फास्टट्रयाक फेन्टासी

- मनोज गजुरेल

जेष्ठ २१, २०७४- 

हलो, कहाँ आइपुग्नु भयो ?

अहिले निजगढमा आईपुगें, मलाई पनि खाना पकाउँदै गर है ।

भोलि बिहानको ?

हैन, आज बेलुकाको ।

आज बेलुका ? अहिले ६ बजिसक्यो । राति हिँड्नु पर्दैन । बिहान आइस्यो ।

कहाँ मध्यरात भन्या ? म डेढ घण्टामा काठमाडौं आइपुग्छु ।

बहुलाइस्यो कि क्या हो ? निजगढबाट डेढ घण्टामा काठमाडौं कसरी पुगिन्छ ?

फास्टट्रयाकबाट आउने हो क्या ।

ए हो त हगि ! भर्खर बनेको भएर होला, मैले त भुसुक्कै बिर्सिएको ।

खाना पकाउन पनि बिस्र्यौली नि ।

बिर्सिन्न, बिर्सिन्न । पकाउन थालें, हजुर आइपुग्दा ठ्याक्कै तयार हुन्छ ।

० ० ०

ल, हजुर । कालिमाटी तरकारी बजारमा बर्दिबासको ताजा गोलभेंडा आयो ।

बर्दिबासको ताजा गोलभेंडा काठमाडौंमा ? कति दिनअघिको ताजा हो भाइ ?

दिन ? घण्टा भन्नोस् न घण्टा ! तीन घण्टाअघि टिपेको । नपत्याए यी हेर्नोस्, गोलभेंडाको चोप अझै निस्किरा’छ ।

हैन, बर्दिबासमा तीन घण्टाअघि टिपेको गोलभेंडा यति चाँडो काठमाडौंमा ? इमेलबाट मगायौ कि क्या हो ?

हैन, तपाईं कुन युगमा हुनुहुन्छ हो ? बर्दिबासबाट निजगढ एक घण्टा, निजगढबाट काठमाडौं डेढ घण्टा ।

ए हो त, फास्टट्रयाकबाट । फास्टट्रयाकको चमत्कार त भुसुक्कै बिर्सिएछु । ल, आधा किलो दिनोस् त । भोलि फेरि ताजा लिन आउँला ।

० ० ०

बाबा, मलाईं एउटा अक्सफोर्डको डिक्सनरी चाहिएको थियो ?

यही निजगढ बजारमा पाइहाल्छ नि ?

सर्टेज छ रे । हिजो रक्सौल गएकी थिएँ, त्यहाँ पनि पाइएन ।

अहिले साथीहरूको सेयर गर्दै गर । म काठमाडौं गएका बेला ल्याइदिन्छु ।

मलाई आजै चाहिएको छ । गएर ल्याइदिस्यो न ।

के कुरा गर्‍या छोरी । निजगढबाट अहिले काठमाडौं पुगेर पुस्तक ल्याउन सम्भव छ ?

किन सभव छैन हजुर, दूध पुर्‍याउन दैनिक त गैसिन्छ । साढे नौ बजे आइहालिसिन्छ त ।

हैन, के भन्छे छोरी । सपना हो कि बिपना हो ?

क्या त फास्टट्रयाक बाबा ।

हत्तेरिका, हो त । ल, म हिंडे । १० बजेसम्ममा ल्याइदिन्छु ।

० ० ०

हेल्लो, र्‍यापिड रेक्यू कन्ट्रोल ?

सर, म फास्टट्रयाकको १९ नम्बर पुलबाट बोल्दैछु ।

भन्नोस्, के सेवा गरौं ?

सर, यहाँ मेरो गाडी दुर्घटनामा पर्‍यो ।

के छ अवस्था ?

मेरो साथीलाई अलि बढी चोट लागेको छ ।

पिएर चलाउनुभएको थियो कि क्या हो ?

कहाँ पिउनु सर ? निजगढ चेकपोस्टले जाँच गरिवरी पठाएको । पहिलो पटक भएर अलि ब्यालेन्स भएन होला ।

ए, ठिक छ ।नआत्तिकन बस्नोस् । ५ मिनेटमा रोड सेफ्टीको गाडी आइपुग्छ ।

सर, घाइते साथीलाई अलि गाह्रै होलाजस्तो छ ।

चिन्ता लिनु पर्दैन । रोड सेफ्टीको गाडीले घाइतेलाई नजिकको हेलीप्याडमा पुर्‍याउँछ । रेक्यू हेलिकप्टर १५ मिनेटमा आइपुग्छ ।

० ० ०

तपाईंको पेट्रोल पम्प । डिजेल ६५ प्रतिलिटर, पेट्रोल ५५ प्रतिलिटर ।

हैन ओ भाइ, डिजेल–पेट्रोल नक्कली आउन थाल्यो कि 

क्या हो ?

किन र दाइ ?

अकस्मात् सस्तो भएछ त इन्धन ?

कहाँ अकस्मात हजुर ! चार वर्षदेखिको प्रयास हो ।

भन्नाले ?

भन्नाले फास्टट्रयाक बनेपछि त भाउ घट्ने नै भयो नि । भन्नोस्, कति राखिदिऊँ डिजेल ।

ए, हो त हगि ।हाल्नोस् न फुलट्यांकी ।

फास्टट्रयाक सुरु भएपछि इन्धन ढुवानीमा हुने १० अर्ब रुपैयाँ बच्ने भएपछि सस्तो त हुने नै भयो नि ।

० ० ०

ओ हो हल्दारसा’ब । आज त फ्रेस देखिनु हुन्छ त ?

फ्रेस त हुने नै भइयो नि हजुर ।काम हल्का छ आजकाल ।

ट्राफिकबाट प्रहरीतिर आउनुभयो कि क्या हो ?

हैन, ट्राफिकमै छु तर रोड बिजी छैन आजकाल ।

बन्द हैन, फास्टट्रयाक ।

ए हो त है ।

हो नि ! फास्टट्रयाक बनेपछि काठमाडौंका आधा मान्छे बाहिरिइहाले । अफिस टाइममा अलि–अलि बिजी हुने हो । अरू बेला जाम पनि हुँदैन । भीड पनि हुँदैन ।

त्यही त । अफिस गर्न काठमाडौं आयो, बास बस्न बाहिर निस्कियो । कस्तो मज्जा हगि ।

० ० ०

म विश्वस्त, फास्टट्रयाक निर्माणपछि काठमाडौंवासी सुखी हुनेछन् । किनभने, यसले सहरको उकुस–मुकुसलाई खुकुलो बनाउनेछ । म आश्वस्त छु, तराईवासी खुसी हुनेछन्, किनभने यसले राजधानीसँगको पहुँच बलियो बन्नेछ । अपेक्षा राख्छु, फास्टट्रयाकले सबै नेपालीलाई बलियोसँग जोड्ने छ, किनभने राष्ट्रिय गौरवको यो आयोजनामा कुनै पार्टीले कमिसनको खेल खेल्न पाउने छैनन् । आशावादी छु, फास्टट्रयाकमा हामी चार वर्षभित्रै गुड्न पाउनेछौं, किनभने यसको जिम्मा नेपाली सेनाले लिएको छ । 

प्रकाशित :जेष्ठ २१, २०७४

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्