तीज बिशेष

तीज गीतमा हास्य कलाकारको भीड

- कृष्ण भट्टराई

 

 

केही वर्ष अघिसम्म लोकदोहोरी गीत गाउने गायिकाहरूलाई मात्र तीज लाग्थ्यो । पछिल्ला वर्षहरूमा गायिकासहित गायकहरूलाई समेत तीज लाग्न थाल्यो । तीज विशेष गीतमा गायक–गायिका दुवैको स्वर सुन्न थालियो । नेपाली टेलिभिजनको संख्या तथा यूट्युबको लोकप्रियतासँगै पछिल्ला केही वर्षयता तीज गीतका म्युजिक भिडियोको संख्या समेत बढ्न थाल्यो । पछिल्ला तीन वर्षमा तीज गीतका झन्डै दुई हजारभन्दा बढी म्युजिक भिडियो निर्माण भएको एउटा तथ्यांक छ । तीज गीतका म्युजिक भिडियोको वृद्धिसँगै भिडियोमा अभिनय तथा नृत्य गर्ने कलाकारहरूको संख्या समेत बढेको छ । तीज गीतका भिडियोमा नृत्य गरेर तीज क्विनको उपाधि पाउने नृत्यांगनाहरूको संख्या नै एक दर्जनभन्दा बढी भैसकेको छ । अहिले आएर तीज गीतका म्युजिक भिडियोमा हास्य कलाकारहरूको अभिनय अनिवार्य झैं बन्न थालेको छ । यो वर्ष निर्माण भएका झन्डै ८० प्रतिशत म्युजिक भिडियोमा हास्य कलाकारहरूले नै अभिनय गरेका छन् । 

पाँच वर्षअघि नै अभिनेता सीताराम कट्टेल धुमुर्स तथा मरिचमान श्रेष्ठ बल्छी धुर्वेले तीज गीतको म्युजिक भिडियोमा अभिनय गरेका थिए । गायिका विष्णु माझीको ‘भिनाजु पल्केर’ शीर्षकको उक्त गीतको भिडियो हालसम्म ३१ लाख पटक हेरिएको छ । भिडियोमा धुर्मुसलाई अभिनेत्री सुमिना घिमिरेले साथ दिएकी थिइन् । चार वर्षअघि धुर्मुसले विष्णु माझीकै ‘घुम्रै जुलफी’ गीतको म्युजिक भिडियोमा अभिनय गरे । उक्त भिडियो १७ लाख पटक हेरिएको छ । त्यसयता धुर्मुसले तीज गीतका म्युजिक भिडियोलाई समय दिन भ्याएका छैनन् । 

झन्डै डेढ महिनाअघि सार्वजनिक भएको सन्तोष केसी, राधिका हमाल तथा ललिला पौडेलको तीज गीत ‘आमा’ लाई जिरे खुर्सानीको कमेडी तीज गीतका रूपमा यूट्युबमा अपलोड गरियो । झन्डै २० लाख पटक हेरिएको उक्त भिडियोमा हास्य श्रृंखला जिरे खुर्सानीका लोकप्रिय कलाकार शिवहरि पौडेल, अञ्जु महर्जन, सुनिता गौतम, पुरुषोत्तम भण्डारीसहित लक्ष्मी गिरी तथा रमा थपलियाले समेत अभिनय गरेका थिए । 

हर्के हल्दारका अभिनेता विष्णु सापकोटाले पनि यो वर्ष तीज गीतको भिडियोमा अभिनय गर्न भ्याए । विनोद भण्डारी तथा सम्झना भण्डारीको उक्त गीत झन्डै ७ लाख पटक हेरिसकिएको छ । सन्तोष पन्तको लोकप्रिय हास्य श्रृंखला हिजो आजका कुरामा अभिनय गर्ने कलाकार रमा थपलिया यो वर्ष तीज गीतका म्युजिक भिडियोमा देखा परिन् । सुमन थापा मगरको ‘लाकुरीको रूख’ को भिडियोमा थपलियाले अभिनेत्री सिरु विष्टसँग अभिनय गरिन् । थपलियाले दुई साताअघि सार्वजनिक भएको ‘पाखुरामा ट्याटू’ शीर्षकको तीज गीतको भिडियोमा समेत अभिनय गरेकी छिन् । उक्त भिडियोमा थपलियालाई अभिनेता सुरवीर पण्डितले साथ दिएका छन् । त्यसो त थपलियाले अघिल्लो वर्ष नै अभिनय गरेको इन्द्र जिसी तथा यज्ञ सापकोटाको तीज गीत ‘घर झगडा’ को म्युजिक भिडियो झन्डै साढे आठ लाख पटक हेरिएको छ । उक्त भिडियोमा थपलियालाई हास्य कलाकार सुरवीर पण्डितले साथ दिएका छन् । 

मेरी बास्सैसहित दर्जनौं हास्य श्रृंखलामा अभिनय गरिसकेका सुरवीर पण्डित ‘दाह्री बा’ पनि तीज गीतका म्युजिक भिडियोमा देखिरहने कलाकार हुन् । तीन वर्षअघि नै नमराज पाण्डेको ‘भैंसी साटे झैँ’ गीतको म्युजिक भिडियोमा अभिनय गरेका पण्डितले हालसम्म दर्जनौं तीज गीतका भिडियोमा अभिनय गरिसकेका छन् । अघिल्लो वर्ष उनले मुना थापा मगर, इन्द्र जिसी तथा यज्ञ सापकोटाको ‘घर झगडा’ मा अभिनय गरेका थिए । सुरवीरले दुई महिनाअघि म्युजिक नेपालले अपलोड गरेको ‘किचकिचे घरबेटी’ शीर्षकको तीज गीतको भिडियोमा अभिनय गरेका थिए । उक्त भिडियोमा सूरवीरसहित बल्छी धुर्वे तथा प्याकुली अर्थात् जानुका पौडेलले समेत अभिनय गरेका छन् । 

सरापे उपनामले चर्चित अभिनेता यादव देवकोटा सबैभन्दा बढी तीज गीतका म्युजिक भिडियोमा अभिनय गर्ने हास्य कलाकार हुन् । झन्डै एक महिनाअघि सार्वजनिक भएको गोविन्द चापागाईं तथा माया गुरुङको तीज गीत ‘मर्छु गन गनले’ गीतको म्युजिक भिडियोमा सरापे नै मुख्य भूमिकामा छन् । उक्त भिडियो झन्डै तीन लाख पटक हेरिएको छ । अघिल्लो वर्ष उनले अभिनय गरेका भिडियोमध्ये तेजस रेग्मीको घर झगडा झन्डै ८ लाख पटक हेरिएको थियो । शान्तिश्री परियारको ‘सुन्तला र बदाम’ शीर्षकको यही वर्ष सार्वजनिक तीज गीतको भिडियोमा पनि सरापेले रमाइलो अभिनय गरेका छन् । अघिल्लो वर्ष उनले अभिनय गरेको मुग्लिनको धुलो गीतको म्युजिक भिडियो झन्डै १३ लाख पटक हेरिएको थियो, जसमा सरापेसँगै बिमली अर्थात् सुशिला निरौलाले समेत अभिनय गरेका थिए । तीन साताअघि सार्वजनिक भएको कमल सुशान्तको थोत्रो मोटरसाइकल किन्छु शीर्षकको तीज गीतले पनि दर्शकको मन जितेको थियो । 

अभिनेता कमल गाउँलेले पनि यो वर्ष थुप्रै तीज गीतका म्युजिक भिडियोमा अभिनय गरेका छन् । गाईजात्रे एल्बम सार्वजनिक गरेर चर्चामा आएका अभिनेता गाउँलेले यो वर्ष गायिका कोमल वलीसँग छैन पैसा शीर्षकको गीतमा स्वर समेत दिन भ्याएका छन् ।

तीज गीतमा पनि पदम बा
८१ वर्षको उमेरमा समेत अभिनयमा सक्रिय पदमप्रसाद पौडेलले यो वर्ष थुप्रै तीज गीतका म्युजिक भिडियोमा नृत्य गर्न भ्याए । अघिल्लो वर्ष दुईवटा तीज गीतका भिडियोमा अभिनय गरेका पदम बाको उपनामले परिचित पौडेल यो वर्ष आधा दर्जनभन्दा बढि तीज गीतका भिडियोमा देखिए । पदम बाले कोमल वली तथा प्रज्ञा वलीको आऊ दिदीबहिनीसहित गायक पशुपति शर्माका दुई, मिलन श्रेष्ठको एउटा तीज गीतमा कम्मर मर्काएका हुन् । नालापानी, ऐना झ्यालको पुतली, लै बरी लै तथा शान्ति पदम बाले अभिनय गरेका प्रदर्शनको तयारीमा रहेका चलचित्र हुन् । 

प्रकाशित: भाद्र २४, २०७५