मिस नेपालका २५ जना

- कृष्ण भट्टराई

चैत्र ९, २०७४

 

हिडन ट्रेजरले चैत २८ गते बुधबार काठमाडौंमा आयोजना गर्ने २३ औं संस्करणको मिस नेपाल–२०१८ प्रतियोगितामा देशका विभिन्न क्षेत्रको प्रतिनिधित्व गर्ने २५ जना युवती सहभागी हुने भएका छन् । २० देखि २४ वर्ष उमेर समूहका यी सुन्दरीहरू विभिन्न शैक्षिक पृष्ठभूमिका छन् । प्रतिस्पर्धीहरूमध्ये अधिकांशले स्नातक तह उत्तीर्ण गरेका छन् । ५ फिट साढे ४ इन्चदेखि ५ फिट ९ इन्चसम्म अग्ला सुन्दरीहरूबीच प्रतियोगितामा विभिन्न पाँच महत्वपूर्ण उपाधिका लागि रोचक प्रतिस्पर्धा हुने निश्चित छ ।

काठमाडौंकी २२ वर्षीया महिमा सिंह ५ फिट ६ इन्च अग्ली छिन् । बीबीएको अध्ययन पूरा गरेकी महिमा मिस नेपाल २०१८ की प्रतियोगी नम्बर एक हुन् । दुई वर्षअघि सम्पन्न इन्टरकलेज फेसन शोमा बेस्ट फिमेलको एवार्ड जितेकी महिमालाई नयाँ काम गर्न तथा परीक्षण गर्न मन पर्छ । नयाँ ठाउँ घुम्न तथा नयाँ व्यक्तिलाई भेट्न मन पराउने महिमा खानेकुरा बनाउनसमेत सिपालु छिन् । साल्सा डान्समा अब्बल महिमाले भविष्यमा सफल उद्यमी बन्ने लक्ष्य लिएकी छिन् ।

काठमाडौंकी २२ वर्षीया रोनाली अमात्य मिस नेपाल–२०१८ की प्रतियोगी नम्बर २ हुन् । ५ फिट ७ इन्च अग्ली रोनालीले बीबीएम उत्तीर्ण गरेकी छिन् । रोनाली मोडल हुन् । उनले विभिन्न विज्ञापन तथा र्‍याम्पमा क्याटवाकको अनुभव हासिल गरिसकेकी छिन् । युवाहरूलाई सशक्त बनाउने अभियानको नेतृत्व गर्ने लक्ष्य लिएकी रोनाली प्रेरणादायी पुस्तकहरू पढ्न, अनुसन्धान गर्न तथा स्वस्थ खानेकुरा बनाउन मन पराउँछिन् । आफूलाई सधैं फिटनेस राख्न तम्तयार हुने रोनाली आफूमा भएको आत्मविश्वास नै आफूलाई मिस नेपालको उपाधि जिताउने एउटा माध्यम भएको बताउँछिन् ।वीरगन्जकी २३ वर्षीया काश्या अधिकारी प्रतियोगी नम्बर ३ हुन् । बीबीए उत्तीर्ण काश्या ५ फिट ५ इन्च अग्ली छिन् । सन् २०१० मा सम्पन्न एञ्जल–२०१० मा सेकेन्ड रनर्सअपको उपाधि जित्न सफल काश्या भविष्यमा सफल उद्यमी बन्न चाहन्छिन् । अहिलेदेखि नै व्यवसायमा संलग्न भैसकेकी काश्यालाई नृत्य, गायन, हाइकिङ तथा प्रकृतिसँग नजिक हुने रहर छ । नृत्यमा अब्बल काश्याले विगतमा उत्कृष्ट नृत्य प्रदर्शन गरेरै धेरै एवार्ड जितिसकेकी छिन् ।

विराटनगरकी अनुपमा बास्तोला मिस नेपाल–२०१८ की प्रतियोगी नम्बर ४ हुन् । २१ वर्षीया अनुपमा ५ फिट ५ इन्च अग्ली छिन् । उनले मानविकीमा स्नातक गरेकी छिन् । अनुपमालाई यात्रा गर्न मन पर्छ । यात्राले समाज र वातावरणसंग जोडिएका हरेक कुरासँग नजिक गराउँछ भन्ने उनको धारणा छ । पूर्वी नेपालमा सञ्चारकर्मीको छवि बनाएकी अनुपमा कुशल कार्यक्रम प्रस्तोता समेत हुन् । एउटा संस्था स्थापना गरेर युवा सशक्तिकरण तथा मानसिक स्वास्थ्यको क्षेत्रमा काम गरिरहेकी अनुपमा सामाजिक कार्य गरेवापत विराटनगर उपमहानगरपालिकाबाट पुरस्कृतसमेत भएकी थिइन् । अनुपमाले भविष्यमा सफल व्यक्तित्व बन्ने लक्ष्य लिएकी छिन् ।

मिस नेपाल–२०१८ की प्रतियोगी नम्बर ५ हुन् सन्ध्या अधिकारी । २३ वर्षीया सन्ध्या चितवनको भरतपुरकी स्थायी बासिन्दा हुन् । ५ फिट ६ इन्च अग्ली सन्ध्याले डेन्टल सर्जरीमा स्नातक गरेकी छिन् । स–साना बालबालिकाहरूसँग झुम्मिन पाउँदा असाध्यै खुसी हुने सन्ध्याले भविष्यमा सफल दन्त रोग विशेषज्ञ हुने लक्ष्य लिएकी छिन् । सामाजिक कार्यमा समेत रुचि राख्ने सन्ध्या नृत्य गर्न, गीत गाउन, यात्रा गर्न तथा बास्केटबल खेल्न रुचाउँछिन् । दौडमा अब्बल सन्ध्याले भविष्यमा सफल व्यक्तित्व बन्ने लक्ष्य लिएकी छिन् ।

काठमाडौंकी २१ वर्षीया शर्वाणी पाण्डे ५ फिट ६ इन्च अग्ली छिन् । अंग्रेजी साहित्य तथा राजनीति शास्त्रमा स्नातक गरेकी शर्वाणी नृत्यमा अब्लल छिन् । उनले शास्त्रीय नृत्यमा समेत डिप्लोमा गरेकी छिन् । पर्फर्मिङ आर्ट्सको समेत अनुभवी शर्वायणी आकर्षक नृत्य तथा अभिनय प्रस्तुत गरेरै थुप्रै पुरस्कारसमेत जितेकी छिन् । तीमध्ये कलर्स अफ एक्सिलेन्स एवार्डलाई महत्वपूर्ण मान्छिन् । शर्वाणी ड्रामाटिक्स सोसाइटीकी अध्यक्षसमेत हुन् । आफूलाई आध्यात्मिक स्वभावको बताउने शर्वाणी नियमित ध्यान तथा योग समेत गर्छिन् । शर्वाणीले भविष्यमा कुशल अभिनेत्री बन्ने लक्ष्य लिएकी छिन् ।

भरतपुर, चितवनकी सुस्मिता सापकोटा प्रतियोगी नम्बर ७ हुन् । २३ वर्षीया सुस्मिता ५ फिट ६ इन्च अग्ली छिन् । उनले चार्टड एकाउन्टेन्सीको अध्ययन पूरा गरेकी छिन् । कर तिर्ने कार्यलाई बेवास्ता गर्नेहरूलाई कर सचेतना कार्यक्रम गर्ने लक्ष्य लिएकी सुस्मितालाई रंगहरूसँग खेल्दै चित्रकला गर्न मन पर्छ । प्राय: सधैं रमाइलो गर्न तथा साथीहरूसँग घुलमिल हुन रुचाउने सुस्मिता आफूलाई राम्रो खेलाडी समेत मान्छिन् । विभिन्न खेल खेलर पुरस्कृतसमेत भैसकेकी उनी नेपाल जुनियर सर्कलकी पूर्वअध्यक्षसमेत हुन् । गायनमा रुचि राख्ने सुस्मिताले पहिलो संस्करणको नेपाल आइडलमा समेत भाग लिएकी थिइन् । 

काठमाडौंकी प्रिया सिग्देल प्रतियोगिताकै सबैभन्दा अग्ली प्रतिस्पर्धी हुन् । प्रतियोगी नम्बर ८ उनी ५ फिट ९ इन्च अग्ली छिन् । २३ वर्षीया प्रियाले डेभलपमेन्ट स्टडिजमा स्नातक गरेकी छिन् । सामाजिक अभियन्ताका रूपमा सक्रिय प्रिया गैर नाफामूलक संस्था हात्तीहात्तीकी सञ्चालिकासमेत हुन् । उनी महिनावारी–स्वच्छतासम्बन्धी विषयकी अभियन्तासमेत हुन् । उनले स्विट्जरल्यान्डमा सम्पन्न ग्लोबल चेन्ज मेकर फोरम तथा बंगलादेशमा सम्पन्न यूथ एक्सचेन्ज कार्यक्रममा नेपालको प्रतिनिधित्व गरिसकेकी छन् । नृत्य र यात्रामा रुचि राख्ने प्रियाले भविष्यमा सफल सामाजिक अभियन्ता बन्ने लक्ष्य लिएकी छिन् । 

विराटनगरकी शिक्षा संग्रौला प्रतियोगी नम्बर ९ हुन् । २२ वर्षीया शिक्षा ५ फिट ५ इन्च अग्ली छिन् । उनले बीबीएसम्मको अध्ययन पूरा गरेकी छिन् । आफ्नो अध्ययनलाई व्यवसायिक करियरमा मात्र उपयोग नगरी सामाजिक उत्तरदायित्यसमेत निर्वाह गर्ने योजना बनाइरहेकी शिक्षा सन् २०१३ देखि मोडलिङ क्षेत्रमा पनि सक्रिय छिन् । कविता–लेखन, गायन तथा फुटसल खेल्न रुचि राख्ने शिक्षाले सन् २००७ मै लिटिल क्विन नेपाल–२००७ तथा सन् २०१४ मा लिरिल फ्रेस फेसको उपाधि जितिसकेकी छिन् । भविष्यमा सफल उद्यमी बन्ने लक्ष्य लिएकी शिक्षाले अहिले आफ्नै एउटा रेस्टुराँ तथा फेसन एकेडेमी सञ्चालन गरिरहेकी छिन् । 

गोरखाकी २२ वर्षीया मनिता देवकोटा मिस नेपाल–२०१८ की प्रतियोगी नम्बर १० हुन् । ५ फिट ७ इन्च अग्ली मनिताले बीएस्सी उत्तीर्ण गरेकी छिन् । स्वास्थ्य विज्ञानमा विशेष रुचि राख्ने मनितालाई महिला स्वास्थ्यको क्षेत्रमा काम गर्ने चाहना छ । महिला सशक्तीकरण तथा बालिकाहरूलाई शिक्षा दिनुपर्छ भन्ने सोचाइ राख्ने मनिता जन स्वास्थ्य क्षेत्रमै कार्यरत छिन् । सिज द फस्र्ट तथा डेज फर गल्र्सजस्ता गैरसरकारी संस्थाहरूमा आबद्ध मनिता यी संस्थामार्फत बालिकाहरूको शिक्षा तथा प्रजनन स्वास्थ्य शिक्षासम्बन्धी कार्यक्रमहरू सञ्चालन गर्छिन् । 

काठमाडौंकी २२ वर्षीया अनाश्रुत पन्त प्रतियोगी नम्बर ११ हुन् । ५ फिट ७ इन्च अग्ली पन्तले बीबीए उत्तीर्ण गरेकी छिन् । पन्तको एउटा अचम्मको स्वभाव छ । उनलाई जुन कुराले जीवनमा खुसी दिन्छ, त्यसमै उनी रमाउँछिन् । उनलाई जीवन परिवर्तन गर्ने तथा रमाइला पुस्तकहरू पढ्ने ठूलो सौख छ । उनलाई प्रजेन्टेसन दिन पनि उत्तीकै मन पर्छ । पब्लिक स्पिकिङमा समेत रुचि राख्ने उनलाई विश्व भ्रमण गरेर मानिसहरूको जीवनका बारेमा जानकारी लिने चाहना छ । साइक्लिङ तथा ब्याडमिन्टन खेल्न मन पराउने पन्तले उनी अध्ययनरत कलेजबाट बेस्ट प्रजेन्टर लिडर तथा पर्फर्मर एवार्डबाट पुरस्कृत भैसकेकी छिन् । भविष्यमा उनले सफल सामाजिक अभियन्ता बन्ने लक्ष्य लिएकी छिन् । 

पोखराकी २४ वर्षीया ज्योत्सना क्षेत्री प्रतियोगी नम्बर १२ हुन् । ५ फिट ६ इन्च अग्ली ज्योत्सनाले नर्सिङमा स्नातक उत्तीर्ण गरेकी छिन् । पेशाले उनी नर्स हुन् । फुर्सदको समयमा आफ्नो रुचिका काम गर्न मन पराउने ज्योत्सना नियमित रूपमा जिम पनि जान्छिन् । उनलाई नृत्य गर्न, सार्वजनिक समारोहलाई सम्बोधन गर्न तथा आफ्नो भनाइमार्फत मानिसहरूको ध्यान आकर्षित गर्दै उनीहरूलाई सकारात्मक कामका लागि सहमत गराउने क्षमता छ । ज्योत्सनाले भविष्यमा चिकित्सक बन्ने लक्ष्य लिएकी छिन् । 

महेन्द्रनगरकी लक्ष्मी पन्त प्रतियोगी नम्बर १३ हुन् । ५ फिट ५ इन्च अग्ली २२ वर्षीया लक्ष्मीले बीबीए उत्तीर्ण गरेकी छिन् । व्यवसाय तथा बजार प्रवद्र्धन लक्ष्मीका रुचिका विषयहरू हुन् । बोल्ड स्कुल तथा ओपन स्पेस नेपालले सञ्चालन गरेका नेतृत्व तथा उद्यमशीलता विषयक प्रशिक्षणमा समेत सहभागी भैसकेकी लक्ष्मी खेलकुदमा पनि अनुभवी छिन् । कलेजमा उनी बास्केटबल टिमको क्याप्टेन नै थिइन् । दौड तथा टेनिसमा पनि उनी अब्बल छिन् । उनलाई पूराना मुद्राहरू संकलन गर्ने सौख छ । जीवन भनेको अनिश्चितताहरूको सँगालो भएकाले हरेक व्यक्तिमा सकारात्मक सोच हुनुपर्ने पन्त बताउँछिन् । 

दाङकी शुभेच्छा श्रेष्ठ प्रतियोगी नम्बर १४ हुन् । २२ वर्षीया श्रेष्ठ ५ फिट ८ इन्च अग्ली छिन् । उनले फार्मेसीमा स्नातक उत्तीर्ण गरेकी छिन् । फार्मेसीको अध्ययन पूरा गरिसकेकी उनले रजिस्टर्ड फर्मासिस्टका रूपमा काम गर्नसमेत थालिसकेकी छिन् । भविष्यमा उनले औषधी उत्पादन गर्ने कम्पनी नै स्थापना गर्ने योजना बनाएकी छिन्, जसले उत्पादन गरेका केही साधारण औषधीहरू कम आय भएका व्यक्तिहरूलाई नि:शुल्क वितरण गर्न सकोस् । नृत्य गर्न, उपन्यास पढ्न तथा आध्यात्मिक भाषणहरू सुन्न मन पराउने शुभेच्छा नयाँ ठाउँ घुम्न पाउँदा तथा नयाँ कुरा सिक्न पाउँदा असाध्यै खुसी हुन्छिन् । मिस टिन नेपाल–२०१३ की सेकेण्ड रनर्स अप शुभेच्छा ठूलो सपना देख्ने अधिकार जो–कोहीलाई भएको धारणा व्यक्त गर्छिन् । 

रुपन्देहीकी लक्ष्मी पौडेल प्रतियोगी नम्बर १५ हुन् । २२ वर्षीया लक्ष्मी ५ फिट ६ इन्च अग्ली छिन् । एमबीएस पहिलो सेमेस्टरकी छात्रा लक्ष्मी पछिल्लो ३ वर्षदेखि निकोल्सन स्टुडेन्ट्स काउन्सिलकी अध्यक्षका रूपमा सक्रिय छिन् । उनलाई नेतृत्व गर्ने क्षमता विकास गर्ने ठूलो सपना छ । मोडल, इभेन्ट मेनेजर, कोरियोग्राफर तथा बास्केटबल कोचका रूपमा उनले काम गरिसकेकी छिन् । सन् २०१६ तथा २०१७ मा उनी आफ्नो कलेजको बास्केटबल टिमको क्याप्टेन समेत रहिन् । भविष्यमा उनले सफल व्यक्ति तथा कुशल उद्यमी बन्ने लक्ष्य लिएकी छिन् । 

भक्तपुरकी २२ वर्षीया आस्था शाख प्रतियोगी नम्बर १६ हुन् । ५ फिट ६ इन्च अग्ली आस्थाले बीबीएको अध्ययन पूरा गरेकी छिन् । महिलाहरूलाई सशक्त बनाएर उनीहरूलाई अवसर प्रद्यान गर्ने उनको लक्ष्य छ । सन् २०१६ मा सार्क चेम्बर अफ कमर्स इन्ड्रस्ट्रिजमा स्वयंसेवकका रूपमा काम गरिसकेकी आस्थाले सन् २०१३ मा सम्पन्न यूथ क्याम्प अफ एशियाज फ्यूचरमा पनि सहभागिता जनाइसकेकी छिन् । उनलाई लिडरसिप तथा मोटिभेस्नल कार्यक्रममा सहभागिता जनाउन मनपर्छ । विभिन्न खेलकुद प्रतियोगिताहरूमा थुप्रै एवार्ड जितिसकेकी उनी आफ्नो कलेजको बास्केटबल टिमको क्याप्टेन रहिसकेकी छिन् । साइक्लिङ उनको रुचिको विषय हो । नयाँ स्वादका खाना पकाएर तथा चलचित्र हेरेर उनी फुर्सदको समय सदुपयोग गर्छिन् । उनले भविष्यमा सफल उद्यमी बन्ने लक्ष्य लिएकी छिन् । 

पोखराकी ममता जोशी प्रतियोगी नम्बर १७ हुन् । २० वर्षीया ममता ५ फिट साढे ४ इन्च अग्ली छिन् । पीसीएल नर्सिङ गरेकी ममता यतिबेला गण्डकी मेडिकल कलेज, पोखरामा आईसीयू नर्सका रूपमा कार्यरत छिन् । उनी भावुक, सहयोगी तथा दयालु स्वभावकी छिन् । मिस पोखरा–२०१७ की विजेता ममताले त्यही उपाधिका कारण यसपटकको मिस नेपालमा सोझै सहभागिता जनाउने मौका पाएकी हुन् । उनी आफ्ना भावनाहरू चित्रकलामार्फत व्यक्त गर्न रुचाउँछिन् । उनलाई खाना पकाउन तथा संगीत सुन्न मनपर्छ । 

धनकुटाकी सायरा लामा प्रतियोगी नम्बर १८ हुन् । २२ वर्षीया सायरा ५ फिट ६ इन्च अग्ली छिन् । उनले बीबीए उत्र्तीण गरेकी छिन् । व्यवस्थापन संकायकी छात्रा भएकाले पनि हुन सक्छ, उनलाई कृषिमा आधारित आफ्नै व्यवसाय गर्ने चाहना छ । यसबाट उनले थुप्रै रोजगारी समेत सिर्जना गर्ने लक्ष्य लिएकी छिन् । उनी खानपिनमा निकै सौखिन छिन् । नृत्य गर्न, बास्केटबल खेल्न तथा प्रेरक पुस्तकहरू अध्ययन गर्न रुचाउने सायराले भविष्यमा सफल उद्यमी बन्ने लक्ष्य लिएकी छिन् । 

काठमाडौंकी आश्मा ढुंगाना प्रतियोगी नम्बर १९ हुन् । २१ वर्षीया आष्मा ५ फिट ६ इन्च अग्ली छिन् । बीबीए उत्तीर्ण उनी सञ्चारको क्षेत्रमा काम गर्न चाहन्छिन् । उनले सन् २००६ को किड क्विनमा फस्र्ट रनर्सअपको उपाधि जितेकी थिइन् । ११ वर्षको उमेरमै एउटा एफएम स्टेसनमा रेडियो जक्कीका रूपमा काम गरेकी आष्माले ब्रिटिश काउन्सिल तथा एलसीसीआईबाट पब्लिक स्पिकरको प्रशिक्षण समेत लिएकी छिन् । उनले सन् २०१६ मा आफ्नै लेखन तथा निर्देशनमा एउटा नाटक समेत मञ्चन गरिसकेकी छिन् । भविष्यमा उनलाई कूटनीतिक क्षेत्रमा काम गर्ने चाहना छ । 

काठमाडौंकी मेघा श्रेष्ठ प्रतियोगी नम्बर २० हुन् । २३ वर्षीया ५ फिट ६ इन्च अग्ली मेघाले स्नातक उत्तीर्ण गरेकी छिन् । फेसन तथा मोडलिङमा रुचि राख्ने मेघाले जापानमा समेत मोडलिङ गरेकी छिन् । पछिल्लो दुई वर्ष यता उनले टोकियोमा मोडलिङ गर्ने मौका पाएकी हुन् । उनले आफ््नो जीवनको १२ वर्ष खेलकुद क्षेत्रका लागिसमेत दिएकी छिन् । सञ्चार क्षेत्रमा समेत रुचि राख्ने उनी सफ्ट टेनिसकी खेलाडी हुन् । उनले सन् २०१७ तथा १८ मा नेपालका लागि पदकहरू समेत जितेकी छिन् । योग तथा नृत्यको नियमित अभ्यास गर्ने मेघा भविष्यमा अन्तर्राष्ट्रिय मोडल बन्न चाहन्छिन् । 

भक्तपुरकी सृष्टि कार्की प्रतियोगी नम्बर २१ हुन् । २४ वर्षीया सृष्टि ५ फिट ४ इन्च अग्ली छिन् । उनले स्नातक तह उत्तीर्ण गरेकी छिन् । यूरोपमा बसोबास गरिरहेकी सृष्टि आफ्नो सपना पूरा गर्नका लागि यतिबेला नेपाल आएकी छिन् । उनलाई चलचित्रमा अभिनय तथा नृत्य गर्न मन पर्छ । सामाजिक कार्यमा समेत रुचि राख्ने उनी नृत्य, ट्ेरकिङ, स्काइ डाइभिङ बन्जि जम्पिङकी सौखिन हुन् । भविष्यमा उनी सफल कलाकार तथा उद्यमी बन्न चाहन्छिन् । 

झापाकी २१ वर्षीया एलिशा अधिकारी प्रतियोगी नम्बर २२ हुन् । ५ फिट ६ इन्च अग्ली एलिशाले बीबीएससम्मको अध्ययन पूरा गरेकी छिन् । मोडलिङमा रुचि राख्ने एलिशाले यसअघि मिस मेची–२०१६ मा प्रतिस्पर्धा गर्दै उत्कृष्ट ५ मा पुग्न सफल भएकी थिइन् भने मिस ब्युटिफूलको उपाधि समेत जितेकी थिइन् । व्यवसायिक कोरियोग्राफरका रूपमा कार्यरत उनी एउटा विद्यालयमा शिक्षिकाका रूपमा समेत कार्यरत छिन्, जहाँ उनी नृत्यसमेत सिकाउँछिन् । अभिनय, नृत्य, चित्रकला तथा कविता लेखन उनका सौखहरू हुन् । भविष्यमा उनले सफल समाजसेवी बन्ने लक्ष्य लिएकी छिन् । 

भक्तपुरकी एलिशा बुढाथोकी प्रतियोगी नम्बर २३ हुन् । २२ वर्षीया एलिशा ५ फिट ८ इन्च अग्ली छिन् । कम्प्युटर साइन्स तथा टेक्नोलोजीमा स्नातक गरिरहेकी एलिशा कम्प्युटरका विभिन्न प्रोग्रामिङहरूमा रुचि राख्छिन् । सूचना–प्रविधिमा महिलाहरूलाई आकर्षित गर्ने खालका प्रभावकारी प्रोग्रामिङ गर्ने उनको चाहना छ । कुनै दिन आफ्नै ब्रान्डको प्रोग्रामिङको विकास गर्ने लक्ष्य लिएकी उनी नृत्य, गायन तथा नयाँ ठाउँको भ्रमण गर्न रुचाउँछिन् । उनले भविष्यमा सफल आइटी इन्जिनियर बन्ने लक्ष्य लिएकी छिन् । 

काठमाडौंकी एञ्जिला महत प्रतियोगी नम्बर २४ हुन् । २२ वर्षीया एञ्जिला ५ फिट ७ इन्च अग्ली छिन् । नर्सिङमा स्नातक उत्तीर्ण एञ्जिला उनी यही पेसामा आबद्ध भैसकेकी छिन् । समाजबाट कम अवसर पाएका व्यक्तिहरूका लागि केही गर्ने अठोट लिएकी एञ्जिला पब्लिक स्पिकरका रूपमा किशोरीहरूलाई उनीहरूको सपना पूरा गराउने मार्गमा समेत अघि बढ्न चाहन्छिन् । पुस्तक पढ्न, यात्रा गर्न तथा विभिन्न समुदाय तथा संस्कृति भएका व्यक्तिहरूलाई भेट्न रुचाउने एञ्जिला कविता समेत रचना गर्छिन् । भविष्यमा उनले सफल स्वास्थ्य प्रशिक्षकका रूपमा काम गर्ने लक्ष्य लिएकी छिन् । 

हेटौंडाकी श्रृंखला खतिवडा प्रतियोगी नम्बर २५ हुन् । २२ वर्षीया श्रृंखला ५ फिट ६ इन्च अग्ली छिन् । उनले आर्किटेक्टमा स्नातक उत्तीर्ण गरेकी छिन् । लेखनमा रुचि राख्ने श्रृंखला ५ वर्षदेखि लेखनमा समेत सक्रिय छिन् । आफ्नै लेखनको एउटा उत्कृष्ट पुस्तक प्रकाशित गर्नु उनको जीवनकै ठूलो सपना हो । आर्किटेक्चरको विद्यार्थीका रूपमा उनी आफ्नो कलेजकी टपरसमेत हुन्, जहाँ उनले प्रत्येक सेमेस्टरमा सबैभन्दा बढी अंक ल्याएर उत्तीर्ण भएकी थिइन् । २०७२ सालको भूकम्पपछि मेलम्ची क्षेत्रमा स्वयंसेवकका रूपमा समेत काम गरेकी श्रृंखलाले सन् २०१६ मा सम्पन्न एसियन पेन्ट्स डिजाइन कम्पिटिसनमा आर्किटेक्चर स्टुडेन्ट एवार्डसमेत जितेकी थिइन् । अध्ययन गर्न तथा यात्रा गर्न (ट्ेरकिङ) रुचाउने श्रृंखला भविष्यमा अन्तर्राष्ट्रिय रूपमै ख्यातिप्राप्त आर्किटेक्ट बन्न चाहन्छिन् । 

प्रकाशित :चैत्र ९, २०७४

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्