हिरोको भन्दा मेरो क्रेज छ

  •  रेखा थापा, अभिनेत्री

- रामजी ज्ञवाली

भाद्र २१, २०७५

 

रेखा थापा यो संसारमा नभएकी भए के हुन्थ्यो होला ?

खै, भगवान्सँग एकपटक अन्तर्वार्ता लिनुस् न, थाहा भैहाल्छ नि ।

संसारमा भगवान् छन् र ?

किन नहुनु ? छन् । हाम्रो आत्माभित्र छन् भगवान् । हामीलाई निरन्तर हेरिरहेका छन् ।

भगवान् फेला परेर कुनै एउटा कुरा माग्नुपर्‍यो भने ?

भगवान्सँग माग्ने बानी खासै छैन । कतै फेला परिहाले एउटै कुरा भन्नेछु— थ्यांक्स फर एभरिथिङ ।

चलचित्रमा नलागेको भए ?

म कहिल्यै विकल्प बोकेर हिँड्ने मान्छे होइन, त्यसैले यो प्रश्न सोध्नु नै बेकार छ ।

कहिलेकाहीं केटा मान्छे भएर जन्मिएको भए हिरो बन्न पाइन्थ्यो भन्ने लाग्दैन ?

हाहा.., तपाईंहरूलाई थाहै होला, म कमान्डिङ रोलमै अभिनय गरिरहेकी छु । एक हिसाबले म हिरो नै हो । हिरो भनिनेहरूले मभन्दा कम चर्चा पाउँछन् ।

 

३७ वर्ष पुगिसक्दा पनि विवाह गर्ने छाँटकाट छैन, किन हो ?

खुरु–खुरु काम गरिरहेकी छु, दर्शकका लागि चलचित्र दिइरहेकी छु । समय हुँदा समाजसेवामा पनि क्रियाशील छु । अहिले नै हतार नगरौं क्यारे !

उमेरले नेटो काट्दै जाला, बूढीकन्या भन्लान् नि ?

कसले के भन्छ भन्ने कुरामा म खासै चिन्ता लिन्नँ ।

होइन, बेलामा विवाह नगरेर पछि बूढीकन्या भएर केटा नपाइएला नि ?

यो विषयमा तपाईलाई किन चिन्ता ? विवाह नै गरोस् भन्ने चाहना हो भने खोजिदिनु नि राम्रो मान्छे ।

त्यसो भए विवाह नहुने सम्भावना पनि छ, होइन त ?

विवाह नहोला भन्ने त छैन, तर कहिले हुन्छ भन्ने कुरा पनि पक्का भैसकेको छैन । मलाई यति मात्र थाहा छ, मेरो विवाहचाहिँ हुन्छ ।

आजभोलि खासै चलचित्र चल्दैनन्, कहिलेकाहीं बाटो परिवर्तन गरौं भन्ने लाग्दैन ?

रेखा थापा १८ वर्षदेखि निरन्तर यो क्षेत्रमा क्रियाशील छे । हरेक वर्ष मेरो एउटा न एउटा चलचित्र आएकै छ । नाम, दाम र दर्शकको अथाह माया पाएकी छु, त्यस्तो सोच त कहिल्यै आएन र भोलिका दिनमा पनि आउँदैन ।

लङ ट्वाइलेटपछि धारामा पानी भएन भने ?

हाहाहा...त्यसको कुनै पनि विकल्प निस्कन्थ्यो होला, तर मैले अहिलेसम्म त्यस्तो अनुभव गर्न पाएकी छैन ।

मान्छेले खाना किन खान्छ ?

भोक लागेर नि !

यो संसारमा अन्न नभएको भए मानिसहरू के खाएर बाँच्थे होला ?

हावा खाएर बाँच्थे होला ।

बाटोमा हिँडिरहेका बेला युवाहरूले कत्तिको आँखा झिम्काउँछन् ?

म खासै पैदल हिँड्दिनँ । हिँडिहाले भने पनि सेल्फी खिच्न मात्र आउँछन् । आँखा झिम्क्याए त भेटिहाल्छन् नि !

 

प्रकाशित :भाद्र २१, २०७५

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्