घुम ओडेको दसैं

घुम ओडेको दसैं

आश्विन १०, २०७१

घुम ओडेर दसैंको

मडारिएको छ बादल

हाम्रो शीरमाथि अनेक रंग बोकेर

गडगडाउँदैछ आकाशमा ।

कतै

गरिबको झुत्रे घुमबाट चिह्याएर

व्यंग्यपूर्ण आँखा सन्काउँछ

र अभावको घाउमा चिमोट्छ,

कतै

हुनेखानेको मुहारमा

उन्माद रोपेर

सम्पन्नताको अहंकार फलाउँछ,

अनि फेरि कतै

त्यही बादल

केटाकेटीका लिंगे पिंगहरूमा

उत्साह र उमंग बोकेर

चचहुँइइ गर्दै मच्चिएको छ ।

तर अहिले भने यो बादल

परदेशमा रुने म र

गाउँघरमा मेरो बाटो कुर्ने

माइतीको आँसुको झरी बनेर

बर्सन खोज्दैछ ।

यतिबेला

मेरो मन-आकाशमा

उसै गरी मडारिरहेकै छ

बादल,

झुत्रो घुम ओडेर दसैंको ।

                नीरा शर्मा

प्रकाशित :आश्विन १०, २०७१

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्