डिजिटल मार्केटिङ

- आभास अधिकारी

माघ १४, २०७३-  

एक दशकअघिभन्दा आजभोलि कयौं गुणा बढी मानिस अनलाइन बस्छन् र उनीहरू अनलाइन बस्ने समय पनि निकै बढेको छ । यो सँगसँगै मानिसहरूको जीवनशैली पनि परिवर्तन भएको छ । अहिलेका मानिसहरू घरमै बसीबसी मोबाइल चलाएको भरमा किनमेल गर्न चाहन्छन् । आफू बसेकै ठाउँबाट होटलको मेनु हेर्दै त्यही अर्डर मगाउन सक्ने अहिले हाम्रो देशमा पनि सम्भव भैसकेको छ ।

के हो डिजिटल मार्केटिङ ?

अनलाइन मार्केटिङको अर्को स्वरूप हो डिजिटल मार्केटिङ, जसअन्तर्गत गुगल सर्च, सामाजिक सञ्जाल, इमेल र व्यापारिक वेबसाइट आदि प्रयोग गरेर आफ्ना ग्राहकसँग व्यापारिक रूपमा जोडिने विधिहरू पर्छन् । आफ्ना ग्राहकहरूलाई सजिलो हुने गरी जहिले पनि जोडिने वस्तु हो मार्केटिङ र समयअनुसार आफूलाई परिमार्जित गर्दै मानिसहरूको परिवर्तित जीवनशैलीसँगै फस्टाइएको छ । डिजिटल मार्केटिङ ब्लग पोस्ट, इन्फोग्राफिक्स, सामाजिक सञ्जालजस्तै फेसबुक, ट्वीटर, इन्स्टाग्राम, इमेल आदिका  विभिन्न वस्तुहरू प्रयोग गरेर आफ्ना ग्राहकहरूसम्म पुग्ने गरिन्छ र आफ्नो लक्ष्य भेटाइन्छ ।

 

डिजिटल मार्केटिङका लागि विभिन्न विधि अपनाउन सकिन्छ । यसअन्तर्गत सर्च इन्जिन अप्टिमाइजेसन (एसइओ), कन्टेन्ट मार्केटिङ, सामाजिक सञ्जाल (सोसल मिडिया) मार्केटिङ र अप्टिमाइजेसन, इमेल मार्केटिङ, सर्च इन्जिन मार्केटिङ आदि पर्छन् । यसका अतिरिक्त डिजिटल मार्केटिङ इन्टरनेटको प्रयोग नहुने तर डिजिटल विधिबाट हुने एसएमएस र एमएमएससम्म पनि फैलिएको छ ।

 

किन गर्ने डिजिटल मार्केटिङ ?
परम्परागत मार्केटिङको तौरतरिकाभन्दा सस्तो पर्छ । डिजिटल मार्केटिङ, इमेल मार्केटिङ, सामाजिक सञ्जालका मार्केटिङहरू गर्न पर्ने लागत तपाईंले टेलिभिजन, रेडियो र पत्रपत्रिकामा गर्ने विज्ञापनको तुलनामा नगन्य हुन्छ तर तपाईंले गरेको डिजिटल मार्केटिङको पहुँच भने तुलनात्मक रूपमा बढी नै आउने सम्भावना हुन्छ । यसका अतिरिक्त तपाईंले गर्ने डिजिटल मार्केटिङको प्रत्यक्ष अनुगमन तपाईं आफैंले आफूलाई पायक पर्ने स्थानमा गर्न सक्नुहुन्छ र चित्त नबुझेको खण्डमा त्यही समयमा त्यो मार्केटिङ रोकेर नयाँ रणनीति अपनाउन सक्नुहुन्छ ।

 

आजको युग प्रविधिको युग हो र बिस्तारै परम्परादेखि चलिआएका सञ्चार आदि विभिन्न उपकरणहरूको प्रयोग घट्दो छ । आफ्नो व्यापार–व्यवसायलाई डिजिटल मार्केटिङमार्फत अझ चुस्तदुरुस्त राख्न सक्नुहुनेछ  

 

के हो डिजिटल मार्केटिङको तरिका ?
तपाईंका साथमा वेबसाइट छ भने सर्वप्रथम तपाईंले आफ्नो वेबसाइटलाई गुगललगायत अन्य सर्च इन्जिनमैत्री बनाउन आवश्यक छ । यसले गर्दा तपाईंका ग्राहक र अन्यले पनि कुनै उत्पादन गुगल आदि सर्च इन्जिनमा खोज्दा तपाईंलाई नै भेट्ने सम्भावना बढ्छ । सामाजिक सञ्जालमा बलियो उपस्थिति बनाएर तपाईंले आफ्नो उत्पादनको प्रचार गर्न सक्नुहुन्छ । अहिले सामाजिक सञ्जाल नचलाउने व्यक्ति तपाईं आफैंले पनि बिरलै भेट्नुहुन्छ ।

 

आफ्नो वेबसाइटमा आउने व्यक्तिलाई आफ्नो ग्राहक बनाउनुहोस् । अनावश्यक तरिकाले डिजिटल मार्केटिङमा खर्च नगर्नुहोस्, थोरै लगानीमा धेरै लाभ लिनुहोस् । यसका लागि तपाईं विज्ञको सहयोग लिन सक्नुहुन्छ र अन्त्यमा आफूले गरेको डिजिटल मार्केटिङलाई नियमित रूपमा अनुगमन गर्दै सुधार गर्नुहोस् ।

 

- आभास अधिकारी 

प्रकाशित: माघ १४, २०७३

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्