अभिनेत्रीकै रूपमा चिनिन चाहन्छु

  • एलिजा गौतम धमला, अभिनेत्री

- कृष्ण भट्टराई

चैत्र २२, २०७४

चैत ११ गते जन्मदिन मनाउनुभएछ, कति वर्ष लाग्नुभयो ? 

उमेरचाहिं नभनौं कि ? 

बर्थ डे पार्टी त पत्रकार सम्मेलन जस्तो भयो भनिन्छ नि ? 

त्यस्तो होइन । पत्रकार ऋषि धमलाले पार्टीमा आफ्ना धारणा व्यक्त गर्नुभएकाले कसैकसैलाई त्यो पत्रकार सम्मेलन जस्तो पनि लाग्यो होला । 

आफूलाई अभिनेत्री एलिजा भन्न रुचाउनुहुन्छ कि पत्रकार ऋषि धमलाकी श्रीमती ? 

घर भित्र म श्रीमती धमला हुन्छु भने चलचित्रमा अभिनेत्रीका रूपमा सक्रिय छु । 

चलचित्रमा अभिनेत्री नै बन्ने योजनाचाहिं ? 

आफूले लगानी र मेहनत गरेर निर्माण गरेको चलचित्रमा आफैंले किन अभिनय नगर्ने भन्ने कुरा भयो । अभिनय गर्ने धेरै अघि देखिको रहर पनि थियो । 

चलचित्र ‘अनुराग’ को काम कहाँ पुग्यो ? 

एउटा गीतको छायांकन बाँकि थियो, त्यसका लागि यही साता मुस्ताङ जाँदैछौं । उताबाट फर्किएर डविङ गरेपछि प्रचार–प्रसारमा लाग्छौं । यो चलचित्र जेठ ११ गतेदेखि प्रदर्शनमा आउनेछ । 

चलचित्रको छायांकनअघि तीन–चार जना अभिनेता फेर्नुभयो, अहिलेका अभिनेताबाट कत्तिको सन्तुष्ट हुनुहुन्छ ? 

चलचित्र फ्लोरमा जानु अघिसम्म कलाकार परिवर्तन हुनुलाई सामान्य नै मानिन्छ । हाम्रो चलचित्रमा पनि त्यस्तै भएको हो । समुन्द्र पण्डितका रूपमा हामीले नयाँ अनुहारलाई अभिनेताका रूपमा लिएका छौं । उनीसंग मेरो जोडी सुहाएको युनिटका सदस्यहरूको प्रतिक्रिया छ । आशा छ दर्शकहरूले समेत हाम्रो जोडीलाई मन पराउनुहुनेछ । 

आफ्नो कामबाट कत्तिको सन्तुष्ट हुनुहुन्छ ? 

आफ्नो पहिलो चलचित्र भएकाले म त शतप्रतिशत सन्तुष्ट छु । मेरो उत्साहलाई दर्शकको साथ र सहयोगले थप उचाइमा पुर्‍याउनेछ । 

चलचित्रमा कस्तो विषयवस्तु समावेश छ ? 

यो प्रेम कथामा आधारित चलचित्र हो, जसले टिनएजरदेखि हरेक उमेरका दर्शकको मन जित्न सक्छ । 

क्यामेराको अघिल्तिर नर्भस हुनु भयो कि भएन ? 

छायांकनको पहिलो दिन हल्का अफ्ट्यारो लागेको थियो, यद्यपि भोलिपल्टदेखि नै म सामान्य भैसकेकी थिएँ । पछि–पछि त पहिलो चलचित्रमा अभिनय गर्दैछु जस्तै लागेन । 

आफूमा के कस्तो कमजोरी अनुभव गर्नुभयो ? 

खासै धेरै कमजोरी त फेला पारेकी छैन, तर अभिनय र नृत्यको प्रशिक्षण लिएको भए अझ उत्कृष्ट काम गर्न सक्थें कि भन्ने लागेको छ । 

 

प्रकाशित :चैत्र २२, २०७४

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्