जन्ती जाँदाको सबैभन्दा रमाइलो क्षण के हो ?

- महेश तिमल्सिना

मंसिर १०, २०७५

म सानै हुँदा इलामको मलबासे भन्ने ठाउँमा जन्ती गएको थिएँ । त्यहाँ मेरो मामाको विवाह थियो । सिद्धीथुम्काबाट त्यहाँसम्म पुग्न करिब ५ घण्टा हिँड्नुपथ्र्यो, जसले गर्दा निकै भोक लागेको थियो । खेतको आलीमा हामी सबैजना टपरीमा भात लिँदै बस्यौं । त्यसपछि मासुको झोल हालिदिए । मासुको सबै झोल टपरीबाट चुुहियो भने चोक्टा एउटा पनि थिएन । अन्तिममा भात मात्र खाएर रातभर नाचियो ।

श्रीदेव भट्टराई, अभिनेता 

तीन वर्षअघि झापामा जन्ती जाँदा बेहुली पक्षका केटीहरूलाई जिस्क्याउँदा निकै मज्जा 

आएको थियो । 

कविर खड्का, मोडल 

केहि समय अघि सर्लाहीको एउटा बिहेमा जन्ती गएको थिएँ । त्यहाँ साथीहरूलाई भ्यागुताको माला लगाइदिएर स्वागत गरेको देख्दा निकै हाँसिएको थियो । 

शिव परियार, गायक 

२०६९ सालको कुरा हो साथी रोशन शर्माको विवाहमा सालीहरूले बेहुलाको जुत्ता लुकाइदिँदा बेहुला पक्षले पैसा दिने मानेनन् । अन्तत: बेहुलाले खाली खुट्टा फर्कनुपर्‍यो । 

खुमन अधिकारी, गायक 

म ६–७ वर्षको थिएँ होला । एक जना काकाको विवाहमा जन्ती जाँदा टपरीमा दाल–भात, एक चम्चा घिउ अनि एक कोसा केरा दिइएको थियो । भोकको झोंकमा त्यो रित्याएको पत्तै भएन । 

राजनराज शिवाकोटी, गायक तथा संगीतकार

केहि समयअघि मात्र मामाको विवाहमा नाच्दा मेरो स्यान्डल नै च्यातियो । त्यसपछि मैले बेहुलाले मण्डपमा लगाउने जुत्ता लगाएर नाचेँ । त्यो पल मेरा लागि अविस्मरणीय छ । 

पूजन घिमिरे, मोडल 

बसको छतमा चढ्ने, केटी पक्षकहाँ पुग्नासाथ हल्का भोजन गरेर आफ्नो ग्याङसँग घुम्न जाने र दुलही अन्माउने बेलामा टुप्लुक्क आइपुग्ने क्षणहरूसम्झँदा अहिले पनि आनन्द लाग्छ । 

सन्तोष खनाल, कलाकार

अहिले त जन्ती जाँदा त्यति उत्सुकता हुँदैन । बाल्यकालमा गाउँमै छँदा बेहुला पक्ष र बेहुली पक्षबीचमा लामो सेतो कपडा यता उता तान्ने र कसले जित्ने भन्ने हुन्थ्यो, जुन मलाई एकदमै रमाइलो लाग्थ्यो । त्यही तानातान गर्ने क्रममा एकपटक बेहुलीतर्फकाले जानाजान छाडिदिनुभयो कि नसकेर छाडिदिनुभयो थाहा भएन, तर हामी सबै हुत्तिएर कान्लामुनि खस्यौं । त्यतिबेला कसैलाई पनि ठूलो चोट त लागेन तर सबै हाँस्न थाले । हामीलाई भने कान्लामुनि झरेको पिडा 

भन्दा पनि आफूले जितेकोमा खुसी थियो । 

महेन्द्र गौतम, मोडल 

अलि ठूली भएपछिको कुरा हो । एकजना दाइको विवाहमा चितवन जन्ती जाँदा कुर्ता सुरुवालसँग मिल्ने अग्लो हिल जुत्ता लगाएर गएकी थिएँ । हामी बसदेखि नै रमाइलो गर्दै नाच्दै गाउँदै गैरहेका थियौं । बेहुलीको घरमा पुगेको एकछिन पछि यताउता गर्ने क्रममा जुत्ताको हिल नै भाँचियो । त्यहाँ वरिपरि कतै जुत्ता मर्मत गराउने ठाउँ थिएन, त्यसपछि म लाजले भुतुक्क हुँदै गाडीमै बसिरहेँ । 

शोभिता सिंखडा, मोडल तथा लेखक 

त्यस्तै ८–९ वर्ष हुँदाको कुरा हो । म पहाडबाट पहिलोपटक तराई जन्ती गएको थिएँ । बेहुलीको घर पुग्दा रात परीसकेको थियो । बिहान उठेर नित्य कर्म गर्ने क्रममा त्यहाँ ट्वाइलेट नभएर हो कि सबै जन्तीलाई पालो नआउने भएर हो, केटाकेटीहरू खेततिर जाओ भन्ने उर्दी पाइयो । खेतमा जाँदा जसरी भत्तेर खान लाइन बस्छन्, त्यसरी नै सबै लाज नमानी लाइन बसेर दिसा–पिसाब गरेको देख्दा लाजले मर्नु भयो । मचाहिँ गोप्य ठाउँको खोजीमा लागें तर केही सीप नलागेपछि मैले पनि लाइनमै बसेर आफ्नो काम फत्ते गरें ।

एकनारायण भण्डारी, गीतकार तथा संगीतकार 

केही वर्ष पहिले निजगढबाट दक्षिणतर्फको एउटा गाउँमा साथीको विवाहमा जन्ती जाँदा रमाइलो घटना भएको थियो । हामी जन्ती बेहुलीको घरभन्दा अलिकति यताबाट साइपाटा लिएर गयौं तर बेहुलीको घरमा पुग्दा त्यहाँ विवाहको कुनै सुरसार देखिएन । सबै गाउँले हामीलाई देखेर छक्क परे । खास विवाह चाहिँ पर्सिपल्ट रहेछ हामीचाहिं एकदिन अघि नै पुगेछौं । त्यसपछि हामी त्यो साइपाटा जबर्जस्ती त्यहीं राखेर दुई रात परालमा सुती पर्सिपल्ट त्यहीँबाट जन्ती गयौं । 

शिवहरि पौडेल, हास्यकलाकार 

चार वर्ष अघि विराटनगरको साथीको भाईको विवाहमा जन्ती गएको थिएँ । म काठमाडौंबाट विहान विराटनगर पुगेको थिएँ । बेहुलीतर्फको छिमेकमा अरू पनि विवाह रहेछ । भोक निकै लागेको हुँदा मैले सरासर गएर पहिले खाना खाएँ । त्यसपछि बेहुला–बेहुलीलाई भेट्छु भनेर जाँदा त अर्कैैको विवाहमा पो पुगेको रहेछु । 

सविन श्रेष्ठ, अभिनेता 

पाँच वर्षअघि साथीको विवाहमा जन्ती जाँदा मेरो ५० हजार रुपैयाँ नगद चोरी भएको थियो । 

धीरज राई, गायक

 

प्रकाशित :मंसिर १०, २०७५

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्