उपहार पर्‍यो भन्दै ठगी गर्ने बढे

- राजाराम पौडेल

वैशाख २३, २०७५

 

सामाजिक सञ्जाल प्रयोग गर्नेहरूको संख्या जुन अनुपातमा बढ्दै गएको छ, सोही अनुपातमा सामाजिक सञ्जाल प्रयोग गर्ने लत लागेका प्रयोगकर्तामार्फत फाइदा लुट्नेहरू पनि बढ्दै गएका छन् । विशेष गरी इमो, भाइबर, फेसबुक म्यासेन्जर आदि सामाजिक सञ्जालप्रयोग गर्ने प्रयोगकर्तालाई उपहार पर्‍यो भन्दै ठगिएका घटना सार्वजनिक हुन थालेका छन् । यसरी ठगीमा संलग्न भएको आरोपमा कास्की प्रहरीले नौ जनालाई पक्राउसमेत गरेको छ । विभिन्न तीन घटनामा संलग्न रहेको अभियोगमा उनीहरूलाई पक्राउ गरिएको कास्कीका प्रहरी प्रमुख एसपी अशोक सिंहले जनाए । 

सिंहका अनुसार उनीहरूले सामाजिक सञ्जालबाट कास्कीका साथै कास्कीका केही छिमेकी जिल्लाका विभिन्न व्यक्तिलाई भाइबर, ईमो तथा फेसबुक म्यासेन्जरमार्फत चिट्ठा पर्‍यो भन्दै ठगी गरेका थिए । उनीहरूले इमो तथा भाइबरबाट २५ लाख रुपैयाँको चिट्ठा पर्‍यो, तपाईंका छोराछोरी तथा तपाईंको परिवारलाइ सुन तथा नगद पठाएको छु भन्दै १ करोड ३९ लाख रुपैयाँभन्दा बढी ठगी गरेको आरोप छ । उनीहरूलाई नगद २ लाख १ हजार रुपैयाँसहित प्रदेश प्रहरी कार्यालय तथा जिल्ला प्रहरी कार्यालयको सयुक्त टोलीले पोखरा, पाल्पा तथा धनुषा प्रहरीको सहयोगमा धनुषाबाट पक्राउ गरेको हो । उनीहरूबाट ८८ जना भन्दा बढी ठगिएको एसपी सिंहले बताए । 

घटना नम्बर–१

करिब डेढ वर्षअघिदेखी कास्की जिल्ला पोखरा लेखनाथ महानगरपालिका वडा नम्बर–१७ घारीपाटन बस्ने वर्ष ३३ की तारा देवी गुरुङलाई बेलायतका नागरिक क्लेमेन्ट मार्क एन्थोनी पावाले म्यासेन्जरमार्फत तिमी र तिम्रा छोरा–छोरीका लागि सामानहरूसँगै पैसा पठाइदिएको छु, सामान भारत पुगेर रोकिएको छ, तपाईंको ट्याक्स क्लियर छैन, बोर्डरमा राजस्व लाग्ने भयो, म सामान निकाल्न आउने क्रममा थुनामा परेको छु भन्दै पटक–पटक फोन आउँछ । त्यसपछि उनले पाल्पा जिल्ला निस्दी गाउँपालिका बडा नम्बर–७ ज्यामिरे बस्ने वर्ष २६ का याम रानामगरको बैक अफ काठमाडांैको खातामा पैसा पठाउँछिन् । 

त्यसपछि उताबाट कुनै सम्पर्क नगरिएपछि उनलाई आफू ठगिएको थाहा हुन्छ अनि उनले जिल्ला प्रहरी कार्यालय कास्कीमा पुगेर निवेदन दिन्छिन् । निवेदनको फलोअप गर्दै जाने क्रममा यामलाई पाल्पा जिल्ला निस्दी गाउँपालिका बडा नम्बर– ७ ज्यामिरेबाट चैत १ गते पक्राउ गरिएको हो । पक्राउ परेपछि रानाले उक्त कामका लागि पहिले भारतको होटलमा आफूसँगै काम गर्ने दार्जीलिङ घर बताउने अन्दाजी वर्ष ३६ का अरुण राईले खाता खोल्न लगाई मेरो पैसा आउँदै छ भनी फोन गरेको र आफूले निजले भने बमोजिम खाता खोलेको बताए । आफ्नो खातामा १२ लाख रुपैयाँ आएको र उक्त रकम निज अरुण राई भन्ने व्यक्ति घरमै आएर लगेको रानाले जानकारी दिए । त्यसबापत यामले पचास हजार रुपैयाँ प्राप्त गरेका थिए । याम राना मगरले दिएको बयानका आधारमा प्रहरीले अरुण राई भन्ने व्यक्तिको खोजतलास गरी निजको गिरफ्तारीका लागि आवश्यक समन्वय गरिरहेको छ । 

घटना नम्बर– २

कास्की तथा अन्य विभिन्न जिल्लाका ८८ जना व्यक्तिलाई इमोबाट तपाईंलाई २५ लाखको चिठ्ठा परेको छ भन्दै ठगिन्छ । उनीहरूले चिठ्ठाको रकम लिन ट्याक्स क्लियर गर्नुपर्छ, बोर्डरमा राजस्व लाग्ने भयो भन्दै विभिन्न बहानामा ठगी गर्छन् । चिठ्ठाबापत मनग्गे फाइदा हुने भो भन्दै सोझासाझा मानिसहरू ठगले भनेबमोजिमको रकम तिर्न तयार हुन्छन् । यसरी ठगी गरेको आरोपमा पोखरा लेखनाथ महानगरपालिकाका बिभिन्न स्थानबाट पाँच जनालाई पक्राउ गरिएको छ । पक्राउ पर्नेमा धादिङ जिल्ला नेत्रवती गाउँपालिका वडा नम्बर–१ वस्ने वर्ष २८ का ठाकुर गुरुङ, सोही ठाउँ बस्ने वर्ष २८ का गणेश गुरुङ तथा वर्ष १९ का मनोज तामाङ, धादिङ जिल्लाकै खनियावास गाउँपालिका वडा नम्बर–५ बस्ने वर्ष २६ का टेकबहादुर तामाङ एवं सोही ठाउँका वर्ष २४ का जेनिस तामाङ छन् । 

उनीहरूले प्रहरीसमक्ष कैलाली घर भै काठमाडौंमा बसाइँ सरी हाल साउदी अरबमा रहेका नरेश राउतसँगको सम्पर्क एवं चिनजानका आधारमा उक्त कार्य गरेको बताएका छन् । उनीहरूले राउतसँग बारम्बार म्यासेन्जरमार्फत कुरा गर्दै ठगीलाई अन्जाम दिन्थे । नरेश राउतले एउटा काम आएको छ कमाइ राम्रै हुन्छ, विदेशमा भएको कालो धनलाई नेपाल पुर्‍याई सेतो बनाउने हो, यसमा कुनै झमेल हुँदैन भनेर उनीहरूलाई त्यसका लागि तयार गरेका थिए । काम भनेको विभिन्न मनि ट्रान्सफरबाट पैसा झिक्ने र भनेको ठाउँमा भनेबमोजिम पठाउने भएको उसले बताउँछ । 

उनीहरूले ह्वाट्सएपमार्फत नरेश राउतले दिएको आदेशबमोजिम पैसा निकाल्ने र निजले भनेबमोजिम भनेकै व्यक्ति र ठाउँमा रकम पठाउने काम गर्थे । उनीहरूलाई मासिक ३० हजार रुपैयाँ तलब तथा प्रत्येक पटक रकम निकालेबापत २ हजार दिने सहमति थियो । कमाइ रामै्र हुने भएपछि उनीहरूले नरेश राउतले भनेबमोजिम पोखरा, काठमाडौं, चितवन, बुटवल तथा धादिङमा गै पैसा निकालेका थिए । उनीहरूले काम सुरु गरेको फागुन १० गतेदेखि पक्राउ हुनुपूर्व चैत २ गतेसम्म ८० जना विभिन्न व्यक्तिको नाममा आएको ३९ लाख ३७ हजार ३ सय रुपैयाँ निकाली २८ जनाको नाममा विभिन्न ठाउँमा पठाएको समेत बताएका छन् । उनीहरूले उक्त पैसा कहाँबाट आएको हो, कुन प्रयोजनका लागि आएको हो, त्यो कस्तो पैसा हो भन्ने विषयमा आफूलाई केही थाहा नभएको बरु बेरोजगार भएकाले केही पैसा कमाउन त्यस्तो कार्य गरेको बयान प्रहरीसमक्ष दिएका छन् । 

घटना नम्बर–३

घटना नम्बर–२ मा पक्राउ परेकाहरूसँगको अनुसन्धानका क्रममा उनीहरूले साउदी अरबमा रहेका नरेश राउतले भनेबमोजिम पैसा झिकी विभिन्न ठाउँमा पठाउने गरेको बताए । यसरी रकम पठाउने क्रममा प्राय:जसो रकम जनकपुर पठाइएको अनुसन्धानबाट खुलेको छ । नरेश राउतले घनुषास्थित संगिता मिश्रको नाममा पैसा पठाउने भनेपछि प्रहरीले नै पैसा पठाई घनुषा प्रहरीको सहयोगमा संगिता मिश्र र निजसँगै रहेकी कामिनी तिवारीलाई नियन्त्रणमा लिएको थियो । संगीता मिश्रले उक्त कार्य गर्न योगेन्द्र तिवारीले अर्‍हाएको बताइन् । जलेश्वर नगरपालिका वडा नम्बर–६, महोत्तरी बस्ने वर्ष २४ की संगीता मिश्र, महोत्तरीकै वर्ष ३५ की कामिनी तिवारी तथा वर्ष ४५ का योगेन्द्र तिवारीलाई चैत २ गते धनुषा प्रहरीको सहयोगमा पक्राउ गरिएको छ । कामिनी योगेन्द्रकी श्रीमती हुन् । 

यी तीनवटै घटनामा पक्राउ परेका नौ जनालाई ठगी मुद्दामा कास्की जिल्ला अदालतबाट म्याद थप गरी थप अनुसन्धान भैरहेको कास्कीका प्रहरी प्रवत्ता खड्कबहादुर खत्रीले बताए । ठगी कार्यमा संलग्न अन्य केहीको खोजी भैरहेको प्रहरीले जनाएको छ । पक्राउ पर्नेहरूले एक जनासँग ७५ हजार देखि ३ लाख रुपैयाँसम्म ठगी गरेको पाइएको छ । 

सामाजिक सञ्जालमार्फत लट्री आतंक 

इलाका प्रहरी कार्यालय, बेलबारीले लट्री पर्‍यो भन्दै ठगी गर्ने गिरोहका दुई जनालाई बेलवारी बजारबाट पक्राउ गरेको छ । पक्राउ पर्नेमा बेलबारी–१ की प्रतीमा भुजेल तथा झापा बाह्रदर्शी गाउँपालिका वडा नम्बर–६ का भोलाराज भुजेल छन् । महेन्द्ररत्न क्याम्पस ताहाचलमा अध्ययनरत काठमाडांै, कीर्तिपुरकी एक छात्रालाई भाइबरमार्फत हिन्दी भाषामा बधाई दिइयो । किन बधाई भन्ने ती युवतीको प्रश्नमा उताबाट भनियो– आपका एनसेल कम्पनीका नम्बर है, एनसेल मलेसियन कम्पनी है । वही मलेसियन कम्पनीका लट्री ड्रमे आपको बहुत बडा इनाम मिला है । 

त्यसको केही दिनमै ती युवतीसँग बैंकको खाता नम्बर मागियो र उक्त खाता एक्टिभ गर्न ५० हजार रुपैयाँ आवश्यक पर्ने भएकाले रेमिटमार्फत बेलबारीकी प्रतिमा भुजेललाई उक्त रकम पठाउन भनिएपछि ती युवतीले पनि सोहीअनुरुप फागुन ६ गते पैसा पठाइन् । त्यसको केही दिनमा पुन: काठमाडौंकी ती युवतीलाई १ लाख ५० हजार रुपैयाँ फेरि पठाउन भनियो र त्यो पैसा पठाए मात्र २५ लाख रुपैयाँ प्राप्त हुने भन्दै विदेशको नम्बरबाट अर्को फोन आयो । 

फोन भने प्रतिमाले नभै अन्य व्यक्तिले नै गर्ने गरेको प्रहरी अनुसन्धानबाट खुलेको इलाका प्रहरी कार्यालय बेलबारीकी प्रमुख रामजी कट्वाल बताउँछन् । ती महिलालाई शंका लागेपछि उनले छिमेकीलाई भनिन् र छिमेकीले ठगीएको बताएपछि उनि प्रहरीकहाँ पुगिन् । प्रहरीकै सल्लाहअनुसार ती युवतीले प्रतिमालाई डेढ लाख रुपैयाँ नै पठाइदिँदैछु, रेमिटमा गएर लिनु भनिन् । प्रहरीसँग उनको कुराकानी हुँदै गयो । प्रतिमा पैसा निकाल्न रेमिटमा पुगेका बेला प्रतिमा र भोलाराजलाई नियन्त्रणमा लिइएको प्रमुख कट्वालले बताए ।

 

त्यसैगरी सोहि समूहबाट ताप्लेजुङका सन्तबहादुर लिम्बू तथा उनकी श्रीमती पनि ठगीएका छन् । सन्तबहादुरले ४० हजार रुपैयाँ बुझाएका थिए भने उनकी श्रीमतीले २० हजार रुपैयाँ बुझाएकी थिइन् । प्रतिमा र भोजराजको घरमा छापा मार्ने क्रममा १ लाख ४ हजार नगद तथा बैंक भौचरहरू फेला परेको प्रहरीले जनाएको छ । अनुसन्धानका क्रममा भारतको एउटा कम्युनिकेसनको नाममा विराटनगरको सीमावर्ती सहर जोगबनीबाट एस.बी.आई. बैंकको खातामा पटक–पटक गरेर ४ लाख नगद पठाइएको समेत पत्ता लागेको थियो । सामाजिक संजाल ह्वाट्सएप, इमो, भाइबर, फेसबुकजस्ता सामाजिक सञ्जाल एवं फोनमार्फत २५ लाख रुपैयाँको लट्री जित्नुभएको छ भनी फोन तथा एसएमएसबाट बधाई दिने र त्यसपछि उनीहरूले सोही सामाजिक सञ्जालमार्फत चिट्ठाको रकम निकाल्न कर क्लिरियन्सजस्ता कामको बहाना बनाई रेमिटमार्फत पैसा माग्ने गरिएको प्रहरी बताउँछ । 

                                                                                                                  -विवेक मिश्र

प्रकाशित :वैशाख २३, २०७५

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्