कामना एवार्डमा महसुस उत्कृष्ट

कामना एवार्डमा महसुस उत्कृष्ट

मंसिर १९, २०७१

कामना पत्रिका ३० वर्ष पूरा गरेको अवसर पारेर पहिलो पटक आयोजना गरिएको 'कामना फिल्म एवार्ड-२०७१' मा नवल नेपाल निर्देशित चलचित्र 'महसुस' ले सर्वाधिक पाँचवटा एवार्ड जितेको छ । सोमबार भद्रकालीस्थित आर्मी अफिसर्स क्लबमा आयोजित समारोहमा वितरण गरिएका ३१ विधामध्ये 'महसुस' ले सर्वाधिक ६ वटा विधामा सफलता पाएको थियोे । चलचित्रले उत्कृष्ट चलचित्र (कल्याण घिमिरे), निर्देशक (नवल नेपाल), अभिनेता (आर्यन सिग्देल), अभिनेत्री (केकी अधिकार), सहअभिनेत्री (बेनिशा हमाल) तथा पटकथा -नवल नेपाल)को एवार्ड जितेको हो । कार्यक्रमका क्रममा विदेशमा रहेका निर्माता कल्याण घिमिरे तथा अभिनेत्री केकी अधिकारीले एवार्ड ग्रहण गर्न पाएनन् ।

अग्रजको सम्मान गर्दै प्रारम्भ भएको एवार्ड वितरण समारोहमा नेपाली चलचित्र क्षेत्रमा योगदान पुर्‍याउने दुई साधक पहिलो नेपाली चलचित्र 'आमा' का अभिनेता हरिप्रसाद रिमाल तथा छायांकार बैकुन्ठमान मास्केलाई नगद १ लाख रुपैयाँसहितको 'कीर्तिमय दीर्घ योगदान सम्मान-२०७१' प्रदान गरिएको थियो । नेपाली संगीत, नाट्य तथा फेसनको क्षेत्रमा योगदान दिने श्रष्टालाई सिजी क्रिटिक्स एवार्डद्वारा सम्मानित गरियो । उक्त सम्मानबाट संगीतकार हरी लम्साल, नाट्यकर्मी प्रवीण खतिवडा तथा फेसन डिजाइनर मुक्ता श्रेष्ठ सम्मानित भए । दीपा बस्नेतद्वारा निर्देशित चलचित्र 'अन्तराल' ले जुरी एवार्ड प्राप्त गर्‍यो ।  

२०७० साल वैशाख १ देखि चैत मसान्तसम्म प्रदर्शन भएका चलचित्रहरूबीचको प्रतिस्पधर्ाबाट उत्कृष्ट भएका चलचित्र तथा चलचित्रकर्मीलाई प्रदान गरिएको एवार्डमा चलचित्र 'नाईँ नभन्नु ल-२' ले दोस्रो सर्वाधिक ५ वटा एवार्ड जित्यो । उक्त चलचित्रबाट प्रेम परियार तथा रजिना रिमालले उत्कृष्ठ पाश्र्व गायनको एवार्ड जिते भने गेरै सुरेश तथा डा. कृष्णहरि बरालले क्रमश: उत्कृष्ट संगीतकार तथा गीतकारको एवार्ड हात पारे । विकास आचार्यद्वारा निर्देशित यही चलचित्रबाट अनुभव रेग्मीले उत्कृष्ट बाल कलाकारको एवार्ड जिते ।

सुनिल रावलको चलचित्र 'होस्टेल' ४ एवार्डका साथ तेस्रो स्थानमा रह्यो । चलचित्र होस्टेलबाट प्रकृति श्रेष्ठले नव-अभिनेत्रीको एवार्ड जितिन् भने गौरव पहाडीले सह-अभिनेतको एवार्ड हात पारे । हरि हुमागाईँ उत्कृष्ट छायांकार बने भने सुरेन्द्र पौडेलले उत्कृष्ट सम्पादकको एवार्ड उचाले ।

प्रवीण श्रेष्ठ चलचित्र 'मोक्ष' बाट उत्कृष्ट नव-निर्देशकको बिधामा अब्बल घोषित भए भने यही चलचित्रबाट कोशिस क्षेत्रीले उत्कृष्ट नव-अभिनेताको एवार्ड जिते । राजेन्द्र कठैत तथा प्रवीण श्रेष्ठलाई सर्वोत्कृष्ट संवादको एवार्ड दिलाएको मोक्षले सर्वाधिक तीनवटा एवार्ड जित्यो ।

चलचित्र 'मौन' ले पनि तीन वटै एवार्ड जित्यो । उक्त चलचित्रका लागि रोहित शाक्यले उत्कृष्ट पाश्र्व संगीत विधाको एवार्ड जिते भने यही चलचित्रबाट उत्तम न्यौपानेले उत्कृष्ट ध्वनि मिश्रणको एवार्ड हात पारे । निमा लामा उत्कृष्ट मेकअप आर्टिस्टको एवार्डको हकदार भए ।

समारोहमा कलाकार विल्सनविक्रम राईले चलचित्र 'प्रोड्युसर' बाट उत्कृष्ट हास्य कलाकारको एवार्ड जिते भने मनोज आरसी 'मधुमास' बाट उत्कृष्ट खलनायक घोषित भए । सूर्य थोकरले चलचित्र 'लभ फरएभर' बाट उत्कृष्ट द्वन्द्व निर्देशकको एवार्ड पाए ।

समारोहमा नेपाली चलचित्रको विकासमा योगदान पुर्‍याउने स्वर्गवासी चलचित्रकर्मीहरूलाई सम्मान गर्दै स्लाइड शोमार्फत श्रद्धाञ्जली अर्पण गरिएको थियो ।

यसअघि कार्यक्रमको प्रारम्भमै नेपाली चलचित्रको ५० वर्ष यात्रालाई सम्मान गर्दै भुवन केसी, शिव श्रेष्ठ, करिश्मा मानन्धर, भुवन चन्द, चैत्यदेवी, गौरी मल्ल, झरना थापा, रमेश उप्रेती आदि कलाकारले नयाँ-पुराना चलचित्रका लोकप्रिय गीतमा नृत्य गरेका थिए । भैरवी ब्यान्डले प्रस्तुत गरेको 'आमैले भन्थिन् धाराको पानी...' गीत पनि रोचक सुनिएको थियो ।

प्रकाशित :मंसिर १९, २०७१

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्