अन्तर्राष्ट्रिय स्तरको मोबाइल महोत्सव

- साप्ताहिक संवाददाता

पुस ५, २०७३

 

नेपालको आर्थिक केन्द्र तथा मोबाइल हबका रूपमा चिनिने पाको, न्युरोडलगायतका क्षेत्रमा व्यवसाय गर्दै आएका विभिन्न मोबाइल संघले आपसमा एकीकरण गरेर नेपाल मोबाइल व्यवसायी संघ गठन गरेका छन् । नेपाल मोबाइल व्यवसायी संघ मोबाइलको क्षेत्रमा आबद्ध व्यवसायीहरूको सबैभन्दा ठूलो र पुरानो संस्था भएको दाबी गरिएको छ । संघमा हाल ५ सयभन्दा बढी रिटेलरको आबद्धता छ । 

संघका संयोजक पुरुषोत्तम बस्नेतले नेपालभरका मोबाइल आयातकर्ता, वितरक तथा रिटेलरहरूलाई संघमा समेटेर भविष्यमा महासंघ गठन गर्ने र संघले मोबाइल व्यवसायको वृद्धि एवं प्रवद्र्धन गर्न विभिन्न कार्यक्रम सञ्चालन गर्ने बताएका छन् । यसै क्रममा संघले अन्तर्राष्ट्रिय स्तरको मोबाइल महोत्सव गर्ने भएको हो । नयाँ वर्ष २०१७ को अवसर पारेर पाको, न्युरोड, ताम्राकार कम्प्लेस, पिपुल्स प्लाजा आदि क्षेत्रमा उक्त मोबाइल महोत्सव सञ्चालन गर्न लागिएको हो । महोत्सव पुस १३ गतेदेखि १९ गतेसम्म चल्नेछ, जसमा ग्राहकहरूले समान मूल्यमा सिल प्याक गरिएका गुणस्तरीय उत्पादन प्राप्त गर्ने सिटिसी मोबाइल बजारका अध्यक्ष सन्दीप मानन्धरले बताए । 

 

यो महोत्सव नेपालमा आयोजित अहिलेसम्मकै सबैभन्दा ठूलो मोबाइल महोत्सव हुने दाबी गरिएको छ । महोत्सव अवधिभर मोबाइल बजारका विभिन्न स्थानमा फुड जोन, किड्स जोन, गेमिङ जोनजस्ता आकर्षणसहित हरेक मोबाइलको खरिदमा विशेष छुट प्रदान गरिने संघको प्रेस विज्ञप्तिमा उल्लेख छ ।

 

लेजी स्ट्यान्डहरू

पछिल्ला दिनमा मानिसहरूको चिन्ता कार्यालय वा घरमा रहँदा मोबाइल सेट कहाँ राख्दा सुरक्षित र सहज हुन्छ भन्ने कुरामा छ । यस्तो समयमा स्मार्टफोनलाई सुरक्षित राख्ने र बसेको स्थानबाटै प्रयोग गर्न सकिने गरी लेजी स्ट्यान्ड उपलब्ध छन् । विभिन्न डिजाइन एवं साइजमा खरिद गर्न सकिने यी लेजी स्ट्यान्डको मूल्य न्यूनतम १ सय रुपैयाँबाट सुरु हुन्छ ।

सेलफोन रिङ

हातमा सेलफोन चलाउने क्रममा त्यो चिप्लिएर भुइँमा झर्न सक्ने खतरा पनि हुन्छ । यस्तो बेला सेलफोनलाई हातबाट झर्न जोगाउने रिङसमेत बजारमा उपलब्ध छ, जसको मूल्य ५० रुपैयाँबाट सुरु हुन्छ । यस्तो रिङलाई मोबाइल फोनको पछाडि टाँसेर त्यसमा औंला घुसाई सुरक्षित बनाइन्छ ।

 

प्रकाशित :पुस ५, २०७३

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्