मटन कबाब

- साप्ताहिक संवाददाता

कार्तिक १, २०७५

नेपालमा खाइने र भारतमा खाइने मटन कबाबको बनावटदेखि स्वादसमेत फरक छ । नेपालमा मटन कबाब चोक्टामा हुन्छ भने भारतमा पकौडा स्टाइलको मटन कबाब तयार पारिन्छ । भारतमा पाइने मटन कबाबलाई कसै–कसैले मटन किमा कबाब पनि भन्छन् । यो परिकार तयार गर्न सबैभन्दा पहिले खसीको मासुको किमा बनाउने । 

कराहीमा घ्यू तताउने, घ्यू तातेपछि जिरा, सुकेको खुर्सानी, अदुवा तथा लसुनको टुक्रा हालेर पकाउने । लसुन र अदुवा खैरो भएपछि ठिक्कको टुक्रा पारिएको प्याज पनि हाल्ने र २ मिनेट चलाउँदै पकाउने । त्यसपछि मटनको किमालाई पनि त्यसैमा हालेर चलाउँदै पकाउने । नुन हाल्ने र सबै कुरा राम्रोसँग मिल्ने गरी चलाउने । उक्त किमालाई छोपेर १० मिनेटजति पकाउने । मासुमा रहेको पानी सुकाएर लगभग ९० प्रतिशत पकाउने । यसरी पकाइएको मासु सेलाएपछि त्यसमा धनियाँको पात, बाबरी तथा कागतीको रस हालेर ब्लेन्ड गर्ने । 

प्यानमा थोरै तेल हालेर तताउने । ब्लेन्ड गरिएको मासुको किमालाई हातले थिचेर पकौडाको सेप दिने । अर्को कचौरामा २ वटा अन्डा फिटेर राख्ने । पकौडाको सेपमा आएको मटनलाई अन्डाको घोलमा डुबाएर कराईमा फ्राई गर्ने । दुवैतर्फको भाग रातो भएपछि झिकेर धनियाँ वा बाबरीको अचारमा चोपेर खाने । 

प्रकाशित :कार्तिक १, २०७५

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्