म्यानहन्ट इन्टरनेसनल नेपाल २०१६ बने समिम खान

- साप्ताहिक संवाददाता

पुस ५, २०७३

 

गत शनिबार बौद्धस्थि हायात रिजेन्सी होटलमा सम्पन्न ‘प्रोस्टाइल म्यानहन्ट इन्टरनेसनल नेपाल २०१६’ को उपाधिमा समिम खानले आफ्नो नाम दर्ता गराउन सफल भएका छन् । समिमले प्रतिस्पर्धामा ट्यालेन्ट र वेष्ट हेयर विधाको अवार्ड पनि आफ्नो नाममा सुुरक्षित गर्न सफल भए । आफ्ना १४ प्रतिस्पर्धीलाई पछाडि पार्न सफल समिमले प्रतियोगिता मुख्य उपाधि विजेता बने संगै होन्डा होर्नेट बाइक, नगद पुरस्कार रु एक लाख पुरस्कारका रुपमा प्राप्त गरेका छन् भने सन् २०१७ मा आयोजना हुने म्यानहन्ट इन्टरनेसनलको अन्तर्राष्ट्रिय संस्करणमा नेपालको तर्फबाट प्रतिनिधित्व गर्ने अवसर पनि जुराएका छन् । 

ग्रुप अफ इभेन्ट इन्टरटेनर्स, जि.ई.इ.को आयोजनामा संचालन भएको सो प्रतियोगितामा प्रवेश झा फस्ट तथा अनुज मास्के सेकेन्ड रनर अप विजेता छनौट भएका थिए । अनुजले फोटोजेनिक र फिजिक विधाको अवार्ड जित्न सफल भए । डिजाइनर कल्पना योङहाङ लिम्बुले तयार पारेको ढाका मिश्रित फर्मल वेयरमा आफ्नो पहिलो प्रस्तुति दिएका सहभागिहरुले त्यसपछि ट्रंक वेयरमा आफ्नो सुगठित शरिरको प्रदर्शन गरेका थिए । त्यसपछि फर्मल सुट पाइन्ट र अन्तत: टक्सिडो वेयरमा प्रतिस्पर्धीहरुले आफूलाई प्रतिस्पर्धाको मैदानमा उतारेका थिए ।

 

प्रतियोगितामा धनप्रसाद लिम्बु फ्रेन्डशीप, दिपेन्द्र महर्जन पर्सनालिटी, एरिक विक्रम थापा स्पोर्टस्म्यानशीप, प्रविणा राना मगर चार्मिङ, शेखर सुवेदी पपुलर तथा निशान चौहान पर्सनालिटी विधामा उत्कृष्ट ठहरिएका थिए । कान्तिपुर टि.भि.बाट प्रत्यक्ष प्रशारण भएको सो प्रतियोगितालाई पूर्व मिस नेपाल एवं अभिनेत्री मलिना जोशी तथा संचारकर्मी एवं अभिनेता रेमन दास श्रेष्ठले संयुक्त रुपमा संचालन गरेका थिए ।

प्रकाशित :पुस ५, २०७३

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्