तानसेनमा त्रिपक्षीय प्रतिस्पर्धा

- माधव अर्याल

असार १२, २०७४

 

पाल्पाको तानसेन ५ नम्बर प्रदेशको पुरानो सहर पनि हो । पछिल्लो संविधानसभा निर्वाचनमा नेपाली कांग्रेसका हरिप्रसाद नेपालले जितेको क्षेत्र भए पनि मदनपोखरा गाविस थपिएकाले पनि यो नगरले चर्चा कमाएको छ । क्षेत्र नम्बर २ का तेल्घा र मदनपोखरालाई तानसेन नगरपालिकामा मिसाइएको छ ।

मदनपोखरा एमाले प्रभावित गाविस मानिन्छ । कांग्रेसले युवा नेता तथा पार्टीका सचिव अजयमान कर्माचार्यलाई मेयर एवं वकालत पेसामा रहेकी लालकुमारी रानालाई उपमेयर पदमा उम्मेदवार बनाएको छ । एमालेले २०५४ सालमा मेयरमा जितेका अशोककुमार शाहीलाई मेयरको उम्मेदवार बनाएको छ । उपमेयरमा भने मदनपोखराकी लक्ष्मी पाठक उम्मेदवार भएकी छिन् । तानसेनमा २०४९ सालको स्थानीय निर्वाचनमा कांग्रेसले जित हासिल गरेको थियो, तर यसपटक भने परिस्थिति फरक छ । तेल्घा, मदनपोखरा, बन्दीपोखरा, बौघापोखराथोक, अर्गली, बौघागुम्हा र बराङ्दीको ५ वडासमेत तानसेनमा मिसिएको छ, जसले गर्दा निर्वाचन परिणाम कसको पोल्टामा पर्छ भन्ने आँकलन गर्न गाह्रो छ । 

माओवादी केन्द्रले सहिद परिवार प्रतिक्षा सिंजालीलाई मेयर तथा तानसेनका चर्चित व्यक्तित्व विन्दु रावललाई उपमेयरको उम्मेदवार बनाएको छ । उता राप्रपाले रेवन्तबहादुर विष्ट र निर्मला हमाललाई उम्मेदवार बनाएको छ । जनमोर्चाले टिकाराम पौडेल र उमा सिंजाली, जनमुक्ति पार्टीले होमबहादुर थापा र सावित्री रानालाई मेयर तथा उपमेयरमा उम्मेदवार बनाएका छन् । विकासका कुरा र महत्वाकांक्षी योजना सबैले ल्याए पनि विशेषतः कांग्रेस र एमालेबिच नै मुख्य प्रतिस्पर्धा हुने देखिन्छ । तानसेनमा माओवादी, जनमुक्ति, राप्रपा आदि पार्टीले काट्ने मतका आधारमा पनि जित–हार निश्चित हुने बताइन्छ । 

तानसेन नगरपालिका

 

जनसंख्या ५० हजार ४ सय ५
क्षेत्रफल  १ सय ८ वर्गकिलोमिटर
मतदाता २७ हजार ९ सय ८६
वडा १४
जनप्रतिनिधि ७५
मतदान केन्द्र ३५

 

प्रकाशित :असार १२, २०७४

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्