अन्तर्राष्ट्रिय चलचित्र महोत्सब नेपालमा

  • १६ देशका ४६ फिल्म छानिए

- साप्ताहिक संवाददाता

मंसिर २३, २०७३

 

काठमाडौं । अखिल नेपाल चलचित्रकर्मी संघको आयोजनामा आगामी पुष २७ देखि माघ २ गते (११ देखि १५ जनवरी) सम्म प्रदेश नम्बर १ को मुख्य शहर धरानमा ‘अन्तर्राष्ट्रिय चलचित्र महोत्सब नेपाल–२०१७’ अर्थात International Film festival Of Nepal-2017 (IFFON) आयोजना गर्न लागिएको छ । बुधबार राजधानीमा आयोजित पत्रकार भेटघाटमा सो जानकारी गराईयो ।

 

महोत्सब संयोजक एवं आयोजक सँस्थाका संयोजक केपी पाठकले कार्यक्रममा भने, ‘सम्माननीय प्रधानमन्त्री पुष्पकमल दाहाल ‘प्रचण्ड’ ले प्रमुख अतिथिको रुपमा यो महोत्सबको आगामी पुष २७ गते बिहान १० बजे धरानस्थित सभा गृहको प्रेक्षालयमा उद्घाटन गर्नुहुनेछ । महोत्सब पाँच दिनसम्म सोही हलमा सञ्चालन हुनेछ ।’  संयोजक पाठकले भने, ‘मुलुक संघीयतामा गईसकेको बेला पनि प्रायजसो अवार्ड तथा अन्तर्राष्ट्रिय चलचित्र महोत्सबहरु काठमाडौंमा हुने गरेको यहाँहरुलाई जानकारी नै छ ।

 

अरु प्रदेशका दर्शकलाई अन्तर्राष्ट्रिय चलचित्र हेर्ने अबसर जुटाउँदै विश्वका सिनेकर्मीसंग बहस गर्दै प्रादेशीक रुपमा चलचित्रको विकासका लागि प्रोत्साहन मिलोस् भन्ने हाम्रो चाहना हो ।’ पाठकले अगाडि थपे, ‘सोही कारण यस पटक हामीले प्रदेश नम्बर १ को मुख्य मध्येको शहर धरानमा पहिलो अन्तर्राष्ट्रिय चलचित्र महोत्सब आयोजना गर्न लागेका हौं । यसरी प्रदेश नम्बर १ बाट महोत्सब सुरु गरिएको यो महोत्सबलाई सात वर्षभित्र ७ वटै प्रदेशमा गर्ने लक्ष्य यस संघका रहेको छ ।’

अवार्डका निर्णायक एवं चर्चित अभिनेता राजेश हमालले यस्तो महोत्सबले अन्तर्राष्ट्रिय चलचित्र संस्कृति आदन प्रदानमा सहयोग पुग्नुका साथै नेपाली पनि फिल्म हब बन्दैछ भन्ने सन्देश अन्तर्राष्ट्रिय क्षेत्रमा जाने भनाई सो क्रममा राखे । अर्का निर्णायक एवं चलचित्र निर्देशक लक्ष्मीनाथ शर्माले यो महोत्सबले स्थानीय दर्शकलाई विश्वका सिनेमा बारे जानकारी गराउँदै राम्रा र मौलिक सिनेमा हेर्न तथा निर्माण गर्न प्रेरित गर्ने भनाई सो कार्यक्रम राखे । आयोजक संस्थाका अनुसार महोत्सब गर्नुको मुख्य उद्देश्य मौलिक, सार्थक, यथार्थपरक र कलात्मक फिल्मलाई  प्रवद्र्धन गर्ने र यस्ता चलचित्रलाई मुलधारका चलचित्रसंग जोडेर अघि बढाउनु हो । सोही उद्देश्य अनुसार महोत्सबका लागि विश्वका सिनेमा आह्वान गरिएको थियो ।

जस मध्यबाट २२ देशका लामा चलचित्र, बृत्तचित्र, कार्टुन चलचित्र, छोटा चलचित्र गरी २ सय १ वटा सिनेमा प्राप्त भए । लेखक/निर्देशक/कलाकार सुभास गुजरेल, लेखक/निर्देशक/ पत्रकार डब्बु क्षेत्री र निर्देशक/पत्रकार एवं ध्वानी विज्ञ आलोक तिवारीको  तीन सदस्यीय प्रारम्भिक चयन समितिले लगातार डेढ महिना सिनेमा हेरेर २२ देश चलचित्रबाट अवार्डका लागि राम्रा चलचित्र छान्ने काम गरेको पत्रकार भेटघाटमा क्षेत्रीले जानकारी गराए ।

 

जसमा नेपाल, चीन, भारत, बागलादेश, श्रीलंका, जापान, इरान, क्युवा, इजिप्ट, रुस, स्टोनीया, कजाकिस्तान, जर्मनी, मोन्टेनेग्रो र टर्की गरी १५ देशका ४६ ओटा सिनेमा प्रारम्भिक चयन समितिले छनौट गरेको छ । सो समिति चयन गरेका सिनेमाहरुमा फिचर फिल्म, सर्ट फिल्म, डक्युमेन्ट्री, डक्युड्रामा र कार्टुन फिल्म रहेका छन् । अन्तिम प्रतिस्पर्धाका लागि छानिएका चलचित्रहरु महोत्सबमा पाँच दिन प्रदर्शन गरिने छ । सो प्रतिस्पर्धाको लागि पााच सदस्यीय अन्तिम निर्णायकहरु रहनु भएको छ । जसमा चीनका बरिष्ठ चलचित्र निर्देशक सेई फी मुख्य निर्णायक रहनु भएको छ । बाँकी निर्णायकहरुमा फ्रान्सका चलचित्र प्रध्यापक ड्रागन मिलिन कोभिक, नेपालका चर्चित अभिनेता राजेश हमाल, नेपालकै अग्रज चलचित्र निर्देशक लक्ष्मीनाथ शर्मा र भारतकी चलचित्र छायाँकार फाओजिया फथिमा रहनु भएको छ ।  

 

महोत्सब संयोजक पाठकका अनुसार महोत्सबमा सहभागी सबै चलचित्रहरुले अवार्डको लागि प्रतिस्पर्धा गर्ने छन् । जस अन्तरगत नेपाल पानोरमा अन्तर्गत नेपाली चलचित्रहरुको मात्र प्रतिस्पर्धा हुनेछ भने अन्तराष्ट्रिय प्रतिस्पर्धा अन्तर्गत नेपाल लगायत बाँकी देशका सिनेमाहरुबीच प्रतिस्पर्धा हुनेछ । जसमा अवार्डहरु निम्न प्रकार रहनेछन् ।

नेपाल पानोरमा :

– बेस्ट फिचर फिल्मका लागि ५० हजार रुपैयाँको राशी र ट्रफी सहितको ‘श्रीजागा अवार्ड’

– बेस्ट डक्युमेन्ट्रीका लागि ३० हजार रुपैयाँ राशी र ट्रफी सहितको ‘रामप्रसाद राई अवार्ड’

– बेस्ट सर्ट फिल्मका लागि ३० हजार रुपैयाँ राशी र ट्रफी सहितको ‘चतुरमान राजबंशी अवार्ड’

अन्तर्राष्ट्रिय प्रतिस्पर्धा :

– बेस्ट फिचर फिल्मका लागि १ हजार अमेरिकी डलर राशी र ट्रफी सहितको ‘गौतमबुद्ध बेस्ट फिचर फिल्म अवार्ड’

– बेस्ट डक्युमेन्ट्रीका लागि  ५ सय अमेरिकी डलर राशी र ट्रफी सहितको ‘माउन्ट एभरेन्ट बेस्ट डक्युमेन्ट्री अवार्ड’

– बेस्ट सर्ट फिल्मका लागि ३ सय अमेरिकी डलर राशी र ट्रफी सहितको ‘रारा बेस्ट सर्ट फिल्म अवार्ड’

धरानमा महोत्सबको पाँचै दिन चलचित्र सम्बन्धित विभिन्न कार्यशाला, अन्तरक्रिया र मास्टर क्लास पनि सञ्चालन गरिने भएको छ । जसमध्ये चीनका चलचित्र निर्देशक सेई फीले ‘सिनेमा फर पिपुल’ शिर्षकको मास्टर क्लास चलाउने हुनेछ । यस्तै फ्रान्सका चलचित्र प्रध्यापक ड्रागन मिलिन कोभिकले ‘थिएटर एन्ड एक्टिङ’ वर्कसप र भारतकी चलचित्र छायाँकार फाओजिया फथिमाले ‘भिजुअल ल्याङ्वेज अफ सिनेमा’ वर्कसप सञ्चालन गर्नु हुने पनि संयोजक पाठकले जानकारी गराए ।

पाठकका अनुसार महोत्सबमा हरेक दिन अन्तरक्रिया कार्यक्रमहरु पनि आयोजना गरिंदैछ । जस अन्तर्गत ‘नेपाली सिनेमामा नेपाली समाजको प्रतिबिम्ब : यथार्थ र आबश्यक्ता’, ‘नेपाली चलचित्रकर्मीको समस्या’, ‘सिनेमा र राजनीति’, ‘सिनेमा समीक्षा’, ‘सिनेमा, नाटक र साहित्यको अन्तरसम्बन्ध’, ‘नेपाली सिनेमाको सौन्दर्य शास्त्र’ र ‘नेपालमा बृत्तचित्रको बर्तमान अबस्था समस्या र सम्भावना’ शिर्षकमा अन्तरक्रिया कार्यक्रम गरिने छ ।

महोत्सब व्यबस्थापक राजु केसीले महोत्सबलाई सफल पार्न चलचित्र निर्देशक दीपक श्रेष्ठको संयोजकत्वमा प्रदेश नम्बर १ का चलचित्रकर्मी, विभिन्न संघ संस्था तथा नागरिक समाज र विज्ञ सहितको ४१ सदस्यीय स्थानीय व्यबस्थापक समिति गठन गरिएको छ । सो समितिले महोत्सबलाई भव्य र सभ्य पार्ने पनि व्यबस्थापक केसीले पत्रकार भेटघाटका क्रममा जानकारी गराए ।  

 

प्रकाशित :मंसिर २३, २०७३

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्