वर्षका चर्चित दस खेलाडी

  • फल्यासब्याक–२०१७

- साप्ताहिक संवाददाता

पुस २६, २०७४

रोजर फेडेरर, टेनिस 

धेरैको अनुमान थियो, अब रोजर फेडेरर पहिलेको जस्तो रहेनन् । उनमा ग्रान्ड स्लाम जित्ने क्षमता र आत्मविश्वास दुवै बाँकी छैन, तर यी स्विस खेलाडीले त्यसलाई गलत सावित गरे र सन् २०१७ मा आफूलाई विश्व टेनिस इतिहासकै महान् खेलाडी प्रमाणित गरे । यो वर्ष फेडेररले अविश्वसनीय रूपमा दुई ग्रान्ड स्लाम जिते, अस्ट्रेलियन ओपन र विम्बल्डन । पूरा वर्ष उनी विरलै पराजित भए । सबैले विश्वास गुमाइसकेको स्थितिमा फेरि उत्कृष्ट लयमा फर्कनुलाई उनको अनुपम पुनरागमन मानिएको छ । 

राफेल नाडाल, टेनिस

रोजर फेडेररकै समकालीन खेलाडी हुन्— राफेल नाडाल । उनका लागि पनि सन् २०१७ सम्झनालायक रह्यो । यी स्पेनी खेलाडीको खेलको सबैभन्दा ठूलो विशेषता हो, रातो माटोमा उत्कृष्ट खेल्ने । त्यसैले उनी फ्रेन्च ओपनमा अत्यधिक सफल छन् । यसैक्रममा उनले यो वर्ष दसौं पटक फ्रेन्च ओपन जिते । नाडाल पनि अब पुराना खेलाडी भैसकेको धेरैको दाबी थियो । उनले उक्त भ्रमलाई मज्जाले तोडे । ‘किंग अफ क्ले’ उपनाम पाएका नाडालले यो वर्ष यूएस ओपन समेत जिते । यसै वर्ष नाडाल फेरि एकपटक एटीपीको नम्बर १ खेलाडी बने । 

सेरेना विलियम्स, टेनिस 

कुनै समय थियो, महिला टेनिसका सफलतम खेलाडीमा जर्मनीकी स्टेफी ग्राफको नाम लिइन्थ्यो र दाबी गरिन्थ्यो, उनी जत्तिको सफल खेलाडी अब देखापर्ने छैनन् । त्यसलाई गलत सावित गरेकी छिन्, अमेरिकी अश्वेत खेलाडी सेरेना विलियम्सले । सन् २०१७ को पहिलो ग्रान्ड स्लाम अस्ट्रेलियन ओपन जितेर उनले नयाँ कीर्तिमान बनाइन् र त्यो थियो, २३ औं ग्रान्ड स्लाम उपाधिको उपलब्धि । त्यसक्रममा सेरेना ग्राफले जितेको ग्रान्ड स्लाम उपाधिको संख्यालाई उछिन्न समेत सफल भइन् । त्यसयता उनी गर्भवती भएकीले कोर्टमा देखा परिनन् । 

क्रिस्टियानो रोनाल्डो, फुटबल

सन् २०१७ मा कुनै एक खेलाडी फुटबलको मैदानमा निकै चम्किए भने उनी हुन्— पोर्चुगाली खेलाडी क्रिस्टियानो रोनाल्डो । रियलले सन् २०१७ मा अनेकन सफलता हात पार्‍यो, ला लिगादेखि युरोपेली च्याम्पियन्स लिगसम्म । ती सबै सफलतामा रोनाल्डोको व्यक्तिगत प्रदर्शनको ठूलो भूमिका रह्यो । त्यसैले त उनी फिफा मात्र होइन, बेलन डे अरमा समेत उत्कृष्ट खेलाडी चुनिए । रियलका प्रशिक्षक जिनेदिन जिदानको दाबी अनुसार विश्व फुटबल इतिहासकै एक महान खेलाडी हुन्— रोनाल्डो । 

लियोनल मेसी, फुटबल  

अर्जेन्टिनाका लियोनल मेसी पनि सन् २०१७ मा लगातार चर्चामा रहे । मेसीलाई पनि विश्व फुटबलले पाएको अहिलेसम्मकै उत्कृष्ट खेलाडी मान्नेहरू प्रशस्तै छन् । उनकै नेतृत्वमा यो वर्ष बार्सिलोनाले फेरि एकपल्ट अब्बल दर्जाको फुटबल खेल्न थालेको छ । अर्कातर्फ अर्जेन्टिना उनकै नेतृत्वमा विश्वकपमा छनौट हुन सफल भयो । पेरुविरुद्धको अन्तिम छनौट खेलमा उनले सिद्ध गरे, मेसी किन वास्तवमै उत्कृष्ट खेलाडी हुन् भन्ने कुरा । 

नेयमार, फुटबल 

फुटबलमा अब्बल दर्जाको खेलाडीको मूल्य कतिसम्म हुन सक्छ ? सन् २०१७ ले यसको उत्तर पायो र त्यसक्रममा खेलाडी स्थानान्तरको नयाँ कीर्तिमान बन्यो— ब्राजिलीयन स्ट्राइकर नेयमारको नाममा । बार्सिलोनाका नेयमारका लागि फ्रान्सको पेरिस सेन्ट जर्मेन (पीएसजी) ले अविश्वसनीय रूपमा २६ करोड ३० लाख डलर तिरेको थियो । यसअघि उक्त रकमको आधामा विश्व कीर्तिमान बनेको थियो । त्यसअघि नेयमार र बार्सिलोनाबीचको झगडाले पनि उत्तिकै चर्चा पायो । 

स्टिभ स्मिथ, क्रिकेट 

अस्ट्रेलियाली टेस्ट क्रिकेटका कप्तान हुन्— स्टिभ स्मिथ । उनकै नेतृत्वमा अस्ट्ेरलियाले सन् २०१७ मा फेरि एकपल्ट एसेज सिरिज जितेको छ । पाँच टेस्टको सुरुवाती तीन खेल लगातार जितेर अस्ट्रेलियाले एसेज जितेको हो । यो सफलताका पछाडि सबैभन्दा ठूलो भूमिका रह्यो, यिनै स्मिथको । उनी टेस्ट वरियताका नम्बर १ ब्याट्सम्यान हुन् र उनले आफ्नो प्रतिष्ठाअनुसार सुरुवातका तीनवटै टेस्ट निकै राम्रो खेले । अहिलेको पुस्ताका खेलाडीमध्ये टेस्टमा सबैभन्दा राम्रो औसत उनकै छ । त्यसैले उनलाई महान् डन ब्रेडम्यानपछि सबैभन्दा राम्रा ब्याट्सम्यान मान्नेहरू पनि उत्तिकै छन् । 

विराट कोहली, क्रिकेट 

सन् २०१७ मा क्रिकेटका सबैभन्दा ठूला नाममा रहे, भारतीय कप्तान विराट कोहली । भारत अहिले टेस्ट, वान डे र ट्वान्टी ट्वान्टी सबै किसिमका क्रिकेटमा लयमा छ र त्यस क्रममा टिमका तर्फबाट लगातार माथिल्लो दर्जाको खेल प्रदर्शन गर्ने खेलाडी हुन्— कोहली । कुनै समय थियो, विश्व क्रिकेटका सबै कीर्तिमान सचिन तेन्दुलकरको नाममा हुन्थ्यो । अचेल त्यही चर्चा कोहलीको नाममा हुन्छ । उनी गज्जबका ब्याट्सम्यानका साथै उत्तिकै आक्रामक कप्तान पनि हुन् । यो वर्ष उनी निकै चर्चामा रहनुको अर्को एउटा कारण थियो— बलिउड अभिनेत्री अनुष्का शर्मासँगको विवाह । 

लेविस ह्यामल्टन, फर्मुला वान 

फर्मुला वानले अहिलेसम्म देखेका महान ड्राइभरमा बेलायती लेविस ह्यामल्टनको पनि नाम आउँछ ? सन् २०१७ ले यसको उत्तर दिएको छ । ३२ वर्ष पुगेका ह्यामल्टनका लागि यो वर्ष निकै राम्रो रह्यो र यसक्रममा उनले जिते, चौथो पल्ट विश्व च्याम्पियनसिप । फर्मुला वान इतिहासमै उनी सबैभन्दा बढी ७२ पल्ट पोल पोजिसन जित्ने खेलाडी हुन् । माइकल सुमेकरपछि फर्मुला वानलाई वास्तवमै कुनै ठूला स्टार खेलाडीको आवश्यकता थियो र त्यसका लागि ह्यामल्टन राम्रो विकल्प हुन सक्छन् । 

लिके मार्टेन्स, फुटबल 

पुरुष फुटबलमा क्रिस्टियानो रोनाल्डो र लियोनल मेसीजस्तै नाम हुन्, महिला फुटबलमा लिके मार्टेन्स । सन् २०१७ उनका लागि पनि निकै सुखद रह्यो । नेदरल्यान्ड्सले यो वर्ष वुमेन्स युरोपेली च्याम्पियनसिप जित्यो र त्यसमा सर्वाधिक राम्रो खेलाडी चुनिइन्, मिडफिल्डर मार्टेन्स । त्यसैले त फिफालाई पनि मार्टेन्सलाई यो वर्षको उत्कृष्ट खेलाडी घोषणा गर्न गाह्रो भएन् । नेदरल्यान्डलाई महिला फुटबलमा सर्वाधिक बलियो बनाउनमा उनको ठूलो भूमिका छ । लिके बार्सिलोनाको महिला टिमबाट पनि खेल्छिन् । खेलका क्रममा बलमाथि पूर्ण नियन्त्रण राख्नु उनको सबैभन्दा ठूलो विशेषता हो ।

प्रकाशित :पुस २६, २०७४

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्