विद्यार्थी डिजाइनरहरूको कला

- रोजिन शाक्य

मंसिर २६, २०७४

नमुना कलेज अफ फेसन टेक्नोलजीमा फेसन डिजाइनिङ अध्ययनरत विद्यार्थीहरू पूर्णिमा थापा, सोनी श्रेष्ठ, जेनिता योङहाङ, सलोरा घिमिरे, स्नेहलता आचार्य, अलिशा प्रधान तथा सुशान्त पुडाशैनीले परिकल्पना गरेका केही फेसन शैली : पूर्णिमा थापाको सिर्जनामा क्लासिक र मोर्डन टच पाइन्छ । उनको पहिरन शैलीमा सर्टको जस्तो कोलर भएको रातो रंगको रअ सिल्कमा तयार हुने ब्लाउज प्रमुख हो । यसमा नेक एरियामा इम्ब्रोइडरी डिटेल छ भने ब्लाउजको बाहुला भने बेल स्लिभ शैलीको छ । यो शैलीमा ब्लाउजको जोडा भने फ्लोर लेन्थ हाइ बेस्टेड फ्लेयर्ड स्कर्ट हुन्छ, जसमा इम्ब्रोइडरी इफेक्ट हुन्छ । सुहाउँदो शल, हाई हिल र हेभी झुम्काले यो पहिरनलाई पूर्णता प्रदान गर्छ । 

सोनी श्रेष्ठको सिर्जना बीसौं दशकताकाको सेमी क्याजुयल वेयरबाट प्रभावित छ । यसमा स्ट्ेरपसहितको वन् शोल्डर अफ तथा क्वार्टर स्लिभ भएको सिल्क साटनको डार्क मरुन टप छ । यसमा ब्ल्याक, ह्वाइट र ग्रे रंगको एब्स्ट्राक्ट प्रिन्ट प्रयोग भएको छ । यसको जोडाका रूपमा मुनितिर फेन्सी लेसको हाइलाइट भएको ह्वाइट कटन प्लाजो पाइन्ट छ । यसमा फ्लोरल ह्यान्ड प्रिन्ट अर्काे आकर्षक पक्ष हो । लाइट मेकअप, कर्ली हेयर स्टाइल तथा सिल्भर रंगको स्यान्डलबाट यो लुकले पूर्णता प्राप्त गर्छ । 

जेनिता योङहाङको कल्पना भने परम्परागत गुन्यू चोलोको परिमार्जित स्वरूप टप एन्ड स्कर्टको जोडामा समेटिएको छ । नी लेन्थ ए शेप्ड स्कर्ट तथा फिटेड ब्लाउज टपको जोडामा फ्रोस्टेड शिमर फ्याब्रिक र कन्ट्रास्ट ग्लिटर्स यो शैलीको मुख्य हाइलाइट हो । नेचुरल मेकअप, क्लासिक चेरी रेड लिपकलर यो स्टाइलका लागि सुहाउँदो हुन्छ । 

सलोरा घिमिरे भने यो पर्वको अवसरलाई नेपाली इन्डो फ्युजन शैलीमा सजाउने धुनमा छिन् । उनको सिर्जनामा माथिल्लो बडीका लागि ढाकाको कपडामा चौबन्दी शैलीको टप्स छ । यसको विशेषता फ्लाउन्स भएको पफी स्लिभ हो । यसको जोडामा घिमिरेले साटनको कपडामा काउल पाइन्ट तयार पारेकी छिन् । बलेरिना फ्ल्याट तथा गोल्डेन नोज रिङले यो लुकलाई पूर्णता प्रदान गर्छ । 

स्नेहलता आचार्यको सिर्जनामा घाँटीमा स्ट्रेपसहितको पहेंलो रंगको ब्रोकेड कपडामा तयार पारिएको हल्टर टप छ । यसको कम्मरमा क्रस शैलीमा स्ट्ेरप राखिएको छ । यो टपको जोडाका रूपमा हेमलाइनमा फ्लेयर भएको टियर्ड स्कर्ट छ । यसलाई सफ्ट पिंक प्लेन कटन ब्लेन्ड फ्याब्रिकमा तयार पारिएको छ । स्कर्टमा एम्बेलिस्ड भएको बेस्ट ब्यान्ड छ भने साइडमा ट्यासल्सका लेयरहरू छन् । 

अलिसा प्रधानको सिर्जना भने आवर ग्लास र पियर बडी शेप भएकाहरूका केन्द्रित छ । कट् अवे डिजाइन भएको वन् पिस शैलीको यो पहिरन मुख्यत: टिनएजरमा लक्षित छ । पहिरनको माथिल्लो अंश टप हो भने तलको अंश सर्कुलर छ, जसमा पछाडिको भाग लामो र अगाडिको भाग छोटो छ । यसको ट्रम्पेट स्लिभलाई आकर्षक रुपमा प्रस्तुत गरिएको छ । टपका लागि भेल्भेट र स्कर्टका लागि रअ सिल्क सुझाव दिइएको छ । टप कालो रंग र स्कर्ट पहेंलो रंगमा जोडा मिलाइएको छ । 

सुशान्त पुडासैनीको कल्पना भने फैन्सी ब्लाउज र लङ सर्कुलर स्कर्टको जोडामा केन्द्रित छ । उजका लागि पिंक तथा स्कर्टका लागि ग्रिन कलर छनौट गरिएको छ । ग्लिटरी बोर्डर भएको ब्लाउज हल्टर शैलीमा छ । यसलाई आकर्षक स्वरूप दिन चेस्ट एरिया क्रस डिजाइनमा केही स्ट्रिङ राखिएको छ भने बेस्ट लाइनमा ट्यासल्स प्रयोग भएको छ । फ्लोर लेन्थ सर्कुलर स्कर्टमा भने पातका प्रिन्टको सुन्दर संयोजन छ । न्युड मेकअप, लेयर्ड हेयर स्टाइल, चंकी ज्वेलरी, प्लाटिनियम ब्रासलेट एवं स्टेलिटोअ् जुत्ताले यो शैलीलाई पूर्णता प्रदान गर्छन् । 

 

 

प्रकाशित :मंसिर २६, २०७४

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्