अनिल गुरुङलाई ५ प्रश्न

- साप्ताहिक संवाददाता

भाद्र १७, २०७४

नेपाली राष्ट्रिय टिमका कप्तान हुन्, अनिल गुरुङ । अनिलकै नेतृत्वमा हालै मात्र टिमले जापानको एक साताभन्दा लामो भ्रमण पूरा गरेको छ । त्यही सेरोफेरोमा गुरुङसँग साप्ताहिकको पाँच प्रश्न : 

 

जापान भ्रमण कस्तो रह्यो ? 

निकै महत्त्वपूर्ण र विशेष । हामी जापानमा फुटबल सिक्न र बुझ्न मात्र गएका थिएनौं । हामीलाई जापान बसुन्जेल प्राकृतिक प्रकोप र त्यसबाट जोगिने उपायका सम्बन्धमा प्रशिक्षणसमेत प्रदान गरिएको थियो । जापानमा पनि हाम्रोमा जस्तै लगातार भूकम्प गैरहेको हुन्छ । त्यहाँ सुनामीजस्ता समस्या पनि छन् । 

 

त्यहाँ सिकेका कुरा अब नेपालीहरूलाई पनि बताउने हो कि ?

त्यस्तो भए राम्रो हुनेछ, तर अहिलेसम्म कुनै कार्यक्रम बनेको छैन । जापानले प्राकृतिक प्रकोपबाट जोगिन निकै ठूलो तयारी गरेको छ ।

जापानी फुटबलको स्तर कस्तो देख्नुभयो ?

निकै माथिल्लो स्तरको । मैले युरोपमा पनि फुटबल खेलेको र हेरेको छु, तर जापानी फुटबल त्यसको तुलनामा पनि राम्रो लाग्यो । जापानी फुटबलले आफ्नो आधार बलियो बनाउन धेरै काम गरेको छ । 

 

जापानी फुटबलको कुन पक्षले सबैभन्दा बढी प्रभावित गर्‍यो ?

हामी जुन एकेडेमीमा बसेका थियौं, त्यहाँ बिहानदेखि रातिसम्म फुटबल मात्र खेलिन्थ्यो । उक्त एकेडेमीमा जस्तै ठूला स्टार खेलाडी आए पनि निश्चित अनुशासनमा बस्थे । ती स्टार खेलाडीले पनि खाना खाएपछि भाँडा आफै माझ्नुपथ्र्यो । म त्यसबाट निकै प्रभावित भएँ । 

 

मैदानमा नेपाली टिमको प्रदर्शन त कमजोर रह्यो नि ?

हामीले जापानमा पाँच खेल खेल्यौं, त्यसमध्ये तीनमा पराजित भयौं । नेपाली टिम २० वर्षपछि जापान पुगेको थियो । त्यसैले त्यो ऐतिहासिक रह्यो । जापानको फुटबलस्तर निकै माथि छ । जुनसकै उमेर समूहको टिम भए पनि खेल्ने स्तर र गति उस्तै छ । त्यसैले नेपाली टिमको प्रदर्शनलाई म त्यति कमजोर र खराब मान्दिनँ ।  

 

प्रकाशित :भाद्र १७, २०७४

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्