इन्फा एवार्डमा आर्यन र नम्रता उत्कृष्ट

इन्फा एवार्डमा आर्यन र नम्रता उत्कृष्ट

- निर्मल श्रेष्ठ

कार्तिक १५, २०७१

इन्टरनेसनल नेपाल फिल्म एकेडेमी (इन्फा) एवार्डमा आर्यन सिग्देल र नम्रता श्रेष्ठ उत्कृष्ट अभिनेता/अभिनेत्री घोषित भएका छन् । आर्यनले महसुस र नम्रताले मौनबाट उक्त एवार्ड जितेका हुन् । बेस्ट एक्टर विजेता आर्यन अनुपस्थित कार्यक्रममा नम्रता एक्ली आकर्षण रहिन् । उत्कृष्ट चलचित्रसहित सबैभन्दा बढी ७ वटा एवार्ड जित्ने चलचित्र भने 'नाइँ नभन्नु ल-२' भयो । उक्त चलचित्रबाट विकास आचार्य उत्कृष्ट निर्देशक घोषित भए । विधागत २० एवार्डमध्ये एनएनएल-२ ले उत्कृष्ट सह-अभिनेता (सुरजसिंह ठकुरी), सह-अभिनेत्री (प्रियंका कार्की), पाश्र्व गायक (प्रेम परियार), गीतकार (कृष्णहरि बराल) तथा संगीतकार (वसन्त सापकोटा) का लागि समेत एवार्ड जितेको थियो । इन्फा गठनपछि पहिलो कार्यक्रम हङकङमा गरिएको हो । युङ लङ थिएटरमा आइतबार राति आठ बजेदेखि करिब तीन घण्टा चलेको समारोहमा दयाहाङ राई र प्रियंका कार्कीलाई पपुलर आर्टिस्टको एवार्ड प्रदान गरिएको थियो । चलचित्र कालीबाट मिलन अमात्य (पाश्र्व गायिका) र कविराज गहतराज (कोरियोग्राफी) ले एवार्ड जिते । उपप्रधान तथा स्थानीय विकास मन्त्री प्रकाशमान सिंह प्रमुख अतिथि रहेको एवार्ड वितरण समारोहमा विभिन्न भाषामा निर्मित नौवटा आदिवासी चलचित्रलाई सम्मानपत्रसमेत प्रदान गरिएको थियो ।

नेपाल क्लब हङकङ स्थानीय आयोजक रहेको कार्यक्रममा नविन गौली/सुरज भुसाल लिखित मौनले उत्कृष्ट कथाको एवार्ड थाप्दा सुरज सुब्बा नाल्बोको चलचित्र बितेका पलले पटकथा तथा संवादको एवार्ड जित्यो । सीताराम कट्टेलले चलचित्र 'छ एकान छ' बाट उत्कृष्ट हास्यकलाकारको एवार्ड जिते । सीतारामले पत्नी कुञ्जना घिमिरेका साथ प्रहसनसमेत प्रस्तुत गरे । द्वन्द्व निर्देशक राजेन्द्र खड्गीले फिल्म नथिङ इम्पोसिबलबाट बेस्ट एक्सनको एवार्ड थापे । उत्कृष्ट खलपात्रको एवार्ड भने अभिनेत्री झरना थापाको पोल्टामा गयो । अनमोल केसी (होस्टेल) र सुजाता कोइराला (मंजरी) ले नव-अभिनेता/अभिनेत्रीको एवार्ड जिते । पूर्व मिस नेपाल माल्भिका सुब्बाद्वारा सञ्चालित कार्यक्रममा उत्कृष्ट छायांकन पुरुषोत्तम प्रधान (ढुवानी) तथा सम्पादन अञ्जे खड्का (साँघुरो) ले  एवार्ड जिते ।

लामो समयदेखि अनवरत चलचित्र क्षेत्रमा सक्रिय उद्धव पौडेललाई इन्फाले लाइफटाइम एचिभमेन्ट एवार्डबाट सम्मानित गर्‍यो । उक्त अवसरमा अभिनेता भुवन केसी, शिव श्रेष्ठ, गौरी मल्ल तथा विजय लामालाई क्रमश: अभिनय तारा, सर्वश्रेष्ठ नायक, कला प्रतिमूर्ति र सुपर हिरोको उपाधिसहित इन्फा एवार्ड प्रदान गरियो । पूर्व मिस नेपाल तथा चलचित्र ऋतुकी नायिका अभिनेत्री मलिना जोशीलाई फ्रेस फेस र बितेका पलका नायक अविनाश गुरुङलाई स्पेसल रिकगनिशन एवार्ड प्रदान गरिएको कार्यक्रममा मलिना जोशी र अनुप विक्रम शाही, नन्दिता केसी, माला लिम्बूलगायत स्थानीय कलाकारहरूले गीत तथा नृत्य प्रस्तुत गरेर वातावरण तताए । कार्यक्रममा सहभागी हुन पाँच दर्जनभन्दा बढी चलचित्रकर्मी नेपालबाट हङकङ पुगेका थिए । केही दिनअघि मात्र हङकङमा यस्तै प्रकृतिको अर्को एउटा एवार्ड वितरण समारोह पनि सम्पन्न भएको थियो ।

 

प्रकाशित :कार्तिक १५, २०७१

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्