हनिमुन गन्तव्य

- नरेन्द्र रौले

पुस ११, २०७५

गुगलमा हनिमुन लेखेर टाइप गर्ने हो भने सबैभन्दा धेरै खोजिएका शब्दका रूपमा देखा पर्छन्– हनिमुन डेस्टिनेसन्स, बेस्ट हनिमुन डेस्टिनेसन्स, बेस्ट हनिमुन डेस्टिनेसन्स–२०१८ । विवाह बन्धनमा बाँधिएका जोडीहरू हनिमुनका लागि सुन्दर गन्तव्यको खोजीमा हुन्छन् । स्वदेश होस् वा विदेश, सुन्दर ठाउँ छानेर हनिमुनलाई अविस्मरणीय बनाउने रहर सबैमा हुन्छ । कतिपय नेपालीहरू आफ्नो बजेट अनुसार विदेश नै रोज्छन् । विदेशीहरू पनि हनिमुनका लागि नेपालका विभिन्न ठाउँहरू पुग्छन् ।

 

मनाङ

हिमाल पारीको सुन्दर जिल्ला मनाङको सुन्दरताप्रति स्वदेशी पर्यटक मात्र होइन विदेशीहरू समेत आकर्षित हुन्छन् । संसारको सबैभन्दा अग्लो स्थानमा रहेको तिलिचो ताल, गुम्बा, माने, ताल तथा चाँदीझैं टल्कने हिमालहरूले जोसुकैलाई आकर्षित गर्छ । त्यति मात्र होइन आधा दर्जन हिमालसँगै मनास्लु, लार्के, चियो, पूर्ति हिमाल, तिल्चे पिक, रत्नचुली, हिमलुङका दृश्य हेर्नुको मज्जा शब्दमा बयान गर्न सकिँदैन । मनाङ आसपास र टाढा–टाढाका जिल्लाबाट घुमघामका लागि आउने आन्तरिक पर्यटकहरूको संख्या दिनानुदिन बढ्दैछ । हिजोआज विदेशीहरूले मनास्लु हिमालको काखमा रहेको ४ हजार १ सय मिटरको उचाइमा अवस्थित पोङ्कर ताललाई हनिमुन गन्तव्य बनाउने गरेका छन् । 

पोङ्कर ताल नेपालको नक्सा आकारमा फैलिएको छ । यहाँबाट हिमालका सुन्दर दृश्य नियाल्न सकिन्छ । बिहान सूर्योदयको समयमा सूर्यका किरणहरू तालमा पोखिदाका दृश्य मनमोहक देखिन्छ । त्यही दृश्य हेर्न पर्यटकहरू बिहानै तालमा पुग्छन् । तालसम्म पुग्नुअघि रंगीबिरंगी फूल, पहाड र हिमालका दृश्य एवं झरना अवलोकन गर्न सकिन्छ । खान र बस्नका लागि त्यहाँ होटलको सुविधा छ । लमजुङको सदरमुकाम बेंसीसहर हुँदै मनाङको धारापानी, थोंचे, तिल्चे, भिमथाङ हँुदै पोङ्कर ताल पुग्न सकिन्छ । 

इलाम

झापाको भद्रपुरबाट तीन घण्टा ड्राइभ गरेपछि इलाम पुगिन्छ । यहाँका चियाबारीले धेरैको मन तान्छ । यहाँबाट नेपाल, भारत तथा भुटानका हिमाल हेर्न पाइन्छ । कन्याम, अन्तुडाँडा, माइपोखरी, सन्दकपुर, ढापपोखरी इलामका धेरै घुमिने ठाउँ हुन् । इलाम पुगेपछि लेप्चा, लिम्बू र राई जातिको मौलिक रहनसहन तथा जीवनशैली अवलोकन गर्न सकिन्छ । त्यसैगरी इलाम अदुवा, चिया, अम्रिसो, अलैंची, जडीबुटी, दूध र तरकारीका लागि समेत प्रख्यात छ । इलाममा पर्याप्त होटल तथा रिसोर्ट छन् । 

जिरी

काठमाडौंबाट १ सय ८८ किलोमिटर पूर्वमा रहेको जिरीसम्मको यात्रा रोमाञ्चकारी हुन्छ । नेपालको 

स्विट्जरल्यान्ड भनिने जिरी एकपटक पुग्नै पर्ने पर्यटकीय गन्तव्य हो । यहाँ रैथाने जिरेल समुदायको रहनसहन, शेर्पा जातिको बसोबास तथा स्विस सरकारले गरेको विकास निर्माण हेर्नलायक छन् । जिरी नव–विवाहित जोडीहरूले एकपटक पुग्नै पर्ने ठाउँमध्ये एक हो ।

रारा

काठमाडौंबाट नेपालगन्ज र नेपालगन्जबाट मुगुको ताल्चा विमानस्थल ओर्लिएर केही घण्टा हिँडेपछि रारा पुग्न सकिन्छ । सुर्खेत, दैलेख हुँदै कर्णाली राजमार्गको बाटो भएर निजी तथा सार्वजनिक सवारी साधनमा रारा पुग्न सकिन्छ । मुलुकका प्रमुख सहरहरूबाट अग्रिम बुकिङ गरेर प्याकेजमा रारा घुम्न सक्ने सुविधा उपलब्ध हुन थालेको धेरै भएको छैन । राराको सुन्दरता अवर्णनीय मानिन्छ । यो ताललाई पैदल, घोडा वा साइकलबाट फन्को मार्न सकिन्छ । यहाँ बस्नका लागी होटल तथा रिसोर्टहरूको व्यवस्था छ ।

पोखरा

प्रकृतिको अनुपम नमुना हो— पोखरा । तालतलैया, मन्दिर, चाँदी झै टल्कने हिमाल तथा सांस्कृतिक सम्पदा पोखराका आकर्षण हुन् । पोखराको नाइट लाइफ पनि निकै रमाइलो हुन्छ । गजल– दोहोरी, लाइभ म्युजिक, डिस्को आदिले यहाँ जो–कसैलाई झुमाउँछ । यहाँ साहसिक खेल प्याराग्लाइडिङ, जिप फ्लायर तथा अल्ट्रालाइटको समेत मजा लिन सकिन्छ । पोखरामा भनेजस्ता र सुविधासम्पन्न होटलहरू उपलब्ध हुन्छन् । हनिमुनका लागि पोखरा पहिलो रोजाइमा पर्छ । 

सौराहा

सौराहाको आफ्नै रौनक छ । चाहे पारिवारिक घुमघाम होस् वा हनिमुन, सौराहा निकै चर्चित छ । खासगरी सौराहामा वन्यजन्तुलाई नजिकबाट नियाल्न सकिन्छ । चितवन राष्ट्रिय निकुञ्ज घुम्ने क्रममा विभिन्न जनावर तथा पन्छीहरू अवलोकन गर्न सकिन्छ । हात्ती सफारी, राप्तीमा डुङ्गा सयर, सूर्यास्तको दृश्यवलोकन, थारु संस्कृतिको अवलोकन यहाँका मुख्य आकर्षण हुन् । जाडो महिना सौराहा घुम्न उपयुक्त मौसम पनि हो ।

लोमान्थाङ

विदेशी पर्यटकहरूले अत्यधिक रुचाएको ठाउँ हो— मुस्ताङको लोमान्थाङ । त्यहाँ पुग्न पोखराबाट जोमसोमसम्मका लागि हवाईजहाजको सुविधा छ । त्यसपछि पैदल यात्रा गरेर तीन दिनमा लोमाङथाङ पुगिन्छ । जिपमा जाने हो भने जोमसोमबाट एकै दिनमा पुग्न सकिन्छ । यहाँ खान र बस्न केही महँगो छ । लोमान्थाङमा सुविधासम्पन्न होटलहरूको कमी छैन । यो यात्राका क्रममा मुक्तिनाथको दर्शन एवं  पदयात्रासमेत गर्न सकिन्छ । 

प्रकाशित :पुस ११, २०७५

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्