मिनी ब्राजिलमा अर्जेन्टिनाको क्रेज

- नवराज विष्ट

असार १३, २०७५

धरान नेपाली फुटबलको महत्वपूर्ण केन्द्र हो । धरानका प्रत्येक वडामा २ भन्दा बढी संस्थागत फुटबल क्लब छन्, जसले नियमित रुपमा फुटबलका प्रतियोगिता गर्छन् । त्यसबाहेक पत्रकार, कलाकार, बैंकर्स, डाक्टर्स, सहकारीकर्मी, जेसिज, व्यापारिक प्रतिष्ठान, यातायात व्यवसायीका आ–आफ्नै क्लब छन् । यी क्लबहरूबीच प्रतियोगिताहरू पनि भैरहन्छन् । फुटबलमा यति क्रेज भएपछि विश्वकपको रन्कोले यो सहरलाई नछुने कुरै भएन । 

ब्राजिलका अधिक फ्यान र ब्राजिलकै जस्तै फुटबल संस्कृति भएका कारण पनि धरानलाई मिनी ब्राजिलका रूपमा व्याख्या गरिन्छ । यद्यपि प्रत्येक विश्वकपसँगै धरानेहरूको रुचि पनि परिवर्तन भैरहन्छ । यसपटक पनि विश्वकपमा सहभागी सबै देशका समर्थक धरानमा फेला पर्छन् । तथापि ब्राजिल, अर्जेन्टिना, जर्मनी, फ्रान्स, स्पेन, इंग्ल्यान्ड तथा पोर्चुगलका फ्यान बढी छन् । 

अघिपछि मोटर साइकलका लस्कर, प्रत्येक मोटर साइकलमा अर्जेन्टिनाको झन्डा, शरीरमा अर्जेन्टिनी जर्सी र सपोर्टर अर्जेन्टिनाको । यो माहोल हो अर्जेन्टिना समर्थकको । ‘हामीलाई एकअर्काको समय मिलाउन गाह्रो छ । तपार्इंहरूको यो महत्वपूर्ण समयका लागि धन्यवाद । हामी सधैं अर्जेन्टिनासँगै छौ । चाहे उसको जित होस् वा हार–तनाव विश्वकपको ।’ हूल बाँधेर भेडेटार उक्लिरहेका धिरेन लिम्बू र साथीहरूले सामाजिक संजालमा पोखेको अभिव्यक्ति यस्तै छ । यो समूहमा धराने फुटवलर धिरेनसंगै लोकेश, लोकमान, राजन, अरुन, सागर तथा भरत छन् । 

अघिल्ला विश्वकपमा स्काइ क्लब निर्माण गरेर ब्राजिललाई समर्थन गरेका युवा व्यवसायी सुमन श्रेष्ठ यसपटक पनि ब्राजिलका समर्थक हुन् । उनले अघिल्लो विश्वकपमा आफ्नै लगानीमा ब्राजिलका समर्थकहरूलाई जर्सी उपहार दिएर स्काइ क्लब निर्माण गरेका थिए । उनको समूहमा बिकी, मनु, दिनेश, निरज आदि युवा छन् । यता नियमित रूपमा फुटसल खेलिरहेका मानबहादुर मगर व्यक्तिगत रूपमा जापानलाई समर्थन गर्छन् । उनले जापानको जर्सीसमेत किनेका छन् । धरानको मिडिया स्पोर्टिङ क्लबका खेलाडीबीच पनि विश्वकपमा कसलाई समर्थन गर्ने भन्ने विषयमा एकता छैन । क्लबका सचिव विकास चाम्लिङ राई ब्राजिलका समर्थक हुन् भने धरान फुटबल क्लबका अध्यक्ष समेत रहेका अखिल नेपाल फुटबल संघ (एन्फा) का मानार्थ उपाध्यक्ष किशोर राई अर्जेन्टिनाका समर्थक हुन् ।

विश्वकपको 

स्वागतमा प्रतियोगिता

धरानका विभिन्न स्थानमा विश्वकपको स्वागत तथा स्थानीय खेलाडीहरूबीच मेलमिलाप बढाउने उद्देश्यले मैत्रीपूर्ण खेलको आयोजना गरिन्छ । हालै धरानस्थित बूढासुब्बा फुटसल क्लबले विश्वकप–२०१८ लाई स्वागत गर्दै मैत्रीपूर्ण भालेकपको आयोजना गर्‍यो । 

नेपालभरि नै अर्जेन्टिनाका फ्यान बढी भएको बताउने गोधूलि क्लब धरानका अध्यक्ष सतिश केसी धरानमा अर्जेन्टिनाको क्रेज बढी भएको दाबी गर्छन् । नियमित फुटबल खेल्दै आएका बीपी कोइराला स्वास्थ्य विज्ञान प्रतिष्ठानका आवासीय चिकित्सकहरू पनि विश्वकपको तापबाट टाढा छैनन् । यो विश्वकपले चिकित्सकहरूबीच पनि भेटघाटको बहाना जुटाइदिएको डा.जीवन धमला बताउँछन् । 

‘ड्युटीका कारण डाक्टरहरूबीच नै भेटघाट हुन गार्‍हो थियो, अहिले ठ्याक्कै योजना बनाई नसके पनि यो अवसरलाई सदुपयोग गर्छौँ’, डा. धमला भन्छन्, ‘सम्भव भएसम्म साथीहरूसँग बसेर गेम हेर्ने योजना छ ।’ 

चोकचोकमा प्रोजेक्टर

धरानका विभिन्न स्थानमा विश्वकप–२०१८ को प्रत्यक्ष प्रसारण देखाउन क्लबहरूले प्रोजेक्टरको व्यवस्था गरेका छन् । धरानका बुद्ध चोक, शिवमार्ग, बूढासुब्बा चोक, विजयपुर चोक, अन्नपूर्ण चोक, जिरोप्वाइन्ट, वरगाछी, जानकी चोक आदिमा प्रोजेक्टरका माध्यमद्वारा ठूलो पर्दामा फुटबल देखाइँदैछ । क्लबले मात्र होइन धरानका केही ठूला होटलले समेत यसलाई व्यवसायको माध्यम बनाउँदै छन् । होटल इजी राइडर्सले होटलमै ठूलो पर्दाको व्यवस्था गरेको छ । होटलमा आगन्तुकले निशुल्क फुटबल हेर्न सक्ने होटलका प्रबन्ध निर्देशक लोक खापुङले बताए । धरानकै होटल भिन्टेज, टेन्ज बार, होटल सेवारो तथा धरानको पर्यटकीय केन्द्र बगरकोटका अधिकांश होटलले विश्वकप फुटबल देखाउन ठूलो पर्दाको व्यवस्था मिलाएका छन् ।

प्रकाशित :असार १३, २०७५

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्