता गरिदिएका छन् । दिवंगत अभिनेता मर्लन ब्रेडोले जितेको उक्त एवार्ड एक मलेसियन फाइनान्सरले डिकेप्रियोलाई उपहारमा दिएका थिए । धोकासम्बन्धी एउटा मुद्दाका कारण डिकेप्रियोबाट उक्त एवार्ड फिर्ता मागिएको हो । 

अमेरिकी ¥यापर टी पेनको नयाँ गीत ‘द्याट्स यो मनी’ माथि धुन चोरीको आरोप लागेको छ । टी पेनले उक्त गीतमा हिन्दी चलचित्र आशिकी–२ को ‘तुम हि हो’ को धुन नक्कल गरेको बताइएको छ । कपिराइटको आरोप लाग्ने बित्तिकै पेनले उक्त गीत आफ्नो यूट्युब च्यानलबाट हटाएका छन् । 

यही वर्ष हलिउड अभिनेता एडी मर्फी दसौं पटक बुवा बनेका छन् । उनले प्रेमिका पेज बुचरका तर्फबाट दसौं सन्तानका रूपमा छोरा जन्माएका हुन् । एडीले नोभेम्बर ३० का दिन जन्मिएका आफ्ना दशौं सन्तानको नाम मेक्स चाल्र्स मर्फी राखेका छन् ।

अमेरिकी गायिका एरियाना ग्रान्डेले सार्वजनिक गरेको नयाँ गीत ‘थ्यांक यू नेक्स्ट’ ले नौलो कीर्तिमान कायम गरेको छ । युट्युबमा अपलोड भएको आधा घण्टाभित्र उक्त भिडियो १० लाख पटक हेरिएको थियो, जुन भ्युज आजका मितिसम्म अन्य कुनै पनि गीतले पाएको छैन । 

अमेरिकी टेलिभिजन स्टार पेरिस हिल्टनले आफ्ना प्रेमि क्रिस जिल्कासँगको सम्बन्ध तोडेको घोषणा गरिन् । उनको उक्त घोषणालगत्तै क्रिसले इन्गेज्मेन्ट रिङ फिर्ता मागेका छन् । उक्त औंठीको मूल्य झन्डै २० करोड रुपैयाँ भएको बताइन्छ । 

हलिउडका लोकप्रिय अभिनेता रोबर्ट डी निरो तथा उनकी श्रीमती ग्रेस हाइटावरले २० वर्ष पुरानो वैवाहिक सम्बन्ध टुंग्याउने घोषणा गरेका छन् । ७५ वर्षीय रोबर्ट तथा ६३ वर्षीया ग्रेसले सन् १९९७ मा विवाह गरेका थिए । उनीहरूका २० वर्षीय छोरा तथा ६ वर्षीया छोरी छन् । 

लोकप्रिय कार्टुन पात्र मिकी माउस वर्ष २०१८ को नोभेम्बरदेखि ९० वर्षका भएका छन् । १८ नोभेम्बर १९२८ मा मिकी माउसलाई पहिलो पटक चलचित्र ‘स्टीबोट विले’ मा प्रस्तुत गरिएको थियो । गत नोभेम्बर महिनामा उनीहरूको ९० औं जन्मोत्सव मनाइएको हो । 

रियालिटी टेलिभिजन स्टार तथा मेकअप प्रोडक्ट निर्माता काइली जेनरलाई एउटा मेकअप कम्पनिले प्रोडक्ट चोरी गरेको आरोप लगाएको छ । शिरी कस्मेटिक कम्पनीले काइली तथा उनको कम्पनी काइली कस्मेटिक्समाथि बर्न टु स्पार्कल मेकअप लाइन चोरी गरेको आरोप लगाएको हो ।   

पप गायक जस्टिन बीबर तथा उनकी प्रेमिका गायिका/मोडल हेली बाल्डविनले सेप्टेम्बर महिनामा न्यूयोर्कको एउटा अदालतमा विवाह गरे । पेपर म्यारिज गरेका उनीहरूले विवाहको खबरलाई भने गोप्य राख्न चाहेका थिए । त्यसअघि उनीहरूले जुलाई ७ मै गोप्य रूपमा इन्गेज्मेन्ट गरिसकेका थिए । यसका साथै जस्टिनले अमेरिकी नागरिकता लिने भएका छन् । जस्टिनको जन्म क्यानाडाको ओन्टारियोमा भएपनि उनी अमेरिकालाई असाध्यै मन पराउँछन् । समाचारमा जनाइए अनुसार जस्टिन विगत ११ वर्षदेखि अमेरिकामै छन् । 

अमेरिकी ¥यापर म्याक मिलरको २६ वर्षकै उमेरमा निधन भएको छ । गत सेप्टेम्बर महिनामा ड्रग्सको ओभरडोजका कारण उनको निधन भएको बताइन्छ । उनलाई क्यालिफोर्नियाको आफ्नै घरमा मृत अवस्थामा फेला पारिएको थियो । 

२५ वर्षीया अमेरिकी गायिका डेमी लोवेटोलाई ड्रग्सको ओभरडोजका कारण अस्पताल भर्ना गर्नु प¥यो । गत सेप्टेम्बर महिनामा अत्यधिक मात्रामा ड्रग्स लिएका कारण उनको स्वास्थ्यमा नकारात्मक प्रभाव परेको थियो । उनी केही वर्षदेखि ड्रग एब्युजसँग संघर्ष गरिरहेकी छिन् । 

अमेरिकी गायिका एरियाना ग्रान्डेले आफ्नो शरीरमा ६० प्रतिशत स्पाम्पेन भएको बताएकी छिन् । डिसेम्बरको पहिलो साता एउटा पत्रिकालाई अन्तरर्वार्ता दिँदै उनले आफू निकै पियक्कड भएको बताएकी थिइन् । एरियानाले आफ्नो नाम नै स्पाम्पेन राखिएको समेत उल्लेख गरेकी छिन् । 

ओस्कार एवाड्समा होस्टको विवाद लामो समयदेखि थियो । अहिले आएर अभिनेता केविन हार्ट विवादमा आएपछि वर्ष २०१९ को ओस्कारको होस्ट कसले गर्ने भन्ने कुराले थप विवाद सिर्जना गरेको छ । हार्टलाई आगामी वर्षको ओस्कारको होस्टका रूपमा छनौट गरिएको थियो, यद्यपि उनी आफ्नो एन्टी–गे ट्विटका कारण विवादमा तानिए । हार्टले सन् २०११ मै उक्त ट्विट गरेका थिए, जसलाई उनले डिलिट गरिसकेका छन् । 

एभेन्जर श्रृंखलाको अन्तिम चलचित्र ‘एभेन्जर ः इन्ड गेम’ को ट्रेलर डिसेम्बर महिनाको पहिलो साता सार्वजनिक भयो । यद्यपि उक्त ट्रेलरले प्रशंसकहरूलाई भने दुःखी बनाएको छ । ट्रेलर नराम्रो भएर प्रसंशकहरू दुःखी भएका होइनन्, ट्रेलर हेरेपछि प्रसंशकहरू भावुक भएका हुन् । उक्त ट्रेलरमा संसारलाई जोगाउने सुपरहिरोलाई नै दुःखी र रोइरहेको देखाइएकाले प्रसंशकहरू दुःखी भएका हुन् । यो ट्रेलरले यूट्युबमा छोटो समयमा सर्वाधिक हेरिएको ट्रेलरका रूपमा कीर्तिमान कायम गरेको छ । 

हलिउडका सुपरस्टार ज्याकी च्यानकी छोरी एटा एन जी आफूभन्दा १२ वर्ष जेठी गर्लफ्रेन्ड एन्डी एटमसँग विवाह गरेपछि चर्चामा आइन् । उनीहरू एक वर्षअघिदेखि प्रेम सम्बन्धमा थिए । उक्त जोडीले विवाहको जानकारी सामाजिक सञ्जालमार्फत गराएको हो । उनीहरूले डिसेम्बरको पहिलो साता क्यानाडामा विवाह गरेको बताइन्छ । एण्डीले इन्स्टाग्राममा उनीहरूको जोडीको तस्बिर शेयर गर्दै लेखेकी छिन्– ‘पत्नी–पत्नीका रूपमा हामी हङकङ आउ“दैछौं । प्रेमले हाम्रो आँखा खोलिदिएको छ । अब मलाई डर छैन ।’ 

क्यालिफोर्नियाको जंगलमा लागेको आगोलाई अमेरिकी इतिहासकै सबैभन्दा भीषण आगलागीको संज्ञा दिइयो । उक्त आगलागीमा करिव ४४ जनाले ज्यान गुमाए भने हलिउडकर्मी जेरार्ड बटलर तथा माईली साइरसले समेत आफ्नो घर गुमाए । हलिउड चलचित्रका अभिनेता बटलरले इन्स्टाग्राममा सम्पूर्ण क्यालिफोर्नियाका लागि उक्त घटना दुःखद भएको उल्लेख गरे । उनले आगो निभेपछि आफ्नो घरको तस्बिर शेयर गरेका थिए । उक्त आगलागीमा गायिका माइली साइरसको घरसमेत ध्वस्त भयो । उनले ट्विट गर्दै आफ्नो घर नष्ट भएको उल्लेख गरिन् । साइरसले लेखेकी छिन्– ‘आगोबाट प्रभावित व्यक्तिहरूका लागि सम्पूर्ण रूपले आहत छु । म खुसी छु, मेरा घर पालुवा जनावर तथा मेरो जीवन जोगिएको छ । मेरा लागि यही नै महत्वपूर्ण कुरा हो ।’ उक्त घटनापछि हलिउड स्टार किम कार्दशियन तथा उनका श्रीमान् कान्ये वेस्टले करिब साढे ३ करोड रुपैया“ आगलागी पीडितका लागि हस्तान्तरण गरेका थिए । 

अमेरिकी र्‍यापर तथा संगीत निर्माता कान्ये वेस्टले आफ्ना नाम परिवर्तन गरेका छन् । उनलाई अब ये नामले चिनिनेछ । कान्येले ट्विट गर्दै आफ्नो नया“ नामका बारेमा जानकारी गराएका हुन् । 

प्रकाशित :पुस १८, २०७५

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्