थोरै तर उत्कृष्ट काम गर्छु

- साप्ताहिक संवाददाता

आश्विन २०, २०७२

गम्भिर विष्ट, नृत्य निर्देशक 

दिनचर्या कस्तो चल्दैछ   ?

मैतीदेवीस्थित मेरो नृत्य प्रशिक्षण केन्द्र डान्स फिवरमा प्रशिक्षार्थीहरूलाई नृत्य सिकाउनेमै बढी व्यस्त छु भने केही चलचित्र र म्युजिक भिडियोहरूको छायांकनलाई पनि समय दिइरहेको छु । 

कतिवटा चलचित्रमा नृत्य निर्देशन गर्नुभयो ?

खासै गनेको त छैन । मैले ‘लुट’बाट थालेको हो । अहिलेसम्म १५ वटाजति पुगे होलान् ।

सुपरहिट लुटका नृत्य निर्देशक त निकै व्यस्त हुनुपर्ने, किन थोरै ?

मैले जति पनि गीतको नृत्य निर्देशन गर्न पाएँ, ती सबै उत्कृष्ट छन् । थोरै गर्छु, उत्कृष्ट गर्छु । 

कोरियोग्राफीबाट जीवन गुजारा हुन्छ ?

भैरहेकै छ । मैले जानेको र रोजेको पेसा हो यो । कोरियोग्राफीमा म आत्मसन्तुष्टि प्राप्त गर्छु । 

आफैंलाई मन परेका आफ्नै तीन कोरियोग्राफी ?

मायाज बारको ‘सरसर माया वरवर’ र ‘वारी सिकारी’ तथा टलकजंग भर्सेज टुल्केको ‘नाचन मैया’ ।

तीन नायिका जो असाध्यै सेक्सी लाग्छन् ?

झरना बज्राचार्य, मलिना जोशी र रीमा विश्वकर्मा

जीवनको सबैभन्दा ठूलो गल्ती ?

कसैको चित्त दुखाएको छैन । कसैलाई नोक्सानमा पारेको छैन । हाँस्ने–हँसाउने, नाच्ने–नचाउने मान्छे हुँ । मैले के नै गल्ती गर्छु होला ?

जीवनको ‘टर्निङ प्वाइन्ट’ ?

नेपाल टेलिभिजनको रियालिटी डान्सिङ सो ‘छमछमी’को कोरियोग्राफर हुनु । त्यसपछि मैले यो क्षेत्रमा आफूलाई चिनाउने र काम देखाउने अवसरहरू पाउँदै गएँ । 

नाच्न नआएको भए ?

सम्भवत: चलचित्र निर्देशक हुन्थें । 

नचाउन गाह्रा नायक ?

मैले जति पनि नायकलाई नचाएँ, उनीहरूमध्येबाट अलिक कम नाच्न आउनेहरूमा दयाहाङ राई, खगेन्द्र लामिछाने र कर्म । 

अरू नायकले नाच्न जानेका छन् त ?

धेरै कमलाई नाच्न आउँछ । चलचित्रमा गीत हुन्छन्, गीतमा नाच्नुपर्छ भनेर नाच्न सिक्ने चाह चाहिँ धेरैमा नभएको पाएको छु । 

दाइ गजित विष्टजस्तो नायकचाहिँ किन नभएको ?

खोइ, यति राम्रो लुक्स हुँदा पनि कसैले पत्याएनन् । (हाँसो)

गजित राम्रो नाच्ने कि तपाईं ?

दाइ मेरो नाचको गुरु पनि भएकाले गुरु जत्तिको नाच्न त कहाँ सक्छु र ?

तपाईंको एउटी नायिकासँग अफेयर छ रे नि ?

लौ यो नटुवासँग प्रेमको हल्ला गरेर खाडलमा पर्न चाहने को रै’छिन् ती अभागी ?

प्रकाशित :आश्विन २०, २०७२

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्