Teej banner

प्रेम प्राप्ति र त्यागको मिश्रण हो–मनिन्द्र

  • मनिन्द्र सिंह

- साप्ताहिक संवाददाता

माघ ५, २०७४

 

तपाईंलाई यो उपाधि जित्छु भन्ने लागेको थियो ?

सुरुमा त लागेको थिएन, पछि जब त्यहाँको माहौल देखे अनि जित्छु जस्तो लाग्न थाल्यो। 

विजेता भएको घोषणा सुनेपछि कस्तो महशुस भयो ?

एकदमै खुसी लाग्यो । मैले अहिलेसम्म कुनै प्रतिस्पर्धामा हारेको छैन । 

आफूले जितेको खबर सुरुमा कसलाई सुनाउन पाए हुन्थ्यो जस्तो लाग्यो ?

मनमा त्यो कुरै आएन । मेरासबै मिल्ने साथीहरू कार्यक्रमस्थलमै थिए । सबै सँगै भएकाले अरूलाई सुनाउन आवश्यक मानिनँ । 

विजेता भएको त्यो रात मनमा के–के कुरा आए ?

जितेर गएपछि साथीहरूसँग ठमेलको एउटा रेस्टुराँमा खुसीयाली मनायौं, रमाइलो गर्‍यौं । उतै रातको १२ बजिसकेको थियो । आफूले थप जिम्मेवारी पाएको महसुस भयो । खासै त्यस्तो अरू कुरा मनमा आएन । 

तपाईंको प्रेरक व्यक्तित्व ?

मैले बिपी कोइरालाको आत्मवृत्तान्त पढेको थिएँ । त्यस्तै पूर्वराष्ट्रपति रामवरण यादवको जीवनी पनि पढियो । म उहाँहरूको सरल व्यक्तित्वबाट प्रभावित छु । सामान्य व्यक्ति पनि पछि गएर ठूलो ओहदामा पुग्न सक्ने रहेछन् जस्तो लाग्यो । 

फेसबुकमा कति समय बिताउनुहुन्छ ? 

फुर्सदमा भएका बेला चलाउँछु । साथीहरूले पोस्ट गरेका तस्बिर तथा स्टाटस आदि हेरेर बस्छु । आफूलाई भने खासै केही पोस्ट गर्न मन लाग्दैन । 

कस्ता खालका चलचित्र हेर्न रुचाउनुहुन्छ ? 

कसैको बायोग्राफीमा आधारित चलचित्र हेर्न बढी रुचाउँछु । समाजसँग मिल्ने तथा कमेडी चलचित्र पनि हेर्छु । 

जीवन के हो ? 

संघर्ष । 

प्रेम के हो ?

प्रेम प्राप्ति हो, त्याग हो अनि यी दुवै कुराको मिश्रण पनि हो । 

तपाईंको बुझाइमा विवाह के हो ? 

दुई अलग व्यक्तिलाई एक बनाउने सूत्र । 

भगवान्मा विश्वास छ ?

विश्वास छ । म मन्दिर पनि जान्छु । 

तपाईंलाई जीवनमा के बन्न मन छ ?

म राजनीतिमा रुचि राख्छु । प्रधानमन्त्री बन्न मन छ । 

तपाईंलाई मन पर्ने नेता ?

उपेन्द्र यादवको बोल्ने शैली मन पर्छ भने डा. बाबुराम भट्टराईले देशमा केही गर्छन् कि जस्तो लाग्छ । 

प्रकाशित :माघ ५, २०७४

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्