मिलन असाध्यै खर्चालु

- साप्ताहिक संवाददाता

पुस २६, २०७४

गीतकारको समेत छवि बनाएका सञ्चारकर्मी नरेश भट्टराई तथा चलचित्र निर्देशक मिलन चाम्सको मित्रता गजबको छ । चाम्सका चलचित्रका अधिकांश गीतमा भट्टराईका शब्द हुन्छन् । चाम्सले निर्देशन गरेका चलचित्रको रेड कार्पेट प्रिमियरमा भट्टराई नै उद्घोषक हुन्छन् । चाम्सको आगामी चलचित्र बोबीमा त भट्टराई पटकथाकारकै रूपमा सहभागी छन् । चलचित्रको गीतदेखि सार्वजनिक समारोहसम्म यी दुई एक–अर्काको नजिक हुन्छन् । निर्देशक चाम्ससँगको लामो संगतमा रहेका भट्टराईले चाम्सको यसरी कुरा काटेका छन् । 

सकारात्मक पक्ष 

असल मान्छे

सकारात्मक सोच, सहयोगी, आत्मीय तथा असाध्यै मेहनत गर्ने बानीले मिलन चाम्सलाई असल मान्छे बनाएको छ । 

भर्सटायल

नेपाली चलचित्रप्रतिको उनको लगाव लोभलाग्दो छ । उनी नेपाली चलचित्रकै लागि जन्मिएका हुन् झैं लाग्छ । मिलन चलचित्रको प्राय: सबै विधामा उत्तिकै पोख्त छन् । 

अपडेटेड

समयअनुसार आफूलाई अपटेड गर्न सक्छन् । समयअनुसार चल्न सक्ने उनको बानी लोभलाग्दो छ । 

परिश्रमी 

परिश्रमी छन् । प्रशस्त खट्न सक्छन् । काम नगरी चुप लागेर बस्नुपर्‍यो भने उनी बिरामी नै पर्छन् कि जस्तो लाग्छ । 

नकारात्मक पक्ष

खर्चालु 

असाध्यै खर्चालु छन् । कमाएको अधिकांश पैसा खर्च गरेरै सिध्याउँछन् । 

बढी काम

आवश्यकताभन्दा बढी नै काम गर्ने बानी सुधार्नुपर्ने देखिन्छ । कामकै कारण आफ्नै स्वास्थ्यप्रति ध्यान दिन सकेका छैनन् । व्यायाम गर्ने बानी छैन, पेट बढ्न थालेको उनले अनुभव नै गरेका छैनन् । 

सोझो बानी 

साथीभाइप्रति आवश्यकताभन्दा बढी विश्वास गर्ने बानी छ । त्यसले गर्दा बेला–बेलामा धोका पनि खाएका छन् । 

चुजी

लाउने, खाने र घुम्ने कुरामा आवश्यकताभन्दा बढी नै चुजी छन् । 

प्रकाशित :पुस २६, २०७४