गोठालेको नाटक ‘भोको घर’ थिएटर मलमा

  • दोस्रो दिनदेखि नै दर्शकको आगमन बाक्लो

- साप्ताहिक संवाददाता

पुस ३, २०७३-

सुनधारास्थित नाटकघर थिएटर मलमा नयाँ नाटकको मञ्चन सुरु भएको छ । सुप्रशिद्ध नाटककार गोविन्दबहादुर मल्ल ‘गोठाले’ को नाटक ‘भोको घर’को पुस १ गतेदेखि मञ्चन सुरु भएको हो । नाटकलाई थिएटर मलका कला निर्देशक तथा युवा रंगकर्मी केदार श्रेष्ठले परिकल्पना तथा निर्देशन गरेका छन् ।नाटकमा एकै परिधिमा रुमलिरहने वा रुमलिरहन बाध्य हुने मध्यम वर्गीय सोँच र आर्थिक संकटले पैदा गर्ने पारिवारिक समस्यालाई दृश्यमा उतारिएको छ । मध्यम वर्गको आवश्यकता, सपना, महत्वकांक्षाका साथै समस्या र दुर्घटनाको अवस्थालाई नाटकले मूल विषय बनाएको छ ।  

गोठालेले तीसको दशकमा लेखेका नाटक ‘भोको घर’ अहिले पनि उत्तिकै सान्दर्भिक भएको निर्देशक श्रेष्ठ बताउँछन् । उनी भन्छन्, ‘समयान्तरसँगै मानिसका सपनाका तह बढेपनि स्वरुप उहि रहँदा यो नाटक हरेक समयको प्रतिनिधि हुनसक्छ ।’ ८ वर्ष अघि श्रेष्ठले यो नाटकमा आफैले अभिनय गरेका थिए । अहिले प्रस्तुतिलाई कला र प्रविधिको माध्यमले समसामयिक बनाएर आफैले निर्देशन गरेका हुन् ।नाटक मञ्चन सुरु भएको दोस्रो दिनदेखि नै थिएटर मलमा दर्शकको आगमन बाक्लिन थालेको नाटकघरकी प्रबन्ध निर्देशक इलिना नकर्मीले जनाइन् ।

प्रिमियरपछि लेखक, साहित्यकार, कलाकारलगायतले नाटक कलात्मक र समसामयिक भएको प्रतिक्रिया आएको बताइन् । नाटकमा साठीको दशकको मध्यतिरबाट रंगकर्ममा उत्रेका कलाकारहरुले अभिनय गरेका छन् । कहिले सिनेमा कहिले नाटक गर्दै आकाश मगर, शान्ति गिरी, सुदाम सिके, सञ्जिता सञ्जी र अभय बरालले फेरि रंगमञ्चमा मन मिलाएका छन् । घनश्याम श्रेष्ठको सुन्दर मञ्च तथा प्रकाश परिकल्पनाले नाटकलाई अझै कलात्मक बनाएको छ । 

नाटकघर थिएटर मलमा पुस २३ गते सम्म बुधबारबाहेक हरेक साँझ नाटक ‘भोको घर’ मञ्चन हुनेछ । शनिबार दिउँसो १:३० बजे पनि अतिरिक्त शो राखिएको थिएटर मलले जनाएको छ । नाटकघरले नाटकको टिकट दर रु. २००, रु ३०० र रु ५०० तोकेको छ ।

प्रकाशित :पुस ३, २०७३

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्