Teej banner

जाडो मौसम सम्झदा कस्तो कविता फुर्छ ?

- साप्ताहिक संवाददाता

पुस २७, २०७४

यात्रीलाई बाटो प्यारो हुन्छ,

बेहुलीलाई रातो प्यारो हुन्छ ।

तँलाई के प्यारो लाग्छ भनेर सोध्नै पर्दैन,

चिसोमा तातो प्यारो हुन्छ ।

-प्रा.डा.कृष्णहरि बराल, कवि/गीतकार

चिसो बिहानीमा ओछ्यानमै तात्तातो चियाको आश,

कम्बलको न्यानोमा बसिरहन पाए झन् कति खास ।

आगोको तातोले रन्काएर कोमल हात ।

चिसिएको गालामा सेक्न पाउँदा क्या बात । 

-नविता तिमल्सिना, गायिका

बच्चालाई बाको काँध, आमाको बुई चाहिन्छ 

न्यानो बनाउने भोटो टोपी तग्न रुई चाहिन्छ ।

बोकाले पनि खाने जाडोको चिसो रात काट्न

हामी ठूलालाई एकले कहाँ हुन्छ, दुई चाहिन्छ ।

-नृपेश उप्रेती, गजलकार

कस्तो जाडो ? 

केही न केही लाउनै पर्ने

जिउमा कपडा, ओछ्यानमा पनि कपडै कपडा । 

आगो नजिक धाउनु पर्ने, 

पानी तातो पिउनु पर्ने 

त्यतिले नपुगे 

तातोपानीमा रम मिलाउनै पर्ने । 

-बाबु बोगटी, गायक/अभिनेता

चिसो चुलिँदो छ, आफ्नो स्वास्थ्यको ख्याल गर्नुहोला,

किनभने यो जीवनमा आँसु पुछिदिने त धेरै भेटिएलान,

तर नाक पुछिदिने कोही भेटिने छैनन् । 

त्यसैले, 

चिसो चुलिँदो छ, आफ्नो स्वास्थ्यको ख्याल गर्नुहोला । 

-सुरेश पौडेल, टेलिभिजनकर्मी 

यो चिसो रातलाई भोलिपल्ट घाममा सुकाउँछु भन्छु,

बिहान उठेपछि न्यानो घामले बिर्साइदिन्छ ।

घाम र म लठ्ठाबाजी हुँदै मेरो दिन जान्छ,

फेरि उही सिरेटोमा कठङ्ग्रिएको मुटुलाई च्यापेर सुत्छु । 

मनमनमा सोच्छु 

भोलि त जुनलाई हाइभोल्टेज बिजुली स्टेसनमा लगेर रिचार्ज गर्नुपर्‍यो

कहिले सोच्छु 

क्षितिजदेखि आकाशसम्म आकाशदेखि क्षितिजसम्म हिँड्ने

यो घाम र जुनलाई धर्तीमै कैद गर्नुपर्‍यो 

चिसोले सताएका बेला मनमा यस्तै रंगबिरंगको तर्कना आउँछ । 

-अम्बिका गुरुङ, गीतकार/कवियत्री 

सोच्दै मख्ख पर्छु म त हुन्थ्यो कति दामी, 

चिसो यो ठाउँ छोडी न्यानो घाम लागेको 

त्यो डाँडामा जान पाए हामी । 

वर्षा बस्नेत, सञ्चारकर्मी

बालापन नै ठीक थियो बरु

पुस माघ त्यसै जान्थ्यो

चिन्तै लिन पर्दैनथ्यो

बाख्राले जाडो खान्थ्यो

अहिले त,

ज्याकेटले नि छुदैन

टोपी लाउँदा नि हुदैन

फेटा बाँध्यो उस्तै छ

पन्जा जस्तातस्तै छ

जिन्दगी नि घाँडो छ

अति धेरै जाडो छ

आच्छुछुछुछुछुछु

-अजय अधिकारी सुशील, गायक

चिसोको बहाना छ ।

तात्तिने चाहना छ । 

तात्तिँदा, मात्तिँदा भुसुक्क निद्रा लागोस्,

बहानाबाज सबैलाइ यही कामना छ ।

- लोकराज अधिकारी, गीतकार 

१. कट्याङ्ग्रिँदो जाडो, 

तिम्रो–मेरो सम्बन्ध, 

आँगनभरि तुसारो 

२. वनभरि हिउँ, मनभरि हिउँ,

 तिम्रो–मेरो सम्बन्ध

 पग्लिए परेलीका डिलबाट 

- सुदन डोटेल, गीतकार

जति छोप्छु भने पनि

कताबाट छिर्छ छिर्छ

तिम्रो याद र चिसो हावा । 

- अविरल थापा, लेखक

कान्छी निन्द्रा बिहानीको, गाढामा माया रुइको 

साँझ बाल्दा झिरी–मिटी, उस्तै माया फुईको 

लान्छ क्या हो असत्ती पुसले

व्यवस्था पो गर्नै पर्‍यो अब यी दुईको । 

- महेश आचार्य, गीतकार

जोडीलाई जाडो प्यारो, 

रुइ, फुइ, दुई । 

एकललाई साह्रै गाह्रो, 

आ..आछुछु..आछुछु..हुई । 

हुनेले पिउँछन् हुस्की र रम, 

गरिबको बढ्छ चिसोले दम । 

सुन्दर छ मेरो देश, 

लाटो–अन्धो छ सरकार । 

जुनसुकै तन्त्र आए पनि 

निमुखाको फेरिएन घरबार । 

यो सालको चिसो कटे बाँचिन्थ्यो कि भन्दै, 

भूकम्पका पीडितहरू बस्छन् औंला गन्दै । 

- साइमन सहदेव रायमाझी, गीतकार

 

शिशिरको कठ्याङग्रिने जाडोमा

बिहानै जब म त्यही बाटो भएर हिँड्छु 

जुन बाटो हामी 

धेरैपटक सँगसँगै हिँडेका थियौं 

प्रेमका न्याना शब्दहरू साटासाट गर्दै 

तिनै शब्दहरू म जस्ताको तस्तै सम्झन्छु 

यो जाडो छल्नलाई । 

-विजय शिवाकोटी, गीतकार

 

प्रकाशित :पुस २७, २०७४

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्