अन्तर्राष्ट्रिय नेटवर्क बनाएर भाइबरमार्फत ठगी

- अनिल श्रेष्ठ

पुस १०, २०७४

 

अन्तर्राष्ट्रिय नेटवर्क बनाएर भाइबरमार्फत चिट्ठा परेको बताउँदै ठगी गर्ने केही व्यक्तिलाई प्रहरीले विराटनगरमा पक्राउ गरेको छ, जसमा ठगहरूले विदेशी नम्बरबाट फोन गर्दै चिट्ठा परेको सन्देश दिन्छन् । त्यसपछि उक्त चिट्ठा परेको रकम प्राप्त गर्न पहिले निश्चित रकम पठाउन लगाउँछन् । रकम पठाएपछि भने चिट्ठा परेको सूचना दिने प्रयो गकर्ता सम्पर्कमै आउँदैनन् । 

यसरी नै चिट्ठा परेको भन्दै अन्तर्राष्ट्रिय नेटवर्क बनाएर सर्वसाधरणबाट लाखौं रुपैयाँ ठगी गर्ने गिरोहका ६ जनालाई मोरङ प्रहरीले विराटनगरबाट पक्राउ गरेको हो । लामो समयदेखि अवैध रूपमा हुन्डीको समेत कारोबार गर्दै आएको उक्त गिरोहका मुख्य नाइके विराटनगर–७ का ५५ वर्षीय अनुपचन्द सेठियालाई  ८६ लाख ५९ हजार ३ सय ४५ रुपैयाँसहित पक्राउ गरिएको थियो ।

गोप्य सूचनाका आधारमा मोरङ प्रहरीले विशेष प्रहरी परिचालन गरी सेठियाका भतिजा ४० वर्षीय ललित, उनका सहयोगी दुहबी, सुनसरीका २९ वर्षीय बलराम विश्वास, विराटनगरका ४३ वर्षीय विमलकुमार चिरानिया, सोही ठाउँ बस्ने २७ वर्षीय श्रवणकुमार साह तथा भारतीय नागरिक ३७ वर्षीय पंकज कर्णलाई पक्राउ गरेको हो ।

यो गिरोहबाट थुप्रै मानिस ठगिएको पाइएको छ, मोरङ प्रहरी प्रमुख एसपी अरुणकुमार बिसी भन्छन्— ठगी गर्ने गिरोहको सन्जाल ठूलो छ । प्रहरीका अनुसार ठगी गर्नेहरूको सञ्जाल भारतसम्म विस्तारित छ । आफूले खरिदै नगरेको चिट्ठा पर्‍यो भन्ने कुरा सर्वसाधारणले पत्याउनु पनि अचम्मलाग्दो छ, एसपी बीसी थप्छन्— यसमा सर्वसाधारण आफैं पनि सचेत हुनुपर्छ ।

यसरी पक्राउ पर्‍यो गिरोह

गत कात्तिक १८ गते पर्वत जिल्लाको देउपुर गाउँपालिकाकी संगीताकुमारी गुरुङलाई भाइबरमार्फत विदेशी नम्बरबाट एउटा म्यासेज आयो, जसमा लेखिएको थियो— तपाईंको नाममा ४० लाख रुपैयाँको चिट्ठा परेको छ । चिट्ठाको उक्त रकम प्राप्त गर्न तपाईंले ६५ हजार रुपैयाँ राजस्व बुझाउनुपर्छ । आफूलाई ४० लाख रुपैयाँ चिट्ठा परेको कुराले गुरुङ फुरुङ्ग भइन् । 

त्यसको केही समयपछि आकाश शर्मा नाम बताउने एक मानिसले पाकिस्तानकै नम्बरबाट संगीतालाई भाइबरमै फोन गरे । तपाईंलाई चिट्ठा परेको साँचो हो, आकाशले भन्यो— चिट्ठाको रकम प्राप्त गर्न तपाईंले ६५ हजार तथा आइएमई शुल्क ३ सय ५० रुपैयाँ डुमरलाल झाका नाममा पठाउनुपर्छ ।’

साँच्चै भाग्य खुलेकै र चिट्ठा परेकै रहेछ भनेर सङ्गीता ३ घण्टा पैदल हिँडेर सदरमुकाम पुगिन् र प्रभु म्यानेजमेन्टबाट डुमरलालका नाममा आइएमई शुल्कसहित ६५ हजार ३ सय ५० रुपैयाँ पठाइन् । त्यसको केही बेरमै आकाशले संगीतालाई फेरि फोन गर्दै राजस्वबापतको रकम पठाइदिएकोमा धन्यवाद दिए । त्यसपछि आकाशले विजयकुमारको नम्बर दिँदै चिट्ठाको रकम प्राप्त गर्न उसलाई सम्पर्क गर्नू भने ।

विजयको नम्बर पनि पाकिस्तानकै थियो । संगीताले विजयलाई  फोन गरिन् । तपाईंको चिट्ठाको चेकमा हस्ताक्षर हुनै लागेको छ, विजयले भने— तर १ लाख ४० हजार नलिई हस्ताक्षर गर्न मिल्दैन । त्यसैले बलराम विश्वासका नाममा आईएमई शुल्क ५ सय तथा १ लाख ४० हजार तुरुन्त पठाइदिनुस् । ४० लाख रुपैयाँको लोभमा संगीताले त्यो रकम पनि पठाइन्, तर चिट्ठाको रकम आएन । पछि त्यही गिरोहले भाइबरमा फोन गरेर संगीतालाई सेक्युरिटी कोडका लागि २ लाख ७० हजार रुपैयाँ तिरेपछि मात्र चेक काटिने जानकारी गरायो ।

एकपछि अर्को गरी पटक–पटक अनेक बहानामा पैसा माग्न थालेपछि भने संगीता झस्किइन् । उनलाई आफू ठगिँदैछु कि भन्ने शंका लाग्यो । संगीताले स्थानीय प्रभु बैंकका एक कर्मचारीको सहयोग मागिन् । ती कर्मचारीले बलराम विश्वासले आफ्नो नागरिकताको प्रतिलिपि राखेर मोरङबाट मनी ट्रान्सफरमार्फत १ लाख ४० हजार रुपैयाँ झिकेको कुरा पत्ता लगाए । त्यसपछि संगीता मोरङ प्रहरीको शरणमा आइपुगिन् र प्रहरीलाई आफू ठगिएको जानकारी गराइन् । संगीताले दिएको उजुरीका आधारमा मोरङ प्रहरीले २९ वर्ष का बलरामलाई विराटनगरमा पक्राउ गर्‍यो ।  

बलरामले प्रहरीसितको बयानमा आफ्नो नाममा मनी ट्रान्सफरबाट बारम्बार रकम आउने र उक्त रकम अनुपचन्द सेठियाले उनकै घरमा खोलेको कार्यालयमा लगेर बुझाउने गरेको बताए ।

६ जनालाई जेल

ठगी गर्ने मुख्य नाइके अबैध हुन्डी कारोवारी सेठिया तथा उनका सहयोगी अहिले पुर्पक्षका लागि जेल चलान भएका छन् । मोरङ जिल्ला अदालतले सेठियासहित ६ जनालाई पुर्पक्षका लागि जेल चलान गर्न आदेश दिएको छ । मोरङ जिल्ला अदालतका न्यायाधीश महेन्द्रप्रसाद पोखरेलको इजलासले उक्त आदेश गरेको हो । सहयोगी बिमल चिमोरियालाई चाहिँ अदालतले साढे ३ लाख रुपैयाँ धरौटीमा छाडन आदेश दिएको छ । यद्यपि धरौटीमा छाडिए पनि चिमोरियासहित मुख्य नाइके भनिएका अनुप सेठिया, ललित सेठिया तथा भारतीय नागरिक पंकज कर्णलाई अकुत सम्पत्ति आर्जन गरेको आरोपमा सम्पत्ति शुद्धीकरणमा पनि मुद्दा चलाउन अदालतले मोरङ प्रहरीलाई अनुमति दिएको छ ।

को हुन् अनुपचन्द सेठिया ?

विराटनगर, मेनरोडमा स्थायी बसोबास भएका अनुपचन्दले विगत तीन दशकदेखि आफ्नै घरको एक कोठाबाट हुन्डीको कारोबार गर्दै आएका थिए । उनको हुन्डीको सञ्जाल भारतका विभिन्न व्यापारिक सहरसम्म रहेको स्रोतको दाबी छ । हुन्डीको कारोबार गर्दागर्दै उनी विगत ६ महिनादेखि अन्तर्राष्ट्रिय ठग गिरोहमा संलग्न भएको प्रहरीले अनुमान गरेको छ । ती अन्तर्राष्ट्रिय ठगहरूको सहयोगमै उनले नेपालमा पनि ठगी सञ्जाल चलाइरहेको प्रहरीले जनाएको छ ।

प्रकाशित :पुस १०, २०७४

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्