नेपाली भाषा स्विट लाग्छ

  • दीपशिखा मिश्र, गायिका

- साप्ताहिक संवाददाता

श्रावण २१, २०७५

भारतको उडिसाकी लोकप्रिय गायिका नेपाली संगीतमा कसरी आकर्षित हुनुभयो

म झन्डै १२ वर्षदेखि वीरगन्जमा छु । नेपालमा रहँदा आफूले जानेको गायन कलालाई निरन्तरता दिनुपर्छ भन्ने लागेर नेपाली गीत गाउन थालेकी हुँ । 

गायनमा सक्रिय भएको कति भयो ? 

मैले छ वर्षको उमेरमा पहिलो पटक अल इन्डिया रेडियोमा भक्ति संगीतमा आधारित गीत रेकर्ड गराएकी थिएँ । त्यसयता मैले नेपाली, हिन्दी, उडिया, बाङ्ला तथा संस्कृत भाषाका गरी झन्डै १ सयभन्दा बढी गीत रेकर्ड गराइसकें । 

नेपाली गीत गाउने अवसर कसरी पाउनुभयो ? 

केही वर्षअघि वीरगन्जमा आयोजित एउटा सांस्कृतिक कार्यक्रममा गायिका अञ्जु पन्तको ‘न बिर्सें तिमीलाई...’ गाउँदा दर्शकबाट पाएको उत्साहजनक प्रतिक्रियाले नै मलाई नेपाली गीत गाउन प्रेरित गरेको हो । 

तपाईंले गाएका नेपाली गीत कस्ता छन् ? 

मैले हालसम्म सात वटा नेपाली गीत रेकर्ड गराएकी छु । अधिकांश गीत सुगम संगीतमा आधारित छन् । रमेश परियार, राजन तिमिल्सिना, हरि लम्साल आदि संगीतकारका कम्पोजमा गाउने मौका पाएकी छु । मेरा केही गीत युट्युबमा समेत उपलब्ध छन् । 

उडिया भाषाकी गायिकालाई नेपाली गीत गाउन कत्तिको गार्‍हो भयो ? 

मलाई त नेपाली भाषा बंगाली, उडिया र संस्कृति भाषाको सम्मिश्रण जस्तो लाग्यो । बंगाली जत्तिकै स्विट छ नेपाली भाषा । यस्तो मीठो भाषामा गीत गाउन पाउँदा असहज महसुस हुने कुरै भएन । 

नयाँ के गर्दै हुनुहुन्छ ? 

संगीतकार हरि लम्सालको संगीतमा निकट भविष्यमै ‘खुसी हुँदा...’ गीत लिएर आउँदैछु । त्यसपछि संगीतकार किरण कँडेलको संगीतमा पनि गाउँदैछु । नेपाली भाषाका गीतको एल्बम नै प्रकाशित गर्ने योजना छ । काठमाडौं तथा वीरगन्जमा आयोजना हुने सांगीतिक कार्यक्रममा नियमित रूपमा सहभागिता जनाइरहेकी छु । 

प्रकाशित :श्रावण २१, २०७५

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्